La Yosafat mandad̄i sangaji
17
La Yosafat mandad̄i sangaji Yehuda macepe sangaji Asa ama b̄a sia, ro sia kab̄orona tentarana d̄i aokaina Israil . 2 Sia tohona tentarana ede d̄i sara'a kota mantau b̄ente d̄i Yehuda, ro d̄i dana ro rasa ari mai b̄a Yehuda, ro d̄i kota-kota ra wa'a kuasakai b̄a amana d̄i dana Efraim. 3 RUMA barekana la Yosafat b̄ara sia nab̄atuku rawi amana; Sia wati nembana Baal, 4 pala nanemba/sambea ro ibada d̄i Allah Ta'ala, ro morina wati b̄une sangaji-sangaji Israil . 5 B̄ara ndedena RUMA mbeina d̄i la Yosafat b̄ora ma tenggo ndad̄i sangaji Yehuda. Sara'a ela ro dou mambei hadiah-hadiah d̄i ru'u sia ro sia ndad̄i ntau ro wara ro nawancuku kaco'i b̄a dou. 6 Kai tenggo poda adena sia kalampana/to'akaina parenta RUMA ro ka'iha lelina sara'a hid̄i nembakai berhala ro patung-patung Dewi Asyera d̄i Yehuda.7 D̄i mba'a katolukai ade parentakaina, sangaji Yosafat kakaina dou-dou mana'e b̄ora d̄imateina hukum-hukum RUMA d̄i kota-kota Yehuda. Siad̄oho rakakai ede, eded̄u la Benhail, Obaja, Zakharia, Netaneel lab̄o la Mikha. 8 Siad̄oho lao lab̄ona ciwi dou Lewi lab̄o d̄ua dou imam. Dou-dou Lewi ede, eded̄u la Semaya, Netanya, Zebaja, Asael, Semiramot, Yonatan, Adonia, Tobia, lab̄o la Tob-Adonia. Ro d̄ua dou imam ede, eded̄u la Elisama lab̄o la Yoram. 9 Siad̄oho wa'ana buku/Kitab Hukum-hukum RUMA lao lampa kalilina d̄i sara'a kota Yehuda ro ngoa ro teina ela ro dou ta aka.
Na'e/Tenggona Kuasa Sangaji Yosafat
10 RUMA ndawina sara'a kerajaan d̄i kompe ro pei Yehuda nadahu lewa ao sangaji Yosafat. 11 Ra d̄i dou Filistin sia tarimana mboto salaka ro hadiah-hadiah makalai, ra d̄i dou-dou Arab sia tarimana 7.700 mbua jimba rangga ro 7.700 mbua mbe'e rangga. 12 Ndedeku sangaji Yosafat naha ntoina naha na'e kuasana. D̄i sara'a Yehuda sia tu'una b̄ente-b̄ente ro kota-kota d̄iwi'ikai osu. 13 Sia wi'i uduna osu ma mboto d̄i kota-kota ede.
D̄i Yerusalem sia tohona prwira-perwira ma tenggo ro ngau, 14 cua-cua lab̄o tentara londo ro maina. La Adna eded̄u panglima tentara ra d̄i londo ro mai Yehuda. Sia dou mana'ekai 300.000 dou tentara. 15 Kad̄uakaina eded̄u la Yohanan; sia dou mana'ekai 280.000 dou tentara. 16 Katolukaina eded̄u la Amasia ana b̄a la Zikhri; sia dou mana'ekai 200.000 dou tentara. La Amasia eded̄u dou sukarelawan (dou mone mane'e ndaina) ma karawi d̄i ru'u b̄a RUMA. 17 Panglima tentara ra d̄i londo ro mai ade suku Benyamin eded̄u la Elyada, sab̄ua dou mangau lewa mana'e kente. Sia ede eded̄u dou mana'ekai 200.000 dou tentara makani d̄aha fana ro tende. 18 Dou kad̄uakaina ade kalompo tentara ake eded̄u la Yosabad; Sia ede eded̄u dou mana'ekai 180.000 dou tentara ma kani d̄aha ro d̄ano. 19 Siad̄oho edeku makalampa taki d̄i Yerusalem. Selasi/arimai b̄a siad̄oho ede, sangaji tohona kalompo tentara-tentara makalai d̄i b̄ente-b̄ente dana Yehuda.