La Yoas Sangaji Yehuda
(2Raj. 12:1-16)
24
La Yoas umuna pidu mba'a wakatu sia ndad̄ina sangaji Yehuda, ro sia parentana d̄i Yerusalem upa mpuru mba'a ntoina. Ina la Yoas ngarana la Zibya ra d̄i kota Bersyeba. 2 Santoi Imam Yoyada mbuipu morina, sangaji Yoas kalampana lampa rawi-lampa rawi makasana wea ade RUMA. 3 La Yoyada kad̄ale weana d̄ua dou siwe d̄i ru'u ndad̄i wei sangaji Yoas, ra d̄i wei-weina ede sangaji Yoas rakana ana-ana mone ro ana siwe.4 Sawa'u b̄a parentana pila-pila wakatu ntoina sangaji Yoas nane'e kataho Uma RUMA. 5 Imam-imam ro dou Lewi parenta b̄a sia d̄imalao aka ela ro dou d̄i kota-kota d̄i dana Yehuda ro kab̄oro piti d̄i sara'a ela ro dou d̄i ru'u katahokai Uma RUMA saniki mba'ana. Sia kauna siad̄oho roci kalampa taki ro putana ede, pala dou-dou Lewi nakamanggiku wekina. 6 B̄ara ndedena sia ouna Imam Yoyada, mana'ekai siad̄oho edempara nggahina, <<Sab̄ua wati kawaramu, la Musa ada RUMA ede wa'ura kauna ela ro dou cola bea d̄i ru'u kab̄uakai Kemah RUMA? Ake, b̄ab̄auku dou-dou Lewi ede wati kau pab̄ua b̄a Ita d̄imakab̄oro bea ra d̄i ela ro dou d̄i Yehuda ro Yerusalem?>>
7 Dou-dou malab̄o (mab̄atu) la Atalya, dou siwe dab̄ae ede, wa'ura ka'iha Uma RUMA, ro mboto tau ro tui ra wa'u kalai d̄i ru'u b̄a Allah Ta'ala wa'ura kani b̄a siad̄oho d̄inembakaina Baal.
8 Ndad̄i sangaji parentana loakud̄u dou Lewi ndawi sab̄ua kotak (peti) piti ro d̄itoho wi'i d̄i tando tad̄a lawa na'e Uma RUMA. 9 D̄i sara'a Yerusalem ro d̄i Yehuda d̄i ngoa dou mamboto b̄a one sara'a dou pab̄uaku colana bea d̄i ru'u b̄a RUMA, b̄une ra wa'u katantukai b̄a la Musa. 10 Au rangoa di dou ma mboto ede, nakasanaku ade ela ro dou ro dou-dou mana'ekai siad̄oho. Mboto poda siad̄oho ma mai wa'a bea ro tauna ade peti ede. 11 Sanikina ainaina peti ede lao wa'a b̄a dou-dou Lewi d̄i pagawe-pagawe asi d̄imaparesana. Nggara peti ede nawa'usira b̄ini, ndad̄i dou mab̄ora sekretaris negara lab̄o dou mandad̄i waki Imam Agung makalosana piti ade peti ede, edempara peti ede d̄i lao wa'a mbali aka hid̄ina ra toho wi'ikai ai sarambana. Ndedeku d̄ikarawi b̄a siad̄oho sanikina ainaina, ro mboto poda piti ra wa'u kab̄oro.
12 Sawa'u b̄a ede sangaji lab̄o la Yayoda ma d̄onggona piti ede d̄i dou-dou mana'ekai kataho Uma RUMA ede. Edempara dou-dou mana'ekai karawi ede, ufana dou matukang kayu (panggita haju), dou mataki pa'a wadu ro dou-dou mapande b̄esi ro romba d̄imakarawina kataho Uma RUMA ede. 13 Ndad̄i tukang-tukang ede tampu'ura katahona Uma RUMA ede. Siad̄oho karawi kapodana ade ndad̄ina Uma RUMA ede ndad̄i kante'e ro ntika mbali b̄une ai sarambana. 14 Sawa'u b̄a nggori karawi ede, masa ro salaka mancewi d̄onggo b̄a siad̄oho d̄i sangaji ro d̄i la Yoyada. Edempara masa ro salaka (piti) ede, rakani d̄i ru'u ndawikai tau ro tui d̄i ru'u b̄a Uma RUMA, eded̄u tau ro tui d̄i ru'u upacara sambea ro ibadakai d̄i ru'u koroba ka'a, pingga-pingga d̄itaukai d̄upa, ro mangko-mangko.
Jasa-jasa Imam Yayoda Wati Rakaco'i
Santoi Imam Yoyada mbuipu morina, koroba ka'a mgge'e mpa d̄id̄onggo ro mbei d̄i Uma RUMA. 15 Imam Yoyada umuna wa'ura ipi tua ro madena wakatu umuna 130 mba'a. 16 Sia ra umbu d̄i rade sangaji-sangaji d̄i kota Daud d̄i ru'u kaco'ikai jasa-jasa sia b̄ara sia karawina ma taho d̄i ru'u b̄a Allah Ta'ala, d̄i Uma RUMA ro d̄i ela ro dou Israil .
17 Sawa'u b̄a made la Yoyada, sangaji Yoas rasiwi ro pangaru b̄a dou-dou mana'ekai Yehuda ndad̄ina sia watid̄u kandad̄i au walina d̄i au ra ngoa ro teikai b̄a la Yoyada. 18 Ndad̄i ela ro dou watid̄u sambea ro ibadana d̄i Uma RUMA, Allah Ta'ala b̄a wa'i ro waro siad̄oho, pala nanembaku berhala ro patung-patung Dewi Asyera. Dosa siad̄oho ede nakamaiku mbani RUMA d̄i ru'u Yehuda ro Yerusalem. 19 RUMA kamaina nabi-nabi d̄imarojo ro kawarana siad̄oho loakud̄u mbali sambea ro ibada d̄i RUMA, pala ela ro dou wati ne'ena kade'e nggahi nabi-nabi ede. 20 Edempara Roh Allah kuasakaina la Zakharia ana b̄a Imam Yoyada. La Zakharia lu'una ta d̄ei tando ela ro dou, edempara nggahi kana'ena, <<Nggahi RUMA Allah Ta'ala, <B̄ab̄auku nggomid̄oho wati to'akaimu d̄i parenta-parenta Nahu ro kamaimu ihakai d̄iweki ndaimu. Nggomid̄oho wati kandad̄i aumu Nahu, ndad̄i Nahu rau wati kandad̄i au nggomid̄oho!> >> 21-22 Pala ela ro dou kasamana weki d̄i aokaina la Zakharia, ro sangaji Yoas b̄atu rau ade kasama weki ede. Sia watid̄u kawarana d̄i jasa-jasa ro to'a la Yoyada, ama la Zakharia. B̄ara parenta b̄a sangaji, la Zakharia tob̄a b̄a dou kai wadu sampe madena d̄i sarei Uma RUMA. D̄i wakatu ne'era made, la Zakharia nggahi kana'ena, <<Raho-raho to'i mpa RUMA ma'eda rawi nggomid̄oho ake ro macola cepena!>>
Nggorikai Parentakai Sangaji Yoas
23 Ade mba'ana ede wa'u, wakatu cepe angi oru ai (mba'ana), tentara Siria mai deina Yehuda ro Yerusalem. Siad̄oho hade sara'ana dou-dou mana'ekai d̄i Yehuda ro Yerusalem ro mboto barang rarampana lao wa'ana aka Damsyik. 24 Tentara Siria sato'i mpa wekina, pala RUMA co'ona siad̄oho makakoana tentara Yehuda ma ncewi mboto, b̄ara dou Yehuda wa'ura tu'u wi'ina RUMA Allah Ta'ala b̄a wa'i ro waro siad̄oho. Kai cara ede RUMA hukumna sangaji Yoas. 25 Sangaji Yoas naipiku mboto suwuna (nataniku suwuna). Sawa'u b̄a lao tentara musu, d̄ua dou pagawena kasamana weki. Siad̄oho hadena sangaji Yoas d̄i hid̄i marukaina cola cepekai b̄ara hade b̄a dou ana Imam Yoyada. Sangaji Yoas ra umbu aka Kota Daud, pala wati d̄i rade sangaji-sangaji. 26 Dou makasama weki ma ao sia eded̄u la Zabad ana la Simeat dou siwe Amon, lab̄o la Yozabatd ana la Simrit dou siwe Moab. 27 Carita/sajara mab̄oha ana-ana sangaji Yoas, mab̄oha moke ro sarofi ma wati taho mab̄oha sia, ro mab̄oha b̄uneku sia katahona Uma RUMA, sara'ana wara ra tunti ade buku mangoa kab̄ae (tafsi) kitab raja-raja. La Amazia, ana mone la Yoas ma ndad̄i sangaji ma cepe amana.