Sangaji Asa kalampana rawi mab̄ou
15
Ruh Allah makuasakai Nabi Azarya ana la Oded, 2 ndad̄ina sia lao eda angina lab̄o sangaji Asa, ro nggahi sia, <<Oe sangaji Asa, ro sara'a ela ro dou Yehuda ro dou Benyamin! Ringa ro kade'epu! RUMA nad̄eni lab̄o nggomid̄oho nggara nggomid̄oho nad̄enisi lab̄o Sia. Nggara nggomid̄oho marahosi ngoa ro tei kataho d̄i RUMA, Sia d̄imambeina. Pala nggara nggomid̄oho masakontusi (watisi kandad̄i aumu) Sia, Sia rau wati tiona (kandad̄i auna) nggomid̄oho. 3 Ntoi poda dou-dou Israil wati sambea ro ibadana d̄i Allah Ta'ala ma rakandad̄i dunia lab̄o isina, wati ntauna hukum-hukum ma pab̄ua d̄ito'akai (d̄ikalampa), ro wati ntauna imam-iman ma tei siad̄oho. 4 Pala wakatu siad̄oho ade sura ro darura, siad̄oho naraho bantu d̄i RUMA, Allah Ta'ala Israil . Siad̄oho naraho ngoa ro tei d̄i RUMA ro Sia nambeiku au ra raho b̄a siad̄oho. 5 D̄i jaman ede dou wati loana lao ro mai (lampa ro lao) kai salama, b̄a one d̄isanikina dana ro rasa wara ngango ro ngora ma na'e. 6 Bangsa ma sab̄ua nakasusa ro ncokiku bangsa makalai, b̄ara Allah Ta'ala makamaina ngango ro ngora ma na'e d̄i siad̄oho. 7 Pala nggomid̄oho pab̄uapu katenggo ademu, aina dahu, b̄ara usaha nggomid̄oho d̄imantau hasi.>>8 Wakatu sangaki Asa ringana au ra ngoa b̄a RUMA, ra renta b̄a nabi Azarya ana la Aded ede, sia kapoda adena ro pakina sara'a berhala (dewa-dewa) d̄i dana ro rasa Yehuda ro Benyamin, ro d̄i kota-kots ra wa'u kakoa ro kuasakaina d̄i doro-doro Efraim, Edempara sia katahona mezbah RUMA ma wara d̄i sarei Uma RUMA.
9 Mboto dou Efraim, Manasye, lab̄o dou Simeon mai kasab̄ua weki lab̄o sangaji Asa, ro nangge'e d̄i dana ro rasa kerajaan sia, b̄ara siad̄oho na'edaku b̄a one RUMA mabantu sia. Sangaji Asa kauna sara'a dou ede sama-sama lab̄o ela ro dou Yehuda lab̄o Benyamin. 10 kab̄oro weki d̄i Yerusalem. Ndad̄i siad̄oho kab̄orona weki d̄i wura tolu ade mba'ana kasampuru limakaina wakatu parentakai b̄a sangaji Asa. 11 D̄i ainaina ede siad̄oho d̄onggo ro mbeina d̄i ru'u b̄a RUMA 700 mbua capi ro 70.000 mbua jimba, nasi ra weha rampana ade lewa ro laka ra wa'a dula b̄a siad̄oho. 12 Siad̄oho sakena d̄i RUMA b̄a one kai sab̄ini b̄a ade ro nawana siad̄oho d̄imamori b̄atu au ra kane'ekai b̄a RUMA, Allah Ta'ala wa'i ro waro siad̄oho. 13 Cou-cou rau, nataho ma tua atau ma to'i, ma mone atao ma siwe, ma mori wati b̄atu au ra kane'ekai b̄a RUMA, tantu d̄i hukum made. 14 Kai eli mana'e siad̄oho sumpana d̄i RUMA, b̄a one siad̄oho d̄imanenti au wa'u sakena ede. Edempara siad̄oho kanggica kad̄ihi ade ro ufina tarompe ro sangkakala. 15 Sara'a ela ro dou Yehuda kad̄ihi ade b̄ara siad̄oho wa'ura ndawina sumpa ede kai sab̄ini adena. Siad̄oho sana adena sambea ro ibada d̄i RUMA, ro RUMA rau naca'u tarima siad̄oho. RUMA ma mbeina d̄i siad̄oho kaada'an ma taho ro sana d̄i dana ro rasa siad̄oho.
16 Sawa'u b̄a ede sangaji Asa kadenggana b̄ora inawa'ina (ina ntuana) ma ngara Maakha ra d̄i b̄ora ndad̄i ina b̄a ruma sangaji b̄ara inawa'ina (ina ntuana) ede wa'ura ndawina patung berhala ma d̄ini'ikai ade (ma ponco) d̄i ru'u Asyera, dewi howo ro ngawakai ntadi (nggud̄a ro ncongge). Sangaji Asa d̄umbana ro ka'iha leli sara'ana patung ede, edempara lao ka'ana aka so Kidron. 17 Konena wati sara'a hid̄i berhalakai d̄i dana ro rasa ede ka'iha leli b̄a sangaji Asa, pala sia ngge'e mpa to'ana d̄i RUMA santoi morina. 18 Sara'a masa ro salaka ro barang-barang ma kalai hasil ro weha rampa ade lewa ro laka ntau amana ro ntau ndaina wa'a b̄a sia aka Uma RUMA d̄i ru'u b̄a RUMA.
19 Sampe d̄i mba'a katolu mpuru lima kaina ade wakatu parentakai sangaji Asa watid̄u perna wali wara lewa ro laka d̄i dana ro rasa ede.