HABA MATAHO
RA KARONGGA B̄A
LA MATIUS
Dafta ngara wa'i ro waro Isa Al Masih
1:1-17
(Luk. 3:23-38)
1
Akeku ngara-ngara wa'i ro waro Isa Al Masih, londo ro mai la Daud, londo ro mai la Ibrahim:2-6a la Ibrahim nantau ana ma ngara la Ishak,
la Ishak nantau ana ma ngara la Yakub,
la Yakub nantau ana ma ngara la Yehuda ro arid̄ohona,
la Yehuda nantau ana ma ngara la Peres ro la Zerah,
la Peres ro la Zerah (ina siad̄oho ngarana la Tamar),
la Peres nantau ana ma ngara la Hezron,
la Hezron nantau ana ma ngara la Ram, la Ram nantau ana ma ngara la Aminadab,
la Aminadab nantau ana ma ngara la Nahason,
la Nahason nantau ana ma ngara la Salmon,
la Salmon nantau ana ma ngara la Boas,
la Boas (inana eded̄u la Rahab) nantau ana ma ngara la Obed,
la Obed (inana eded̄u la Rut) nantau ana ma ngara la Isai,
la Isai nantau ana ma ngara la Daud.
6b-11 Ratampu'u d̄i la Daud sampe wakatu bangsa Israel rapaki aka Babel, wara ratunti ngara-ngara b̄une ta awa ake:
la Sulaiman (inana eded̄u wei wa'u la Uria) nantau ana ma ngara la Rehabeam,
la Rehabeam nantau ana ma ngara la Abia,
la Abia nantau ana ma ngara la Asa,
la Asa nantau ana ma ngara la Yosafat,
la Yosafat nantau ana ma ngara la Yoram,
la Yoram nantau ana ma ngara la Uzia,
la Uzia nantau ana ma ngara la Yotam,
la Yotam nantau ana ma ngara la Ahas,
la Ahas nantau ana ma ngara la Hizkia,
la Hizkia nantau ana ma ngara la Manasye,
la Manasye nantau ana ma ngara la Amon,
la Amon nantau ana ma ngara la Yosia,
la Yosia nantau ana ma ngara la Yekhonya,
ro sa'e ro arina.
12-16 Ratampu'u aipu bangsa Israel rapaki aka Babel sampe warakai Isa, wara ratunti ngara-ngara b̄une ta awa ake:
la Yekhonya nantau ana ma ngara la Sealtiel,
la Sealtiel nantau ana ma ngara la Zerubabel,
la Zerubabel nantau ana ma ngara la Abihud,
la Abihud nantau ana ma ngara la Elyakim,
la Elyakim nantau ana ma ngara la Azur,
la Azor nantau ana ma ngara la Zadok,
la Zadok nantau ana ma ngara la Akhim,
la Akhim nantau ana ma ngara la Eliud,
la Eliud nantau ana ma ngara la Eleazar,
la Eleazar nantau ana ma ngara la Matan,
la Matan nantau ana ma ngara la Yakub,
la Yakub nantau ana ma ngara la Yusuf rahi la Maria.
Ro la Maria edeku ma rangganana Isa d̄ipehekai Al Masih eded̄u Sangaji Makasalama.
17 Ndad̄i sara'ana wara 14 londo ro mai ra tampu'u d̄i la Ibrahim sampe d̄i la Daud. Ratampu'u d̄i la Daud sampe wakatu dou Israel rapaki aka Babel wara 14 londo ro mai wali. Ratampu'u aipu dou Israel rapaki aka Babel sampe warakai Al Masih wara 14 londo ro mai rau.
Warakai Isa Al Masih
1:18-25
(Luk. 2:1-7)
18 Ndakeku caritana mab̄oha warakai Isa Al Masih: La Maria ina-Na wakatu ede wa'ura ndad̄i dou sod̄i la Yusuf. Pala sawatipu siad̄oho nikana, la Maria nawa'ura na'e loko b̄ara kuasa Roh Allah. 19 La Yusuf, dou sod̄i la Maria ede, eded̄u dou ma to'a d̄i hukum Taurat ro sia wati ne'ena kamaja dou sod̄ina eded̄i dou mamboto. Ndad̄i sia nane'eku tula kai nari-nari dou sod̄ina ede. 20 Pala wakatu kananu b̄a la Yusuf lampa rawi ede, mala'eka Ruma katadana weki d̄i la Yusuf ade nifi ro nggahi mala'eka ede, <<Yusuf, londo ro mai la Daud, aina dahumu nika lab̄o la Maria, b̄a one ana ma wara ade lokona ede b̄ara kuasa Roh Allah. 21 La Maria d̄imanggana sab̄ua ana mone. Ana dou to'i ede pab̄uapu tangarakaimu Isa, b̄a one Siaku d̄imakasalama ela-Na ra d̄i dosa siad̄oho.>>
22 Samenana ede ndad̄ina ncihi ncao b̄une ra karongga b̄a Ruma d̄i nabi-Na, eded̄u, 23 <<Sab̄ua dou siwe sampela d̄imana'e loko ro d̄imanggana ana mone. Ana dou to'i ede d̄itangarakai Imanuel.>> Imanuel ade nggahi Ibrani, aona <<Allah Ta'ala malab̄ona ndaita>>.