Sangaji Asa kakoana bangsa Sudan
14
Sawa'u b̄a made sangaji Abia ro ra umbu d̄i rade sangaji-sangaji d̄i kota Daud, la Asa ana mone sangaji Abia mandad̄i sangaji ma cepe amana. Ade parentakai b̄a sangaji Asa, dana ro rasa Yehuda taho ro sana sampuru mba'a ntoina. 2 Sangaji Asa nakasanaku ade RUMA Allah Ta'ala na kai kalampana rawi ma adil ro ma taho. 3 Sia pakina mezbah-mezbah bangsa makalai ro hid̄i-hid̄i d̄onggo ro mbeikai d̄iberhala. Tugu-tugu (ri'i ma d̄ese ra tu'ukai wadu) dewa d̄ika'iha leli b̄a sia, ro tandi'i-tandi'i patung Dewi Asyera b̄o'o b̄a sia. 4 Ela ro dou Yehuda kau b̄a sia mori b̄atu au ra au ra kane'ekai b̄a RUMA, Allah Ta'ala wa'i ro waro siad̄oho, ro to'akai (kalampa) au ra ngoa ro teikai ro parenta-parenta-Na. 5 Sara'a hid̄i d̄onggo ro mbeikai d̄i ru'u berhala (dewa) ro hid̄i ka'akai d̄upa kalosa paki b̄a sia ra d̄i kota-kota Yehuda. Ndad̄i taho sana ra karajaan ede ade parentakai b̄a sangaji Asa, 6 ndad̄ina sia naloa tu'u kuta-kuta bente d̄i ru'u kota Yehuda. Pila-pila mba'a ntoina wati wara lewa ro laka b̄ara RUMa ma mbei taho ro sana d̄i siad̄oho. 7 Nggahi sangaji Asa d̄i ela ro dou Yehuda, <<Natahopu ndai ka cia kota-kota kai tu'uta kuta tembo heko ro uma-uma d̄ese d̄ijagakai ro tad̄a lawa lab̄o haju-haju wole. Ndai wa'ura kuasakaita dana ro rasa ake, b̄ara ndai wa'ura b̄atuta au ra kane'ekai b̄a RUMA Allah Ta'ala ndaita. Sia majaga ro sandaka ndai ade ka'adaan taho ro sana d̄i sara'a dana ro rasa ndai.>> Ndad̄i tampu'u siad̄oho tu'una ro kanggorina karawi ede. 8 Tentara sangaji Asa 300.000 dou Yehuda ma d̄aha ro d̄anona tende lab̄o b̄uja, ro 280.000 dou Benyamin ma d̄aha d̄anona tende lab̄o fana. Siad̄oho sara'ana eded̄u tentara ma ngau ro disa ra wa'u lati kataho.9 D̄i sab̄ua wakatu sab̄ua dou Sudan ma ngara la Zerah mai deina dana ro rasa Yehuda lab̄o tentara 1.000.000 dou ro 300 mbua kareta lewakai. Siad̄oho lao deina sampe aka Maresa. 10 Ndad̄i losara sangaji Asa mai satando la Zerah, ro dou d̄uana ede cua atona kalompo ndaina d̄i So Zefata d̄eni lab̄o Maresa. 11 Edempara sangaji Asa do'ana d̄i RUMA, Allah Ta'ala na, <<Io RUMA, Ita mpoa mpa ma loa bantu dou ma dawa'u (rome) ra d̄i dou ma tenggo. Tabantu to'ipu madad̄oho wakatu ake, Io RUMA, Allah Ta'ala madad̄oho! D̄i Ita mpa d̄i wi'ikai weki madad̄oho ro kai ngara Ita madad̄oho mai lewa ro laka ao tentara ma ipi mboto ake. Io RUMA, Itaku Allah Ta'ala madad̄oho. Aina co'ota ndai Ita d̄i kakoa b̄a manusia.>>
12 Edempara sangaji Asa lab̄o tentara Yehuda lao deina tentara Sudan. RUMA kakoana tentara Sudan ndad̄ina siad̄oho lao rai dahu. 13-14 Sangaji Asa lab̄o tentarana fou b̄atuna siad̄oho sampe aka Gerar. Ade weki tentara Sudan mboto ma made ndad̄ina tentarana ede watid̄u loana au-au b̄ara ka'iha leli b̄a RUMA ro tentara Yehuda ma weha rampa rau mboto poda barang-barang siad̄oho (tentara Sudan). Edempara tentara Yehuda ka'ihana kota-kota d̄i dana ro rasa kompe ro pei Gerar, b̄ara RUMA ndawina/kandad̄ina ela ro dou kota-kota ede dahu poda. Tentara Yehuda weha rampa sara'ana au ma wara d̄i sara'a kota ede ro rakana mboto poda barang. 15 Siad̄oho dei rauna kemakai dou-dou mantadi binata, ro weha wa'ana mboto jimba ro onta. Sawa'u b̄a ede siad̄oho dula mbali aka Yerusalem.