Matius 4

Isa Al Masih coba b̄a Iblis

4:1-11

Sawa'u b̄a ede Isa wa'a b̄a Roh Allah aka so sarae loakud̄u coba b̄a Iblis. 2 Upa mpuru nai aimarai aimangad̄i Isa puasana, ndad̄i Sia iuna hi^do. 3 Edempara maira Iblis ro nggahina d̄i Isa, <<Nggara podasi Nggomi Ana Allah,¹ rungkapu wadu-wadu ake ndad̄i roti.>>

4 Cambe b̄a Isa,<<D̄i ade Kitab Suci wara ratunti: Manusia wati morina kai roti mpoa, pala namori rauku kai sanikina nggahi ro eli ra renta b̄a Allah Ta'ala.>>

5 Sawa'u b̄a ede Iblis wa'ana Isa aka Yerusalem, kota maraso ro wi'ina Isa ta ese wawo b̄utu Bait Allah. 6 Edempara Iblis nggahina d̄i Sia, <<Nggomi Ana Allah. Nggara ndedesi ^ba^bupu wekimu, b̄a one ade Kitab Suci wara ratunti b̄une ake,

<Allah Ta'ala nakauku mala'eka-mala'eka-Na ^dimasandaka Nggomi,

siad̄oho ^dimasakaka ao Nggomi kai rimana,

loakud̄u kone e^di-Mu wati b̄oha b̄a wadu.> >>

7 Cambe b̄a Isa, <<Pala d̄i ade Kitab Suci wara ratunti rau, <Nggomi aina cobamu Allah Ta'ala, Rumamu.> >>

8 Sawa'u b̄a ede Iblis wa'a walina Isa aka doro ma d̄ese poda ro teina d̄i Sia samenana karaja'an d̄i dunia lab̄o sara'a ntau ro wara d̄i dunia. 9 Edempara nggahi Iblis d̄i Isa, <<Sara'ana ede d̄imbei b̄a nahu d̄i Nggomi, nggara Nggomi masuju ro nembasi nahu.>>

10 Cambe b̄a Isa, <<Pesopu wekimu, nggomi Iblis! D̄i ade Kitab Suci wara ratunti: Nembapu Allah Ta'ala, Rumamu, Sia mpoa mpa ^dinemba.>>

11 Edempara Iblis tu'u wi'ina Isa ro mala'eka-mala'eka mai kab̄ua weana d̄i ru'u b̄a Isa.

Isa Al Masih tampu'u karawi-Na d̄i Galilea

4:12-17

(Mrk. 1:14-15; Luk. 4:14-15)

12 Wakatu Isa ringana haba b̄a one la Yahya wa'ura kalu'u b̄a dou ade uma bui, Isa lao pesona weki aka Galilea.

13 Sia tu'u wi'ina kota Nazaret, edempara ngge'ena d̄i Kapernaum d̄i kengge Ndano Galilea aka dana ro rasa Zebulon ro Naftali.

14 Isa karawina b̄une ede, ndad̄i ncihi ncaora b̄une ra nggahi b̄a Nabi Yesaya:

15 <<Dana ro rasa Zebulon ro dana ro rasa Naftali,

aka ncai malao aka ndano, ipa b̄ae b̄a Sori Yordan,

Galilea, dana ro rasa bangsa-bangsa makalaina!

16 Bangsa ma ngge'e d̄i hid̄i ma rindi ncaki

nawa'ura eda taroa ma poda!

D̄i ru'u b̄a siad̄oho ma ngge'e ade rindi ncaki hid̄i madekai

nawa'ura wontu taroa ma sapodakaina!>>

17 Tampu'u wakatu edeku Isa Al Masih ngoa ro teina, <<Tobara ra d̄i dosa-dosamu, b̄a one Karaja'an Saroga wa'ura ^deni!>>

Anamori Isa Al Masih ma sarambakaina

4:18-22

(Mrk. 1:16-20; Luk. 5:1-11)

18 Wakatu Isa wunga lampana d̄i kengge Ndano Galilea, Sia edana d̄ua dou ma taki ala uta, eded̄u la Simon (^di'ou rau kai la Petrus) lab̄o arina la Andreas. Siad̄oho wunga alana uta d̄i ndano ede.

19 Nggahi Isa d̄i siad̄oho, <<Mai ^batupu Nahu. Nahu d̄imakandad̄i nggomid̄oho, dou ma taki ala manusia.>> 20 Edempara siad̄oho tu'u wi'i lalona alana ta ede ro b̄atuna Isa.

21 Sawa'u b̄a ede Isa lampa walina ro eda rauna d̄ua dou sa'e ro arina, eded̄u la Yakub lab̄o la Yahya ana-ana la Zebedeus. Siad̄oho lab̄o amana wunga katahona ala d̄i ade sampa. Isa ouna siad̄oho rau, 22 edempara siad̄oho tu'u wi'i lalona sampa ro amana ede ro b̄atuna Isa.

Isa Al Masih ngoa ro teina ro katahona dou-dou ma supu

4:23-25

(Luk. 6:17-19)

23 Isa lampa kalili sara'ana dana ro rasa Galilea; Sia ngoa ro teina d̄i uma-uma hid̄i sambea ro ibadakai. Sia ngoa ro kahabana Haba Mataho mab̄oha Karaja'an Saroga. Isa kataho rauna dou-dou ma supu ro ma mapu ro rome. 24 Ndad̄i haba mab̄oha Isa ede mbou sampe d̄i sara'a dana ro rasa Siria, ndad̄ina mboto dou ma mai wa'a dou d̄i Isa. Siad̄oho wa'ana dou-dou mamboto pahu supu ro ma susa ro ncoki. Dou-dou ra lu'ukai b̄a roh setan, ma supu finca jara ro dou ma made ^binci, sara'ana kataho b̄a Isa. 25 Mboto poda dou ma b̄atu Isa wakatu ede. Wara ma ramai ra d̄i Galilea, Dekapolis, Yerusalem, Yudea ro dou-dou ipa b̄ae b̄a Sori Yordan.