Lewa lab̄o Israil
16
D̄i mba'ana makatolumpuru ini ade parentakai sangaji Asa d̄i Yehuda, la Baesa sangaji Israil lao deina (lewana) Yehuda, ro nakatenggoku kota Rama d̄ib̄ontokaina ncai losa lu'u dou Yehuda 2 Ndad̄i sangaji Asa wehana masa ro salaka d̄i hid̄i wi'ikai ntau ro wara Uma RUMA ro asi sangaji, edempara nggaduna aka Damsyik d̄i Benhadad sangaji Siria kai nggahi ake, 3 <<Maira ndai tandawiku/takasobaku angi b̄une ra wa'u karawi b̄a doumatua ndaita. Ake mada manggadu masa ro salaka d̄i ru'u ita ro marece ita kakompo hubungan lab̄o la Baesa sangaji Israil , loakud̄u sia rab̄i mbalina tentarana aka dana ro rasa mada.>>4 Sangaji Benhadad nangawa tarima au ra raho b̄a sangaji Asa ede, edempara kauna perwira-perwira lab̄o tentara siad̄oho dei ro lewa kota-kota Israil . Siad̄oho kakoa ro kuasakaina kota Iyon, Dan, Abel-Bet, Maakha ro sara'a kota ra wi'i kai osu d̄i Naftali. 5 Wakatu sangaji Baesa ringana lampa rawi ede, sia dengga lalona katenggo (bantu) kota Rama ro tu'u wi'ina kota ede. 6 Edempara sangaji Asa ou kab̄orona dou-dou ra d̄i sara'a Yehuda d̄imalao weha wadu ro haju ra kani b̄a sangaji Baesa d̄i Rama d̄i ru'u katenggo ro kaciakai kota ede. Wadu ro haju ra lao weha ede kani b̄a sangaji Asa d̄i ru'u katenggo ro kaciakai kota Geba ro kota Mizpa.
Nabi Hanani
7 D̄i wakatu ede Nabi Hanani mai d̄i sangaji Asa ro nggahina, <<B̄ara nggomi wi'i weki d̄i sangaji Siria, ro lain d̄i RUMA Allah Ta'alamu, ndad̄i nggomi wa'ura mbora wakatumu (watid̄u wara wakatumu) d̄i kakoakaimu tentara sangaji Israil .j 8 Sab̄ua wati kawara b̄a nggomi, dou Sudan lab̄o Libia nantau mboto poda tentara lab̄o mboto kareta lewakai ro tentara ma nente jara? Kone ade ndedekaina RUMA mbeina ngolu d̄i nggomid̄oho, b̄ara nggomi wi'i weki d̄i Sia. 9 RUMA matio ro ntandana sara'a dunia d̄imbeikaina tenggo-Na d̄i ru'u b̄a dou-dou mato'a d̄i Sia. Nggomi wa'ura ncara rawimu, b̄ara ndedena tampu'u ake nggomi d̄imalu'u ncau lewa ro laka.>> 10 Nggahi ro eli Nabi Hanani ede nakamaiku ipi mbani sangaji Asa, ndad̄ina sia kalu'una nabi ede ade bui. D̄i wakatu ede rau sangaji Asa kasusa ro kancokina pila-pila dou ra d̄i ela ro douna.
Nggorira Parentakai Sangaji Asa
11 Sara'a au mandad̄i ade parentakai sangaji asa ratampu'u ai saramba sampe cumpukaina wa'ura tunti ade buku sejarah sangaji-sangaji Yehuda ro Israil . 12 D̄i mba'ana katolumpuru ciwikaina ade parentakaina sangaji Asa b̄oha b̄a supu matani; Kone ade ndedekaina sangaji Asa wati raho bantu d̄i RUMA, pala sia naraho bantu d̄i sando-sando (dokter). 13 D̄ua mba'a sawa'u b̄a ed̄e sangaji Asa made. 14 Timbana bore b̄a dou kai marakani lo'i ro mamengi-mengi, edempara sangaji Asa umbu b̄a dou aka rade sangaji-sangaji d̄i kota Daud. Ro d̄ihoromakai sangaji Asa, ela ro dou kana'ena afi udu (unggun) ma ipi nae.