Nabi Mikha ngoa ro tei katerana d̄i sangaji Ahab
(1Raj. 22:1-28)
18
Wakatu la Yosafat sangaji Yehuda wa'ura ntau ro wara ro ipi mbou, sia kanikana sab̄ua dou ade iwa ro wekina lab̄o sab̄ua dou ade iwa ro weki la Ahab sangaji Israil . 2 Pila-pila mba'a sawa'u b̄a ede sangaji Yosafat lao lambana sangaji Ahab aka kota Samaria. D̄i ru'u lia ro horomakai (kaco'ikai) sangaji Yosafat lab̄o dou-dou malab̄ona, sangaji Ahab katu'una ndiha ro kauna dou sambele mboto jimba ro capi. D̄i wakatu ede sia recena sangaji Yosafat d̄imalao dei kota Ramot d̄i Gilead. 3 Sod̄i b̄a sia, <<Sab̄ua mane'e ndaimu lao lab̄o ndaiku (nahu) dei kota Ramot?>>Cambe b̄a sangaji Yosafat, <<Taho, tentara ndaiku d̄imakasama (kasab̄ua) weki lab̄o tentara ndaimu. Ndaima malewa sama-sama. 4 Pala natahopu ndai tasod̄i wa'u d̄i RUMA.>>
5 Ndad̄i sangaji Ahab kab̄orona takasi 400 dou nabi, edempara sod̄ina d̄i siad̄oho (nabi-nabi) ede, <<Sab̄ua loa nahu lao dei ro lewa kota Ramot atau wati?>>
Cambe b̄a siad̄oho, <<Loa! Allah Ta'ala d̄imad̄onggona kota ede d̄i Ita ruma sangaji.>>
6 Pala sangaji Yosafat sod̄i walina, <<Sab̄ua ta ake watid̄u wara wali nabi makalai ma loa sod̄i d̄i RUMA d̄i ru'u b̄a ndaita?>>
7 Cambe b̄a sangaji Ahab, <<Mbuipu wara sab̄ua dou eded̄u la Mikha ana la Yimla. Pala ndai (nahu) watu ca'uku (fa'a adeku) d̄i sia, b̄a one sia watipu iuna (perna) ramal/moke wea au matahoi d̄i ru'u b̄a ndaiku (nahu); pala rawi ma iha ncau mpa.>>
<<Aina nggahi kandede!>> Cambe b̄a sangaji Yosafat.
8 Ndad̄i sangaji Ahab ouna sab̄ua dou pagawe asina, edempara kauna dou ede lao roci-roci weha ao la Mikha.
9 D̄i wakatu ede sangaji Ahab lab̄o sangaji Yosafat, kai kanina kani ro lombo tanda sangaji kaina, doho d̄i kadera kerajaan (sangajikaina) d̄i hid̄i kahorokai gando d̄i tando tad̄a lawa (na'e) kota Samaria, ro nabi-nabi ede mai satando ro karongga au ra moke b̄a siad̄oho. 10 Sab̄ua dou ade weki nabi-nabi ede, ma ngara la Zadekia ana b̄a la Kanaana, ndawina wanga-wanga b̄esi edempara nggahina d̄i sangaji Ahab, <<Akeku ra nggahi b̄a RUMA, <Kai wanga-wanga b̄une ake Ita RUMA sangaji d̄imab̄oe d̄imab̄oe Siria ro kalelo siad̄oho.>> 11 Sara'a nabi makalai ka'iona ro nggahina, <<Deipu Ramot, ita ruma sangaji d̄imangolu (ntau hasi). RUMA d̄imambei ngolu d̄i ita ruma sangaji.>>
12 Wakatu ede rau dou rakakai lao weha ao la Mikha, nggahina d̄i la Mikha, <<Sara'a nabi makalai namoke ro sarafiku ngolukai d̄i ru'u b̄a sangaji. Raho to'i mpa ita rau mamoke ro sarafimu ma taho b̄une siad̄oho.>>
13 Pala cambe b̄a la Mikha, <<Kai ngara RUMA ma mori, nahu loa nggahi au ra nggahi b̄a Allah Ta'ala d̄i nahu mpa!>>
14 Sawa'u b̄a rongga la Mikha d̄i tando sangaji Ahab, sod̄i b̄a sangaji, <<Sab̄ua loa nahu lab̄o sangaji Yosafat lao dei kota Ramot atau wati?>>
Cambe b̄a la Mikha, <<Talao dei mpa, tantau ita ruma sangaji d̄imantau hasi. RUMA d̄imambei ngolu d̄i ita ruma sangaji.>>
15 Nggahi sangaji Ahab,<<Nggara nggomi nuntumu d̄i nahu kai ngara RUMA, nggahipu ma poda. Pila kaliku pab̄ua d̄ingoa ro kawara b̄a nahu d̄i nggomi mab̄oha lampa rawi ede?>>
16 Cambe b̄a la Mikha, <<Mada edaku tentara Israil mbari mbura d̄i doro-doro. Siad̄oho b̄une jimba ma wati wara dou ma ompukaina, ro nggahi RUMA mab̄oha siad̄oho, <Dou-dou ake wati wara dou mana'ekaina. Co'opu siad̄oho dula kai salama.> >>
17 Edempara nggahi sangaji Ahab d̄i sangaji Yosafat, <<Sab̄ua wati ncihina nggahi ndaiku (nahu) ? Wati perna sia moke ro sarofina ma taho d̄i ru'u b̄a nahu (ndaiku)! Na mokeku ma'iha ncau!>>
18 Nggahi la Mikha wali, <<Ake takade'epu au ra nggahi b̄a RUMA! Mada edaku RUMA ma doho d̄i kadera-Na d̄i saroga, ro sara'a mala'eka-Na ma kid̄i d̄i kompe-Na. 19 Nggahira RUMA, <Cou d̄imasiwi la Ahab loakud̄u sia nangawa lao lewa ro made aka Ramot d̄i Gilead?> Cambe b̄a mala'eka-mala'eka ede cua lai. 20 Cumpukaina mai lu'ura sab̄ua ruh. Sia mairakana RUMA ro nggahina, <Mada d̄imalao siwi sia.> Nggahi RUMA, <B̄uneku carana?> 21 Cambe b̄a ruh ede, <Mada d̄imaloa ro ndawi sara'a nabi la Ahab nuntu/nggahi cowa.> Nggahira RUMA, <Taho, karawipu ede, nggomi d̄imawa'a siwi sia.> >>
22 Nggahi wali la Mikha, <<Edeku ma wa'ura ndad̄i! B̄a one RUMA wa'ura kandad̄ina/ndawina nabi-nabi ita ruma sangaji nuntu/nggahi cowa d̄i ita, sapodakaina RUMA wa'ura katantuna d̄imakamai bala d̄i ru'u b̄a ita!>>
23 Ndad̄i lu'ura Nabi Zedekia lao rakana la Mikha edempara topana pahu la Mikha ro nggahi sia, <<Wati lu'u b̄a aka Ruh RUMA tu'u wi'ina nahu ro nuntuna d̄i nggomi!>>
24 Cambe b̄a la Mikha, <<Pea nggomi d̄ima'eda buktina (b̄a ndaimu) d̄i wakatu nggomi lu'umu ade sab̄ua b̄ili d̄i cilikaimu weki!>>
25 Edempara nggahi sangaji Ahab, <<Wa'upu la Mikha wa'a mbalipu sia aka la Amon, mana'ekai kota ro d̄i la Yoas ana mone sangaji, 26 ro nggahipu ndake parenta sangaji: Kalu'upu dou ake ade bui ro mbei pu ngaha ro nono sato'i d̄i sia sampe nahu poku/dula mbali kai salama.>>
27 Pala nggahi la Mikha, <<Nggara poda-poda ita poku/dula mbali kai salama, ede aona RUMA wati nggahina kaincai mada. Sara'a dou ma wara ta ake mandad̄i sakasina.>>
Made Sangaji Ahab
(1Raj. 22:29-35)
28 Sawa'u b̄a ede la Ahab sangaji Israil lab̄o la Yosafat sangaji Yehuda lao deina kota Ramot d̄i Gilead. 29 Nggahi sangaji Ahab d̄i sangaji Yosafat, <<Ndaiku (nahu) d̄imakani b̄aju/kani ro lombo makalai ro lu'u b̄atu lewa, pala ndaimu (nggomi) pab̄uapu kanimu kani ro lombo sangajikaimu.>> Ndedeku sangaji Israil cepena/kanina kani ro lombo makalai wakatu lao lewana. 30 D̄i wakatu ede panglima-panglima tentara kareta lewakai Siria wa'ura parenta b̄a sangajina d̄imadei sangaji Israil mpa. 31 Ndad̄i, wakatu siad̄oho edana sangaji Yosafat, nggahi siad̄oho, <<Akaku sangaji Israil ! Edempara siad̄oho dei hekona sia, pala kanggica sangaji Yosafat ro RUMA, Allah Ta'ala bantuna sia ro wa'ana tentara ma dei ede d̄i ao makalai. 32 Wakatu panglima-panglima tentara kereta lewakai Siria b̄adena b̄a one sia ede laina sangaji Israil , ndad̄i siad̄oho denggana dei sia. 33 Pala sab̄ua dou tentara Siria co'ona ana fanana kai wati ra katantuna cou d̄i fanana ro ana fanana ede b̄ohana sangaji Ahab ta ao hela kandapokai b̄aju lewakai ede. Nggahi sangaji Ahab d̄i dou ma wa'a karetana, <<Wa'ura b̄oha nahu, kapoku kareta ro wa'a kalosapu nahu ade lewa ro laka ake!>> 34 Pala, b̄ara lewa ro laka mbuipu panana, sangaji Ahab ngge'e mpa kid̄i santengina ade karetana satando angi lab̄o tentara Siria. D̄i wakatu nci'i liro sia madena.