Sumbangan-sumbangan d̄i ru'u tu'ukai Uma RUMA
29
Edempara nggahira sangaji Daud d̄i sara'a dou ma kab̄oro weki d̄i hid̄i ede, <<Ra d̄i sara'a ana mone nahu, la Sulaiman ra kad̄ale b̄a Allah Ta'ala. Pala sia mbuipu to'i podana ro mbuipu kura au d̄i loana, au d̄i karawi ake nawancuku na'ena. Ro walija asi d̄itu'u ake laina d̄i ru'u manusia, malaisi Uma d̄i ru'u b̄a RUMA Allah Ta'ala. 2 Au-au (bahan-bahan) ru'u uma ede lab̄o tau ro tuina wa'ura ka'ambi b̄a nahu kai sara'a tenggo ro waleku. Nahu wa'ura sadiaku masa, salaka, romba, b̄esi, haju, wadu-wadu ma nggali manggali co'i ro wadu-wadu permata, wadu-wadu mamboto pahu mantika d̄i ru'u kantikakai uma ede ro mboto poda wadu pualam. 3 Ro b̄ara ipi meciku (ne'eku) d̄i Uma Allah Ta'alaku ede, nahu wa'ura d̄onggo rauku masa ro salaka ra d̄i ntau ro wara ndaiku: 4-5 masa ngganga (semata) 100 ton ncewi, ro salaka samata ncewi kura 240 ton d̄i ru'u petalapikai d̄ind̄i Uma RUMA, ro d̄i ru'u au-au rau (tau ro tui) d̄i pab̄ua karawi b̄a dou-dou ma ahli. Ndad̄i, ake cou wali mane'e mbei d̄onggo ro mbeina d̄i ru'u b̄a RUMA kai nira adena?>>6 Ndad̄i dou-dou mana'ekai londo ro mai (suku bangsa), dou-dou mana'ekai iwa ro weki, dou-dou perwira ro dou manenti (mantau su'u ro tundu) ntau ro wara sangaji manggahi b̄a one siad̄oho rau mane'e mbei sumbangan. 7 Edempara siad̄oho rau mbeina ra tunti ta awa ake d̄i ru'u tu'ukai Uma Ruma ede: masa 170 ton ncewi, salaka 340 ton ncewi. 8 Dou-dou ma ntau wadu permata d̄onggona d̄i la Yehiel d̄i ru'u tau ade kas Uma RUMA. La Yehiel eded̄u sab̄ua dou Lewi ra d̄i londo ro mai Gerson. 9 Ela ro dou mambei kai nira adena d̄i ru'u b̄a RUMA ro siad̄oho sana ro neo adena b̄ara wa'ura mboto ra d̄onggo ro mbei b̄a siad̄oho. Sangaji Daud rau sana ro neo poda adena.
Sangaji Dau roi ro wadina Allah Ta'ala
10 Edempara sangaji Daud roi ro wadina RUMA. Nggahi sia, <<Io RUMA Allah Ta'ala ra nemba b̄a la Yakub wa'i ro waro b̄a madad̄oho, d̄ese ro ntasa Ita d̄i ru'u santoi-ntoina! 11 Ita Nawancuku Na'e ro ntoru, ro na'ekuasa. Ita Ma D̄ese Ro Ntasa, Na'e ro Ntoru. Samenana au-au ese langi ro awa dana eded̄u ntau Ita RUMA. Ita Sangaji Mana'e Ro Ntoru, Ita ma ntau kuasa d̄i samenana ma wara (au-au). 12 Sara'a ntau ro wara ro taho mori ro woko ramaina ta ndai Ita RUMA: Samenana au-au, Ita RUMA makuasakaina kai tenggo ro Kuasa Ma Wancu Na'e; Ita mantau kuasa ndawi (kandad̄i) cou-cou rau ndad̄i dou mana'e ro tenggo. 13 Ake, Io Allah Ta'ala b̄a madad̄oho, madad̄oho marenta syukur d̄i Ita RUMA, ro madad̄oho ma roi ro wadi ngara Ita ma d̄ese Ro Ntasa.
14 Mada lab̄o ela ro douku ake, sapodakaina wati loa mbei au-au d̄i ru'u Ita RUMA, b̄ara samenana au-au ma wara d̄i madad̄oho eded̄u rambei b̄a Ita RUMA, ro au ra mbei b̄a madad̄oho ake eded̄u ntau Ita rau. 15 Ita mab̄adeku, Io RUMA, b̄a one wa'i ro waro madad̄oho, ,madad̄oho rau kalampa mori ake ndad̄i dou ma lu'u ro dou lai rasa. Mori madad̄oho b̄une ninu ma wa'ura kalalo, ro madad̄oho wati loamu hori weki ra d̄i madekai 16 Io RUMA, Allah Ta'ala b̄a madad̄oho, sara'a tau ro tui (barang-barang) ma nggahi co'i ake, kab̄oro b̄a madad̄oho d̄i hid̄i ake d̄i ru'u tu'ukai sab̄ua uma d̄i ru'u b̄a Ita RUMA, loakud̄u madad̄oho loa lia ro horoma ngara Ita Ma Raso. Pala sara'ana ede ra tarima b̄a madad̄oho d̄i ndai Ita ro eded̄u ntau ndai Ita rau. 17 Mada kab̄ade b̄a one Ita ma ugi ade sanikina dou ro Ita maca'u d̄i dou ma raso ro nira adena. Kai nira ro rela ade mada d̄onggo ro mbeiku sara'ana ake d̄i ru'u Ita RUMA. Mada wa'ura eda b̄a mada ndaiku b̄uneku ela Ita ma kab̄oro weki d̄i hid̄i ake mai wa'a d̄onggo ro mbei siad̄oho d̄i ru'u Ita RUMA kai sana adena. 18 Io RUMA, Allah Ta'ala ra nemba b̄a la Ibrahim, Ishak lab̄o la Yakub, wa'i ro waro b̄a mada6doho, raho-raho to'i mpa Ita jaga ro sandakata loakud̄u ela Ita ngge'e mpa meci ro ca'una. Ita RUMA, b̄une wakatu ake ro bantu to'ipu loakud̄u siad̄oho santoi-ntoina to'a d̄i Ita RUMA. 19 Tambei to'ipu d̄i la Sulaiman, ana mone mada ede, au d̄ine'ena ma poda-poda d̄i ru'u tu'ukaina uma sambea ro ibadakai ede, ma d̄i ru'u tu'ukaina wa'ura sadia b̄a mada.>>
20 Sawa'u b̄a do'ana ede, nggahi sangaji Daud d̄i dou ma mboto ma kab̄oro weki d̄i hid̄i ede, <<Roi ro wadipu RUMA, Allah Ta'alamu!>> Ndad̄i sara'a dou ede roi ro wadina RUMA, Allah Ta'ala ra nemba b̄a wa'i ro waro siad̄oho. Edempara siad̄oho sujuna d̄i lia ro horomakaina RUMA lab̄o sangaji.
21B̄ala ai sanai siad̄oho sambelena binata d̄i ru'u d̄onggo ro mbeina ndad̄i koroba d̄i ru'u b̄a RUMA, edempara cengga-cenggana d̄i sara'a ela ro dou. Selasi ede wara 1.000 mbua capi rangga, 1.000 mbua jimba rangga ro 1.000 mbua jimba ma mbuipu to'i umuna ra sambele ro raka'a more ese wawo mezbah. Siad̄oho d̄onggo ro mbei rauna oi anggo ma pab̄ua wara d̄i ru'u koroba-koroba ede. 22 Ainaina ede siad̄oho ngaha ro nono kai sana ro d̄ihi ade d̄i tando RUMA.
Edempara ru'u kad̄uakalikaina ngoa kasahana b̄a one la Sulaiman mandad̄i sangaji. Kai ngara Ruma, siad̄oho hanta kasahana la Sulaiman ndad̄i sangaji siad̄oho ro la Zadok ma ndad̄i imam. 23 Ndad̄i macepe la Daud, amana ede, la Sulaiman mateka ndad̄i sangaji ra wa'u katantukai b̄a RUMA. Sia sangaji ma ntau hasi ro d̄idahukai b̄a sara'a bangsa Israil . 24 Sara'a dou mana'ekai dana ro rasa ro mana'ekai tentara sampe d̄i ana-ana mone sangaji Daud ma kalai rau namangaku kuasakai la Sulaiman mandad̄i sangaji. 25 RUMA ndawina (kandad̄ina) sara'a ela ro dou d̄ihiadena d̄i sangaji Sulaiman ro kandad̄ina sangaji ma ncewi heba ra d̄i sangaji-sangaji makalai ma parana parenta d̄i Israil .
Carita maporo parentakai sangaji Daud
26 Sangaji Daud ana la Isai maparenta d̄isara'a Israil . 27 Upa mpuru mba'a ntoina. D̄i Hebron sia parentana pidu mba'a ntoina ro d̄i Yerusalem tolu mpuru tolu mba'a ntoina. 28 Sia nantau ro wara ro nakaco'i b̄a dou ro madena d̄i umuna ma wa'ura ipi tua. La Sulaiman ana mone sangaji Daud mandad̄i sangaji macepena sia. 29 Carita mori sangaji Daud ra ai tampu'u sampe cumpukaina wa'ura tunti ade buku Nabi Samuel, Nabi Natan lab̄o Nabi Gad. 30 Ade buku ede nacaritaku mab̄oha parentakai sia, b̄une kuasakai sia ro samenana ma ndad̄i d̄i weki sia, d̄i Israil ro kerajaan-kerajaan d̄i sara'a Israil .