Hotoba la Yahya Mataki kandeu raso dou
3:1-12
3
D̄i wakatu ede maira la Yahya mataki kandeu raso dou d̄i so sarae aka Yudea ro sia tampu'ura hotobana. 2 <<Tobara ra d̄i dosa-dosamu,>> nggahina, <<B̄a one Karaja'an Saroga wa'ura ^deni!>>3 La Yahya edeku dou ra pehe b̄a Nabi Yesaya ade nggahi ro eli b̄une ake
<<Wara dou ma ou nggao d̄i so sarae,
<Sadiapu ncai d̄i ru'u b̄a Ruma;
kapiripu ncai d̄i ru'u b̄a Sia.> >>
4 La Yahya kanina jumba ra ndawi kai kere onta. Here lokona ra ndawi kai huri ro ngaha ro nonona eded̄u kasanto ro oi ani wu^ba. 5 Mboto dou ma mai d̄i la Yahya eded̄u dou Yerusalem, sara'a dou dana ro rasa Yudea ro dou-dou d̄i kompe ro pei Sori Yordan. 6 Siad̄oho mangaku menana dosa-dosana ro la Yahya kandeu rasona siad̄oho aka Sori Yordan tanda tobakaina.
7 Mboto rau dou Farisi ro dou Saduki ma mai d̄i la Yahya mane'e d̄ikandeu raso tanda tobakai ra d̄i dosana. Nggahi la Yahya d̄i siad̄oho, <<Nggomid̄oho dou dab̄ae b̄une sawa ma wari! Cou ma ranggahi b̄a one nggomid̄oho maloaku hori weki ade hukuman Allah Ta'ala d̄i ainaina kiama? 8 Ndad̄i katadapu kai ruku ro rawimu b̄a one nggomi wa'ura tobamu ra d̄i dosa-dosamu. 9 Aina kacaimu b̄a one nggomid̄oho maloaku hori weki ra d̄i hukuman kai nggahimu b̄a one la Ibrahim eded̄u wa'i ro waro nami. Kawarapu, kone kai wadu-wadu ake, Allah Ta'ala naloaku kandad̄i londo ro mai d̄i ru'u b̄a la Ibrahim! 10 Ponggo wa'ura sadia ^dib̄o'okai fu'u haju sampe awa amuna. Sanikina fu'u haju ma wati mbua wua ma taho, ^dib̄o'o ro ^dipaki d̄i ade afi. 11 Nahu makandeu nggomid̄oho kai oi d̄ikatandakai b̄a one nggomid̄oho wa'ura toba ra d̄i dosa-dosamu; pala Sia d̄imamai sawa'u b̄a nahu nancewi ntau kuasa ntewikaisi lab̄o nahu. Kone d̄imawa'a wea sadopa-Na nahu wati patuna. Sia edeku d̄imakandeu raso nggomid̄oho kai Roh Allah ro kai afi. 12 D̄i rima-Na wara d̄oku d̄imbed̄ikai sara'a gandum-Na sampe rasona. Gandum ^dika^boro-Na d̄i ade jompa, pala sara'a saroena ^dika'a-Na d̄i ade afi ma wati made-made.>>
Isa Al Masih kandeu b̄a la Yahya
3:13-17
13 D̄i wakatu ede Isa tu'u wi'ina Galilea lao aka Sori Yordan. Sia lao rakana la Yahya ro rahona la Yahya kandeu Sia. 14 Pala la Yahya wati ngawana kalampa au ra raho b̄a Isa ede. Nggahi la Yahya, <<Sapodakaina madaku d̄ikandeu raso b̄a Ita, ake Ita ma mai d̄i mada.>>
15 Pala cambe b̄a Isa Al Masih, <<Wati b̄unena lampa rawi ake nda^dina. B̄a one kai ndedena, ndai takalampaku samenana au ra kane'ekai b̄a Allah Ta'ala.>> Edempara Isa kandeu b̄a la Yahya.