Sangaji rahona ngoa ro tei kataho d̄i Nabi Yesaya
19
D̄i wakatu sangaji Hizkia ringana ngoa b̄a tolu dou perwira ede, ndad̄i sia sipa-sipana kani ro lombona ro kanina kaen ma kasa tanda ncoki ade, edempara sia laona aka Uma RUMA. 2 Sawa'u b̄a ede sangaji Hizkia kakaina la Elyakim, mana'ekai asi, la Sebna sekretaris negara, ro imam-imam ma wa'ura tua, d̄imalao eda angi lab̄o Nabi Yesaya ana la Amos. Siad̄oho rau kanina kaen ma kasa tanda ncoki ade. 3 Akeku nggahi sangaji Hizkia d̄i lao karongga b̄a siad̄oho d̄i la Yesaya, <<Ainaina ake, ainaina ncoki ade; ndai ra hukum ro katuna ro kab̄awa b̄a dou. Ndai b̄une dou siwe ma wa'ura ne'e nggana pala wa'ura mpoi tenggona. 4 Sangaji Asyur wa'ura kakaina sab̄ua dou perwira ma na'e b̄ora d̄imakatuna ro kab̄awa Allah Ta'ala ma mori. Cou ma b̄ade RUMA, Allah Ta'alamu wa'ura ringana katuna ro b̄awa ede, ro d̄imahukum siad̄oho ma wa'ura renta nggahi ede! B̄ara ndedena do'apu d̄i Allah Ta'ala d̄i ru'u dou-dou ndai ma mbuipu mori.>>5 Sawa'u b̄a ringana nggahi ra nggadu b̄a sangaji Hizkia ede, 6 ndad̄i Nabi Yesaya kauna dou-dou ra kakai ede karongga nggahi ake d̄i sangaji Hizkia, <<RUMA ma nggahi, Ita ruma sangaji, aina dahu b̄a ringata nggahi ada-ada sangaji Asyur ede b̄a one RUMA wati loana hori kalosa ndaita. 7 RUMA d̄imandawi sangaji Asyur ringa ro kade'ena sab̄ua haba, ndad̄ina sia d̄imadula mbali aka dana ro rasa ndaina, ro ta aka sia d̄ihade b̄a dou.>>
Dou Asyur Nggaduna Nggahi Kadahukai
(Yes. 37:8-20)
8 Perwira Asyur ede ringa/rakana haba b̄a one sangaji siad̄oho wa'ura tu'u wi'ina Lakhis ro wunga lewa lab̄o dou kota Libna, wati d̄o'ona lab̄o hid̄i ede. Ndad̄i laora perwira ede aka hid̄i lewakai ne'e eda angi lab̄o sangajina ede. 9 Sangaji Asyur wa'ura tarimana haba b̄a one tentara Mesir na'ekai b̄a la Tirhaka sangaji Sudan wunga mai ne'e dei siad̄oho. B̄ara ndedena, sangaji Asyur nggaduna sura d̄i la Hizkia sangaji Yehuda. 10 Ndake eli sura ede, <<Aina b̄oha b̄a tipu b̄a sake Allah Ta'alamu ra kad̄ese ro ntasamu/ra imbimu ede b̄a one nggomi wati d̄i kakoa b̄a nahu. 11 B̄ara nggomi wa'ura ringamu b̄a one sanikina dana ro rasa ra mai dei b̄a sangaji-sangaji Asyur, d̄ikaleli sara'a. Aina kacei b̄a nggomi loamu hori weki! 12 D̄i wakatu wa'i ro waro nahu ka'ihalelina/kakoa ro kuasakaina kota Gozan, Haran lab̄o kota Rezef, ro mahade dou Eden ma ngge'e d̄i Telasar, wati wara kone sab̄ua rau dewa-dewa siad̄oho ma loa kasalama siad̄oho. 13 Ta b̄eku sangaji-sangaji kota Hamat, Arpad, Sefarwaim, Hena, lab̄o kota Iwa?>>
14 Sangaji Hizkia tarimana sura ede d̄i dou-dou rakakai b̄a sangaji Asyur, edempara baca b̄a sia. Sawa'u b̄a ede sia laona aka Uma RUMA ro wirana sura ede d̄i tando RUMA, 15 Edempara do'ana, <<Io RUMA, Allah Ta'ala Israil , ma doho ese wawo kerub,v Ita mpa Allah Ta'ala ma kuasakai samenana kerajaan d̄i wawo dunia. Itaku ma rakandad̄ina langi lab̄o dana. 16 Io RUMA, taringa ro eda to'ipu au ma wunga ndad̄i d̄i madad̄oho. Taringa to'ipu sara'a katuna ro b̄awa b̄a la Sanherib d̄i Ita, Allah Ta'ala ma mori! 17 Io RUMA, madad̄oho sara'a mab̄ade, b̄a one sangaji-sangaji Asyur wa'ura hade kampoina mboto bangsa ro ka'ihalelina dana ro rasa siad̄oho. 18 Dewa-dewa siad̄oho ra ka'a rau ro kalelona, b̄ara dewa-dewa ede wati wara kuasana kone sato'i. Dewa-dewa ede randawikai haju ro wadu b̄a manusia. 19 Io RUMA, Allah Ta'ala madad̄oho, tahori kalosa to'ipu madad̄oho ra d̄i dou-dou Asyur ede, loakud̄u sara'a bangsa d̄i dunia b̄adena b̄a one Ita mpa Allah Ta'ala.
Nggahi Nabi Yesaya d̄i Sangaji
(Yes. 37:21-38)
20 Sawa'u b̄a ede nabi Yesaya nggaduna nggahi d̄i sangaji Hizkia b̄a one cambekai b̄ara do'a sangaji, 21 nggahira RUMA, <<Kota Yerusalem maharikai ro makampa'a-mpa'akai nggomi, Sanherib. 22 Sab̄ua mab̄ade b̄a nggomi, cou ra b̄a'a ro katuna ra b̄awa b̄a nggomi ede? Nahu, Allah Ta'ala Israil , Allah Ta'ala ma Wancuraso! Naipiku sombomu nggomi d̄i Nahu. 23 Ro nggomi kakaimu dou d̄imanuntu roi weki b̄a one kai mbotona kareta lewakaimu, nggomi wa'ura tekamu ese doro-doro mad̄ese poda d̄i Libanon. Nggomi kasombomu weki b̄a one nggomi mab̄o'ona fu'u-fu'u haju cemarana ma ipi d̄ese ro ma ipi ntika ro wa'ura lu'ukaimu wub̄a-wub̄a ntua (na'e). 24 Nggomi rau kanahu weki (kabangga weki) b̄a one nggomi mangarina temba ro nonomu oi d̄i dana ro rasa-dana ro rasa dou lairasa ro b̄a one tentara-tentara nggomi wa'ura tonda ro led̄ina Sori Nil sampe mangona.
25 Sab̄ua watipu wara ringa b̄a nggomi b̄a one sara'ana ede wa'ura nia b̄a Nahu aipu ntoi wa'una? Ro ake Nahu ma karawina. Nahuku ma rambeina d̄i nggomi kuasa d̄imaka'ihalelina kota-kota mantau b̄ente ndai roe-roe kota 26 Dou-dou ma ngge'e d̄i kota ede wati loana karawi au-au; siad̄oho ndad̄i wed̄i ro ipi dahu. Siad̄oho b̄une mpori d̄i so ro sera atao b̄une mpori ma woko ese b̄utu uma, ma male made b̄oha b̄a angi mai ele mai ma pana.w 27 Pala Nahu kab̄ade sara'a mab̄oha weki nggomi. Nahu kab̄ade au ra karawi b̄a nggomi ro ta b̄e laokai nggomi. 28 Nahu kab̄ade b̄a one nggomi ma ipi mbani d̄i Nahu, ro Nahu wa'ura ringaku mab̄oha kasombo weki nggomi ede. Ake Nahu makina coma/kab̄ena d̄i ilu nggomi ro rante d̄i asamu, loakud̄u Nahu marab̄i kadula nggomi ta ncai ra lampakai b̄a nggomi wakatu maimu.>>
29 Nabi Yesaya nggaduna nggahi ake rau d̄i sangaji Hizkia, << Akeku mandad̄i tanda d̄i ru'u b̄a nggomi. Mba'ana ake lab̄o/ro mba'ana satando dou d̄imangaha gando ma woko ndaina. Pala sawa'u b̄a ede siad̄oho naloa nggud̄a gando lab̄o anggo ro loa ngaha hasina. 30 Ro dou Yehuda ma mbuipu mori d̄imamori sana b̄une fu'u haju ma ipi d̄ei amuna ade dana ro mambua. 31 D̄i Yerusalem ro d̄i wawo Doro Sion d̄imawara dou-dou ma salama, b̄ara RUMA mawa'ura katantukai b̄a one lampa rawi ede d̄imandad̄i.
32 Ake ra nggahi b̄a RUMA mab̄oha sangaji Asyur, <<Sia wati d̄imalu'u ade Yerusalem atao ma co'o/hori ana fanana d̄i ou kota ede. Tentara-tentara makani tende wati wara d̄imamai d̄eni d̄i kota ede, ro mahekona wati d̄itu'u rab̄a d̄id̄eikai. 33 Sangaji Asyur d̄imadula tancai ra lampakaina wakatu mai sia, wati d̄imalu'u ade kota ede. Nahu, RUMA ma wa'ura nggahi. 34 Kota Yerusalem d̄i horu ro d̄i jaga ro sandaka b̄a Nahu b̄a d̄i ru'u lia ro horomakai weki ndai Nahu ro b̄a d̄i ru'u Sake Nahu lab̄o ada-Ku la Daud.>>
35 Edempara aimangad̄i ede lalo mai mala'eka RUMA d̄i kemakai dou Asyur, ro hadena 185.000 dou tentara. Naisid̄i-sid̄i timba-timba siad̄oho mbaru mbanta. 36 Ndad̄i surura/dulara la Sanherib sangaji Asyur ro dula mbali aka Niniwe. 37 D̄i sab̄ua ainaina, wakatu siad̄oho sambea ro ibadana ade kuil (uma) Dewa Nisrokh, sia ra hadekai peda b̄a la Adramelekh lab̄o la Sarezer, ana-ana monena. Sawa'u b̄a ede siad̄oho lao rai aka dana ro rasa Ararat. Ndad̄i la Esarhadon, ana monena ma kalai, ma ndad̄i sangaji ma cepena sia.