La Ahazia Sangaji Yehuda
22
Ade sab̄ua wakatu mai dei b̄a sakalompo dou Arab, Sara'a ana mone sangaji Yehoram selasi la Ahazia wa'ura hade b̄a dou. B̄ara ndedena dou-dou (ela ro dou) Yerusalem hantana la Ahazia mandad̄i sangaji macepe amana. 2-3 La Ahazia ndad̄ina sangaji wakatu umuna d̄ua mpuru d̄ua mba'a,k ro sia parentana d̄i Yerusalem salama samba'a. Sangaji Ahazia cara morina nab̄atuku b̄une cara mori iwa ro weki sangaji Ahab, b̄ara la Atalya inana ede nangoa ro teiku sia kau kalampa ma dab̄ae. La Atalya eded̄u ana siwe sangaji Ahab, ompu b̄a la Omri sangaji Israil . 4 Sangaji Ahazia wa'ura karawina dosa d̄i RUMA, b̄une iwa ro weki sangaji Ahab, b̄ara siad̄oho edeku dou mataki ngoa ro tei sia sawa'u b̄a made amana. Dou-dou mataki ngoa ro tei edeku ma kamaina iha sia 5 Kai ngoa ro tei b̄a siad̄oho, sangaji Ahazia kasama weki lab̄o la Yoram sangaji Israil d̄imalewa lab̄o la Hazael sangaji Siria. Siad̄oho lewana (dei angina) d̄i Ramot, dana Gilead. Sangaji Yoram nancuwu ade lewa ro laka ede, 6 edempara sia dula mbali aka kota Yizreel d̄i lo'i kataho, ro sangaji Ahazia lao lambana sia ta aka.Sangaji Ahazia hade b̄a La Yehu
7 Allah Ta'ala wa'ura katantukaina b̄a one sangaji ahazia d̄imamade wakatu sia lao lambana sangaji Yoram. D̄i wakatu lamba angina ede, sangaji Ahazia lab̄o sangaji Yoram mai dei b̄a sab̄ua dou mone ma ngara la Yehu ana b̄a la Nimsi, dou mone ede (la Nimsi) ede wa'ura kad̄ale b̄a RUMA d̄imahade kampoi iwa ro weki (ana-ana ro wei) sangaji Ahab. 8 La Yehu wunga kalampana hukuman (parenta) RUMA d̄i ru'u b̄a iwa ro weki (ana ro wei) sangaji Ahab ede, sia eda angina lab̄o sakalompo na'e dou-dou mana'ekai Yehuda ro ana-ana tatoi sangaji Ahazia ma b̄atu ade lao lamba angi ede. Ndad̄i la Yehu hade sara'ana siad̄oho. 9 Edempara sia kauna dou lao ngupa sangaji Ahazia ma d̄i wakatu ede wunga cilina weki d̄i Samaria. Sawa'u b̄a sangaji Ahazia raka rumpa b̄a dou, sia mai wa'a b̄a dou d̄i la Yehu, edempara sia hade b̄a dou.
Kone ade ndedekaina sia umbu rau b̄a siad̄oho, b̄ara siad̄oho nakaco'iku (nalia ro horomaku) sangaji Yosafat, ama ompu b̄a sangaji Ahazia ma sambea ro ibada d̄i RUMA kai samore adena. Ade iwa ro weki sangaji Ahazia wati wara ma wa'u parenta/ndad̄i sangaji.
La Atalya Sangaji Siwe Yehuda
(2Raj. 11:1-3)
10 Wakatu la Atalya b̄adena b̄a one sangaji Ahazia anana ede nawa'ura made, sia parentana (kauna) dou loakud̄u sara'a iwa ro weki sangaji Yehuda d̄i hade (kampoi). 11 Sangaji Ahazia nantau sab̄ua dou amancawana ma ngara la Yoseba ma nika lab̄o sab̄ua dou imam na'e ma ngarana la Yoyada. Kai midi-midi la Yoseba wehana sab̄ua dou ana mone sangaji Ahazia, ngara anana ede la Yoas ade weki ana-ana sangaji ma ne'e d̄i hade b̄a la Atalya. Ana dou ede lab̄o ina loruna cili b̄a dou ade sab̄ua b̄ili d̄i Uma RUMA. Ndedeku la Yoseba kasalamana ana dou ede ndad̄ina wati raka hade b̄a la Atalya. 12 Ini mba'a ntoina la Yoas cili b̄a dou ade Uma RUMA ro wakatu ede la Atalya maparenta ndad̄i sangaji siwe.