Lewa lab̄o Edom
20
Pila-pila wakatu sawa'u b̄a ede, tentara Moab ro Amon, sama-sama lab̄o tentara Meunim ma kasama weki lab̄o siad̄oho, mai dei Yehuda. 2 Ndad̄i maira dou ma wa'a haba ake d̄i sangaji Yosafat, <<Na'ipiku mbotona tentara Edom wa'ura mai ra d̄i ipa b̄ae b̄a Moti Made d̄i mai deikaina Ita ruma sangaji. Siad̄oho nawa'ura weha ro kuasakaina Hazezon-Tamar.>> Hazezon -Tamar eded̄u ngara makalai d̄i ru'u b̄a En-Gedi. 3 Sangaji Yosafat ndad̄i dahu edempara sia do'ana raho bantu d̄i RUMA. Edempara sia kauna sara'a ela ro douna puasa. 4 Ra d̄i sanikina kota d̄i Yehuda dou lao mena aka Yerusalem d̄irahokaina bantu d̄i RUMA. 5 Siad̄oho sama-sama lab̄o dou-dou Yerusalem kab̄oro weki d̄i sarei ma b̄ou d̄i Uma RUMA. Sangaji Yosafat makid̄i d̄i tando siad̄oho, 6 ro do'a menana kai eli mana'e, <<Io RUMA, Allah Ta'ala b̄a wa'i ro waro madad̄oho! Ita Allah Ta'ala ma wara d̄i soroga ro maparenta d̄i sara'a bangsa d̄i dunia. Ita ma ntau kuasa ro ma tenggo; wati wara kone sab̄ua dou rau ma wa'u ao Ita RUMA. 7 Itaku, Allah Ta'ala madad̄oho. Wakatu ela Ita RUMA, bangsa Israil , mai ara dana ro rasa ake, Ita RUMA katesa kalosata dou-dou ma d̄i wakatu ede mangge'e d̄i hid̄i ake. Edempara Ita RUMA mbeita dana ro rasa ake d̄i londo ro mai la Ibrahim, soba Ita ede, d̄imandad̄i dana ntau siad̄oho santoi-ntoina. 8 Siad̄oho nawa'ura ngge'e ta'ake ro wa'ura tu'una sab̄ua uma hid̄i nembakai Ita RUMA. Siad̄oho nab̄ade 9 b̄a one nggara siad̄oho narakasi hukuman b̄ara dosa-dosa siad̄oho, ro siad̄oho b̄oha b̄a lewa ro laka, bala supu, atao bala hid̄o, siad̄oho naloa mai d̄i Ita RUMA ro nakid̄i d̄i tando uma sambea ro ibadakai ake. D̄i ade susa ro darura siad̄oho, siad̄oho naloa mai do'a d̄i Ita RUMA, ro Ita maringa weaku ro mabantuku siad̄oho.10 Ake bangsa Amon, Moab ro bangsa Edom mamai dei madad̄oho. wakatu wa'i ro waro madad̄oho tu'u wi'ina Mesir, Ita RUMA wati kauta siad̄oho kuasakai dana ro rasa bangsa-bangsa ede. Ndad̄i wa'i ro waro madad̄oho wehana ncai lampa heko ro wati ka'iha lelina bangsa Amon, Moab ro bangsa Edom ede. 11 Ake tatiopu, b̄une ake karawi b̄a bangsa-bangsa ede d̄i madad̄oho. Ro siad̄oho nane'e katesa kalosa madad̄oho ra d̄i dana ro rasa ra mbei b̄a Ita RUMA d̄i madad̄oho. 12 Itaku, Allah Ta'ala madad̄oho. Tahukumpu siad̄oho, b̄ara madad̄oho ake wati loa au-au satando angi lab̄o tentara ma mboto ede, ma ne'e dei madad̄oho. madad̄oho wati b̄ade auku ma pab̄ua d̄ikarawi b̄a madad̄oho, b̄a one ndedena madad̄oho mai raho bantu d̄i Ita RUMA.>> 13 Wakatu ede sara'a dou mone Yehuda lab̄o wei ro anad̄ohona kid̄i d̄i tando Uma RUMA.
14 D̄i woha dou ma mboto ede wara sab̄ua dou Lewi ma ngara la Yahaziel. Sia ede ana b̄a la Zakharia ra d̄i iwa ro weki la Asaf ede londo ro mai la Benaya, Yeiel, ro la Matanya. D̄i wakatu ede la Yahaziel kuasakai b̄a Ruh RUMA (Allah), 15 ro nggahi sia, <<RUMA sangaji Ma d̄ese ro ntasa, ro sara'a cina ro angiku. Nggahi RUMA b̄a one Itad̄oho sara'ana aina kompo kananu ro aina dahu satando angi lab̄o tentara ma mboto ede. B̄a one ma lewa laina nggomid̄oho, malaisi (pala) Allah Ta'ala. 16 Naisi wakatu siad̄oho tekana ta ncai teka d̄i Zis, deipu siad̄oho. Nggomid̄oho d̄imasatando angi lab̄o siad̄oho d̄i sumpu so d̄i tando so sarae d̄eni lab̄o Yeruel. 17 Nggomid̄oho wati mpori lewamu ade lewa ro laka ake. Laopu aka hid̄i ra wa'u katantukai d̄i ru'u b̄a nggomid̄oho ro ngena mpa d̄i hid̄i ede. Nggomid̄oho d̄ima'eda, RUMA ma mbei ngolu d̄i nggomid̄oho. Oe dou-dou Yehuda ro Yerusalem, aina darura atao dahu. Lu'u mpa ade lewa ro laka ede, RUMA d̄imabantuna nggomid̄oho!>>
18 Ndad̄i sujura sangaji Yosafat. Sara'a ela ro dou b̄atu sia suju nemba RUMA. 19 Edempara dou-dou Lewi ra d̄i iwa ro weki la Kehat lab̄o iwa ro weki la Korah kid̄i, ro kanggica d̄ihi ade roi ro wadi RUMA, Allah Ta'ala (dou) Israil .
20 B̄ala ai sanai sid̄i-sid̄i poda, ela ro dou losa mena ro lao aka so sarae d̄eni lab̄o Tekoa. Wakatu siad̄oho ne'era tu'u lao, sangaji Yosafat ngoa nggahi ake d̄i siad̄oho, <<Ela ro dou Yehuda ro Yerusalem! Imbipu d̄i RUMA Allah Ta'alamu, ndad̄i nggomid̄oho ngge'e mpa tenggomu. Tarimapu ngoa ro tei kataho ra d̄i nabi-nabimu, ndad̄i nggomid̄oho d̄imantau hasil!>> 21 Sawa'u b̄a mafakana lab̄o ela ro dou, sangaji kauna dou-dou mataki rawa kani, kani ro lombo ma nginakai d̄i kani wakatu upacara-upacara agama. Dou-dou ma rawa ede pab̄uaku kid̄i barina kai gaga d̄i tando barisan tentara ro narawaku, <<Roi ro wadiku RUMA! Meci ro ca'u-Na ma ede ro hid̄i (santoi-ntoina)!>>
22 D̄i wakatu dou-dou mataki rawa ede, kanggica rawana, RUMA kamaina huru hara d̄i ade weki tentara musu ma wunga mai dei. 23 Ndad̄i tentara Amon lab̄o tentara Moab deina tentara Edom ro ka'iha leli sara'ana siad̄oho. Edempara siad̄oho mbali cua dei ro hade angi ndaina. 24 Wakatu tentara Yehuda rongga d̄i uma d̄ese hid̄i jagakai d̄i so sarae ro tiokab̄aena hid̄i warakai musu, siad̄oho edana timba-timba musu ma mbaru mbanta d̄i dana. Wati wara kone sab̄ua dou tentara musu ede ma mori.
25 Ndad̄i sangaji Yosafat lab̄o tentara-tentarana lao wehana barang-barang musu, siad̄oho rumpana mboto binata ntadi, tau ro tui, kani ro lombo, ro barang-barang manggali co'i. Sawa'u b̄a kab̄orona barang-barang ede tolu nai ntoina, mbuipu mbotona barang-barang ma kalai, ndad̄ina wi'i paki b̄a siad̄oho (watid̄u wa'una wa'a). 26 D̄i ainaina ka'upakaina siad̄oho kab̄oro weki d̄i So Roi ro wad̄i, ro d̄i hid̄i ede siad̄oho roi ro wad̄ina RUMA b̄ara sara'a au ra wa'u karawi b̄a RUMA. B̄ara ndedena So ede tangarakai <<So Roi ro wad̄i.>> 27 Edempara sangaji Yosafat lab̄o sara'a tentarana dula mbali aka Yerusalem kai neo ade b̄ara RUMA wa'ura kakoana musu siad̄oho. 28 Wakatu ronggana d̄i kota, siad̄oho barina lao aka Uma RUMA, d̄ende kai kecapi ro tarompe. 29 Sara'a negara makalai ndad̄i dahu wakatu ringana haba b̄uneku RUMA kakoana musu-musu dou Israil . 30 B̄ara ndedena sangaji Yosafat parentana kai taho ro sana, ro RUMA mbeina sia ke'adaan wati wara ngango ro nyora d̄i sara'a dana ro rasana.
Nggorina Parentakai Sangaji Yosafat
(1Raj. 22:41-50)
31 La Yosafat ndad̄ina sangaji wakatu umuna tolu mpuru lima mba'a, sia parentana d̄i Yerusalem d̄ua mpuru lima mba'a ntoina. Ngara inana eded̄u la Azuba ana la Silhi. 32 Sangaji Yosafat na mori b̄atu rawi la Asa, amana eded̄u nakarawiku ma taho ro ncihi d̄i eda b̄a RUMA. 33 Pala sia wati ka'iha lelina hid̄i-hid̄i nembakai berhala. Ela ro dou wati ngge'epu kai more adena sambea ro ibada d̄i Allah Ta'ala b̄a wa'i ro waro siad̄oho.
34 Carita makalai mab̄oha sangaji Yosafat, ra d̄i sarambakaina sampe cumpukai parentana (sangajina) ra tunti ade carita (sejara) Yehuana la Hanani, ma ratunti ade buku sejara sangaji-sangaji Israil .
35 D̄i sab̄ua wakatu la Yosafat sangaji Yehuda ndawina kasoba angi lab̄o la Ahazia sangaji Israil , ma karawi mboto madab̄ae. 36 D̄i lab̄u Ezion-Geber siad̄oho ndawina kapa-kapa d̄i ru'u lao lojakai aka Tarsis. 37 Pala Nabi Eliezer ana la Dodawa ra d̄i kota Maresa ngoa ro kawarana d̄i sangaji Yosafat, nggahina, <<B̄ara Ita ruma ndawimu kasoba angi lab̄o sangaji Ahazia, RUMA d̄imaka'iha lelina au ra karawi b̄a Ita ruma sangaji.>> Ndad̄i ihalelira kapa-kapa ra wa'u ndawi b̄a sangaji Yosafat, ndad̄ina wati loana lao loja.