Sangaji Yosafat rojo b̄a sab̄ua dou nabi
19
Sawa'u b̄a dula mbali kai salama sangaji Yehuda aka asina d̄i Yerusalem, 2 sab̄ua dou nabi mangara la Yehu ana la Hanani mai satandona sangaji. Nggahi nabi ede d̄i sangaji Yosafat, <<Sab̄ua nataho Ita ruma sangaji bantuta dou bab̄ae ro kasombo angi lab̄o dou ma ipi daca'u RUMA? Rawi (au ra karawi b̄a) Ita ede nakamaiku mbani RUMA d̄i Ita. 3 Pala wara raupu ma taho d̄i Ita ruma sangaji. Ita wa'ura pakimu sara'a patung Dewi Asyera ra nemba b̄a ela ro dou ro Ita wa'u raura usaha ru'u mori b̄atu au ra kane'ekai b̄a Allah Ta'ala.>>Sangaji Yosafat hanta/kasaha hakim-hakim
4 Sangaji Yosafat nangge'e d̄i Yerusalem. Pala sia ntuwu lao lambana ela ro douna d̄i sara'a dana ro rasa kuasakai b̄a sia d̄i ru'u ngoa ro kaukaina siad̄oho (ela ro douna) mbali nemba RUMA Allah Ta'ala wa'i ro waro b̄a siad̄oho. 5 D̄i sanikina kota mantau b̄ente d̄i Yehuda sia hantana hakim-hakim, 6 ro mbeina parenta ake d̄i siad̄oho, <<Kalampapu kai loa timba ro lemba, b̄ara nggomi paresamu ncihi ro ncara dou laina kai ngara manusia, malaisi (pala) kai ngara RUMA. RUMA ma wara lab̄o nggomi d̄i wakatu kanggorimu parakara. 7 B̄ara ndedena, nggomi pab̄uapu dahumu d̄i RUMA, ro kalampapu kai taho-taho, b̄a one RUMA Allah Ta'ala ndai wati ca'una d̄i dou ma kalileko, makalampa tani sab̄ae atao matarima sogo.>>
8 D̄i Yerusalem rau, sangaji Yosafat hantana hakim-hakim ra d̄i dou-dou Lewi, imam-imam ro dou-dou mana'ekai ela ro dou. Siad̄oho pab̄uaku kanggorina parakar-parakara mab̄oha sapa Hukum RUMA, ro parakara ngango ro ngera (makalai). 9 D̄i hakim-hakim ede sangaji Yosafat mbeina parenta ake, <<Nggomi pab̄uapu kalampa takimu kai dahu d̄i RUMA. B̄atupu parenta-Na ade samenana au-au makalampa b̄a nggomi. 10 Nggara lengad̄ohomu ra d̄i kota makalai mai wa'ana parakara mab̄oha hade angi (dou), sapa hukum, parenta, atao atoran-atoran, pab̄uapu nggomi mbeimu ngoa ro tei d̄i siad̄oho. Kai ndedena siad̄oho wati (wara) ncarana d̄i RUMA, ro RUMA wati d̄imambani d̄i nggomi ro d̄i siad̄oho. kalampapu parenta ake, ndad̄i nggomi wati d̄imawara ncaramu. 11 Imam Agung Amarya mbei b̄a nahu kuasa ndad̄i mana'ekaina ade samenana parakara (lampa rawi) mab̄oha hukum-hukum agama. La Zebaja ana la Ismael, eded̄u gubernur (mana'ekai londo ro mai) Yehuda, mbei b̄a nahu kuasa ndad̄i mana'ekaina ade samenana parakara (lampa rawi) kerajaan. Dou-dou Lewi mantau su'u ro tundu d̄imajaga loakud̄u au-au ra kanggori b̄a pengadilan d̄ikalampa. B̄atupu au ra ngoa ro tei ake ro kalampa kapodapu. Raho-raho to'i mpa RUMA ma lab̄ona dou ma kalampa takina kai adil!>>