Mai tio b̄a sangaji siwe dana ro rasa Syeba
(1Raj. 10:1-13)
9
Wakatu sangaji siwe dana ro rasa Syeba ringana haba mab̄oha mbou b̄a tahona sangaji Sulaiman. Ndad̄i sangaji siwe ede maina aka Yerusalem d̄iugikaina sangaji Sulaiman kai sod̄i manggonggi. Sia maina lab̄o mboto poda dou malab̄ona (ma d̄endena) ro onta-onta ma wua mboto marakani lo'i, wadu permata, ro mboto poda masa. D̄i wakatu eda angina lab̄o sangaji Sulaiman, sangaji siwe ede mboto poda sod̄ina ma loa d̄ikananu b̄a sia. 2 Sara'a au ra sod̄ina ede naloa cambe b̄a sangaji Sulaiman, wati wara kone sab̄ua rau ra sod̄ina ede ma ipi nggonggi (ncoki) d̄i ru'u b̄a sangaji Sulaiman. 3 Sangaji siwe ede eda b̄a mada ndaina b̄uneku loa ro tingi timba ro lemba sangaji Sulaiman. Sia edana asi ra tu'u b̄a sangaji Sulaiman, 4 cara karawi pagawe-pagawe d̄i asina, ro kani ro lombo ma sama pahu ro uma-uma hid̄i ngge'ekai siad̄oho. Sia edana ngaha ro nono ra ambi, ro kani ro lombo dou-dou makarawi ade ndihakai; sia eda rauna koroba-koroba ra d̄onggo ro mbei b̄a sangaji Sulaiman d̄i Uma RUMA. Sara'ana ede nandawiku mbora aka ro d̄ihi ade sangaji siwe dana ro rasa Syeba ede.5 Ndad̄i nggahira sia d̄i sangaji Sulaiman,<<Samenana ra ringa b̄a mada d̄i dana ro rasaku ede mab̄oha Ita ro tingi ro loa timba ro lemba Ita, napoda romo! 6 Ntoina mada watipu imbiku, pala sawa'u b̄a mada maiku ro eda b̄a mada ndaiku sara'ana ede, ede ampoku imbi poda b̄a mada. Sapodakaina sara'a au ra ringaku ede watipu samana'ena ra d̄i au ra wa'uku eda ake. Tada poda loa ro tingi timba ro lemba Ita ro ntau ro wara Ita do'o ncewi na'e ra d̄i au ra wa'u ngoa b̄a dou d̄i mada. 7 Nawancuku labana pagawe-pagawe ma karawiwea Ita ro makarawi ncau d̄i ru'u b̄a Ita, ndad̄ina siad̄oho na loa ringa b̄a ndaina ra d̄i ndai Ita samenana ngoa ro tei ma loa timba ro lemba! 8 D̄ese Ro Ntasara RUMA, Allah Ta'ala b̄a Ita! Kai hantana Ita mandad̄i sangaji d̄imaparenta kai ngara-Na, Sia teikatadana nawancuku sanana Sia d̄i Ita. B̄ara Sia (RUMA) mameci ro ca'u ela ro dou Israil ro mane'e loakud̄u siad̄oho ngge'e mpa warana, ndad̄i RUMA wa'ura hantana Ita ndad̄i sangaji siad̄oho, loakud̄u Ita loa kakid̄i ro kalampa hukum ro rawi ma'adil.>>
9 Edempara sangaji siwe dana ro rasa Syeba ede, d̄onggona d̄i sangaji Sulaiman hadia-hadia ra wa'ana, eded̄u ncewi (ra d̄i) 4.000 kilogram masa ro mboto poda wadu permata ro marakani lo'i. Watid̄u wara walina sangaji Sulaiman tarimana marakani lo'i ma ipi mboto ro ma ipi taho b̄une ra wa'u mbei b̄a sangaji siwe dana ro rasa Syeba ede.
10 Ro ada-ada sangaji Hiram lab̄o ada-ada sangaji Sulaiman ma wara masa ra d̄i Ofir d̄i ru'u b̄a sangaji Sulaiman, wa'a rauna wadu permata lab̄o haju sandana (cendana). 11 Haju ede kani b̄a sangaji Sulaiman d̄i ru'u ndawikai a'u d̄i Uma RUMA ro d̄i asina, ro d̄indawikai kecapi ro gambo d̄i ru'u b̄a dou-dou marawa. Watipu perna wara ma b̄une ede d̄i dana ro rasa Yehuda.
12 Ari mai b̄a (selasi) hadia-hadia d̄icepekai ra nginakaina d̄imbei b̄a sangaji Sulaiman, sangaji Sulaiman mbei rauna d̄i sangaji siwe ra d̄i dana ro rasa Syeba ede samenana au ra raho b̄a sia. Edempara dulara sangaji siwe ede aka dana ro rasana lab̄a dou-dou ramai lab̄ona (dou-dou ma d̄end̄ena) ede.
Ntau ro wara Sangaji Sulaiman
(1Raj. 10:14-25)
13 Sanikina mba'ana sangaji Sulaiman tarimana ncewikura 23.000 kilogram masa, 14 watipu reke bea-bea ra wa'a b̄a dou-dou ma daga na'e ro dou-dou malanda ro lajo. Sangaji-sangaji Arab lab̄o gubernur-gubernur Israil rau ma mbei masa ro salaka d̄i sangaji Sulaiman. 15 Sangaji Sulaiman ndawina 200 mbua tende ma na'e d̄i horukai weki kai masa ra nded̄e. Masa ra kani d̄i ru'u sanikina tende ede wara ncewikura pidu kilogram. 16 Sia ndawi rauna 300 mbua tende masa ma to'i. Masa ra kani d̄i ru'u sanikina tende ma to'i ede wara kurancewi tolu kilogram, sara'ana ede masa ra nded̄e. tende-tende ede wi'i b̄a sia d̄i balai mangara Balai Hutan Libanon.f
17 Sangaji ndawi rauna sab̄ua kadera sangajikai mana'e ra ndawikai gading (woi gaja) ro kantika kai masa samata (ngganga). 18 Kadera ede ntau rimana ro d̄i b̄alib̄ae rimana ede wara patung singa. Kadera ede rau nantau ini ngana ana a'u, ro sab̄ua hid̄i lamakai ed̄i (wi'ikai ed̄i) ed̄i ede randawi d̄apo lab̄o kaderana. 19 D̄i sanikina sumpu ku'i ro wana ana a'u ede wara patung singa -- sara'ana wara sampuru d̄ua mbua. Watipu perna wara kadera b̄une ede d̄i kerajaan ma kalai.
20 Sara'a tau ro tui d̄inonokai sangaji Sulaiman rau ndawikai masa, ro sara'a tau ro tui d̄i Balai Hutan Libanon rau randawi kai masa samata (masa ngganga). D̄i jaman sangaji Sulaiman, salaka wi'ikai wati ntauna co'i. 21 Sangaji Sulaiman nantau mboto kapa na'e ma loja d̄i moti lembo (moti na'e) sama-sama lab̄o kapa sangaji Hiram. Sakali ade tolu mba'a kapa-kapa ede dula loja, nawa'a masa, salaka, gading, b̄ote lab̄o nasi merak.
22 Sangaji Sulaiman ncewi ntau ro wara ro ncewi loa ro tingi timba ro lemba ntewikaisi sangaji tab̄eb̄e rau d̄i dunia. 23 Sara'a sangaji na'usahaku eda angi lab̄o sangaji Sulaiman d̄ikade'e ro ringakaina ngoa ro tei ma loa timba ro lemba ra mbei b̄a Allah Ta'ala d̄i sia. 24 Siad̄oho maina cua-cua wa'a hadia d̄i ru'u sangaji Sulaiman. Hadiana ede, eded̄u masa, salaka, kani ro lombo, d̄aha ro d̄ano, marakani lo'i, jara ro bagal (keledai). Ndedeku rawi siad̄oho sanikina mba'ana.
25 Sangaji Sulaiman nantau rau 4.000 kanda d̄i ru'u jara lab̄o karetana. Jara d̄ilewakaina wara 12.000 mbua. Sarundena tu'u wi'i b̄a sia d̄i Yerusalem, ro sarunde walina d̄i kota-kota hid̄i deikai musu d̄i ru'u kareta-kareta lewakai. 26 Sia mantau kuasa d̄isara'a sangaji d̄i dana ro rasa ma wara tampu'u d̄i sori Efrat salaho (sampe) aka dana ro rasa Filistin ro aka watas lab̄o Mesir. 27 Ade jaman parentakai sangaji Sulaiman, salaka eded̄u barang ma biasa mpa d̄i Yerusalem, sama b̄une wadu, ro haju cemara (angi) Libanon mboto poda b̄une haju ara makalai. 28 Sangaji Sulaiman naweli (nakalu'u) jara ra d̄i Mesir ro d̄i sanikina dana ro rasa makalai.