Baronta aokai la Atalya (sangaji siwe)
(2Raj. 11:4-16)
23
D̄i mba'ana kapidukai Imam Yoyada wehana nggahi sumpakai d̄i ru'u kalampakaina. Kasab̄ua nggahi (mafaka) lab̄o lima dou perwira, eded̄u la Azarya ana la Yeroham, la Ismael ana la Yohanan, la Azarya ana la Obed, Maaseya ana la Adaya, lab̄o la Elisafat ana la Zikhri. 2 Siad̄oho laona aka sara'a kota d̄i Yehuda, ro kab̄orona dou-dou Lewi ro sara'a mana'ekaina londo ro mai, edempara wa'ana siad̄oho aka Yerusalem.3 Siad̄oho kab̄orona weki d̄i Uma RUMA, ro ndawina sake lab̄o la Yoas ana mone sangaji ede. Nggahi la Yoyada d̄i siad̄oho, <<Akeku ana mone ra tu'u wi'i b̄a sangaji Ahazia! Sia ake pab̄uaku ndad̄ina sangaji, b̄ara RUMA wa'ura sakena b̄a one londo ro mai sangaji Daud d̄imangge'e mpa ndad̄i sangaji. 4 Akeku mapab̄ua d̄ikarawi b̄a ndaita: Nggara imam-imam ro dou Lewi nawa'usi nggori kalampana takina d̄i ainaina Sabat, siad̄oho wati loana dula aka umana, sakalompo ade ra cengga tolu siad̄oho ede pab̄uaku b̄atuna jaga d̄i tad̄a-tad̄a na'e Uma RUMA, 5 sakalompo d̄i asi sangaji, ro sakalompo wali ma jaga d̄i tad̄a lawa na'e sarambakaina. Sara'a ela ro dou pab̄uaku kab̄orona weki d̄i sarei Uma RUMA. 6 Wati wara kone sab̄ua dou rau ma loa lu'u ade Uma RUMA, selasi (ari mai b̄a) imam-imam lab̄o dou Lewi ma wunga kalampa takina. Siad̄oho naloa lu'u b̄ara siad̄oho wa'ura kad̄ale kalai d̄i ru'u b̄a RUMA. Pala dou-dou makalai pab̄uaku to'akaina atoran RUMA (wati loana lu'u ade Uma RUMA). 7 Dou-dou Lewi pab̄uaku kid̄i hekona sangaji lab̄o peda ra wa'u olo d̄i lapina, ro d̄ende sia tab̄era laokai sia. Cou-cou ma ne'e pab̄ua lu'u ade Uma RUMA, dou ede pab̄uaku d̄ihade.
8 Parenta la Yoyada ede kalampa (to'akai) b̄a dou-dou Lewi ro ela ro dou Yehuda. Dou-dou ma wa'ura nggori kalampa takina d̄i ainaina Sabat wati d̄ikau dula aka umana. Ndad̄i perwira-perwira naloa kamando nataho dou-dou ma wa'ura nggori kalampa takina ro dou-dou ma b̄oupu mai d̄imakalampa takina. 9 D̄i perwira-perwira ede la Yoyada mbeina b̄uja lab̄o tende ntau ndai sangaji Daud ra wi'i d̄i Uma RUMA. 10 La Yoyada toho rauna dou-dou lab̄o peda wa'a ncauna ra wa'u olo d̄i lapina d̄i wela tando Uma RUMA, doud̄oho ede d̄imajaga ro sandaka sangaji. 11 Sawa'u b̄a ede la Yoyada wa'a kalosana la Yoas, edempara tohona songko sangaji d̄i tuta la Yoas, ro d̄onggona buku Hukum Allah d̄i sia. Ndedeku la Yoas ra hanta kasaha ndad̄i sangaji. Sawa'u b̄a ede la Yoyada lab̄o anad̄ohona luakaina mina upacara tuha ro lanti d̄i la Yoas, edempara sara'a ela ro dou ma nggahi kana'e "Mori Sangaji (hidup raja)!"
12 La Atalya rakana ringa ela ro dou makanggica kad̄ese ro ntasa sangaji. Edempara roci-rociku sia laona aka Uma RUMA d̄i hid̄i mboto kahumbukai dou. 13 Sia edana sangaji ma b̄ou ede wunga kid̄ina tad̄a lu'ukai Uma RUMA, d̄i hid̄i tuha ro lantikai sia, heko b̄a perwira-perwira ro ma ufi tarompe. Sara'a ela ro dou kanggica kad̄ihi ade ro ufi salahona tarompe, ro dou-dou mataki ufi tarompe ma naru d̄i Uma RUMA b̄atu kandihana, ainaina ndiha ede kai alat-alat musik siad̄oho. Ndad̄i kai darura adena la Atalya sipana kani ro lombona ro kanggicana, <<Hiana! Hiana!>>
14 La Yoyada wati kauna hade la Atalya d̄i kompe ro pei Uma RUMA, ndad̄i nggahi sia d̄i perwira-perwira, <<Wa'a kalosapu sia d̄i barisan dou-dou ma jaga, ro hadepu cou-cou rau mane'e horu kasalama sia.>>
15 Perwira-perwira ede wa'una la Atalya, edempara lao wa'ana aka asi. Ta aka sia hade b̄a dou d̄i Tad̄a Lawa Jara.
La Yoyada Kalampana Mab̄ou
(2Raj. 11:17-20)
16 Imam Yoyada recena sangaji Yoas lab̄o ela ro dou sama-sama lab̄o sia ndawi sake b̄a one siad̄oho d̄imandad̄i ela RUMA. 17 Sawa'u b̄a ede siad̄oho sara'a lao deina ro d̄umbana Kuil Baal. Mezbah ro patung-patung ma wara ka'ihaleli b̄a siad̄oho, ro la Matan, Imam Baal hade b̄a siad̄oho d̄i tando mezbah-mezbah ede. 18 Edempara la Yoyada mbeina taki ro puta d̄i imam-imam ro d̄i dou Lewi d̄ima'uru (kab̄ua) Uma RUMA b̄une ra wa'u bagekai b̄a sangaji Daud. Siad̄oho pab̄uaku d̄imad̄onggo ro mbeina koroba ka'a d̄i ru'u RUMA -- sama b̄une hukum-hukum Taurat Musa -- kai kandiha ro rawa roi ro wadi b̄une ra wa'u ato b̄a sangaji Daud. 19 Ro d̄i tad̄a-tad̄a lawa na'e Uma RUMA, la Yoyada tohona dou majaga, d̄imajaga loakud̄u dou ma wati patu nemba RUMA (dou ma najis) aina lu'u.
20 Perwira-perwira, dou-dou matuakai ade ela ro dou, mana'e b̄ora ade pamarenta, ro sara'a ela ro dou lao b̄atu la Yoyada lao d̄ende kandiha sangaji Yoas tampu'u d̄i Uma RUMA lao aka asi sangaji. Siad̄oho lu'u ta tad̄a lawa ma penti (ma ese) edempara sangaji doho d̄i kadera sangaji kaina. 21 Sara'a ela ro dou neo adena, keadaan kota rau taho ro sana, ro la Atalya wa'ura hade b̄a dou.