Dou-dou ma loa ilmu ntara ma ramai Ele mai
2:1-12
2
Isa Al Masih ranggana d̄i kota Betlehem d̄i dana ro rasa Yudea wakatu parenta b̄a Sangaji Herodes. Wakatu ede pila-pila dou ma loa ilmu ntara ma ramai ele mai, maina d̄i Yerusalem. 2 So^di rero b̄a siad̄oho, <<Ta b̄eku Ana dou to'i ede, sangaji dou Yahudi ma b̄oupu ranggana b̄a inana? Nami wa'ura edamu ntara-Na ma wontu ta wela elena ro nami ake mane'e nemba Sia.>>3 Wakatu ringa b̄a Sangaji Herodes mab̄oha lampa rawi ede, sia ro sara'a dou d̄i Yerusalem nawancuku we^dina. 4 Edempara kau b̄a sia sara'a dou mana'ekai imam, ro ahli-ahli Taurat dou Yahudi mai kab̄oro weki. Sawa'u b̄a ede sod̄i b̄a sia d̄i doud̄oho ede, <<Ta b̄eku hid̄i ra ngganakai Al Masih, Sangaji Makasalama ra sake b̄a Allah Ta'ala?>>
5 Cambe b̄a siad̄oho, <<D̄i kota Betlehem d̄i dana ro rasa Yudea. Ndedeku ra tunti b̄a sab̄ua nabi, 6 <Nggomi Betlehem, dana ro rasa Yehuda,
nggomi laina ma ipi to'i d̄i woha kota-kota mana'e d̄i Yehuda.
B̄a one ra d̄i nggomiku d̄imamai sab̄ua dou
d̄imana'ekaina ela Nahu Israel.> >>
7 Sawa'u b̄a rakana haba ede, Herodes ouna dou-dou maloa ilmu ntara ma ramai Ele mai ede kai nari-nari. Edempara sod̄i b̄a sia d̄i doud̄oho ede b̄une aiku tampu'u tadana ntara ede. 8 Sawa'u b̄a ede, sia kauna lao doud̄oho ede aka Betlehem ro nggahi ndakena, <<Laora, ngupa kab̄aepu Ana dou to'i ede. Nggara nggomid̄oho mawa'usira eda Ana dou to'i ede, ngoajapu nahu, loakud̄u nahu rau malao nemba Sia.>>
9-10 Sawa'u b̄a ringana au ra nggahi b̄a sangaji ede, siad̄oho laona. Siad̄oho eda walina ntara ra edana ntoina ta wela elena. Siad̄oho nawancuku neo adena, eda ntara ede! Ntara ede ma rai ulu d̄i tando siad̄oho ro denggana ta ese mai b̄a hid̄i warakai Ana dou to'i ede. 11 Edempara siad̄oho lu'una d̄i ade uma ede ro edana Ana dou to'i ede lab̄o la Maria ina-Na. Siad̄oho suju ro nembana Ana dou to'i ede, edempara siad̄oho henggana hid̄i taukaina ntau ro warana ro d̄onggo ro mbeina d̄i Ana dou to'i ede eded̄u masa, kamaya, lab̄o mur.a 12 Allah Ta'ala ngoa ro kawarana siad̄oho d̄i ade nifi loakud̄u siad̄oho aina mbalina aka sangaji Herodes. Ndad̄i siad̄oho dulana ta ncai ma kalai.
Lao ngge'e peso weki aka Mesir
2:13-15
13 Sawa'u b̄a dou-dou ma loa ilmu ntara ede dulana, mala'eka Ruma katadana weki ade nifi la Yusuf. Nggahi mala'eka ede, <<Tu'ura, wa'apu Ana dou to'i ede lab̄o inana ro lao pesopu wekimu aka Mesir. Ngge'epu ta aka sampe Nahu manuntu wali lab̄o nggomi, b̄a one la Herodes wunga ngupa rerona Ana dou to'i ede ro nane'eku hade Sia.>>
14 Edempara la Yusuf tu'una ro d̄i aimangad̄i ede wa'u, sia lao wa'ana Ana dou to'i ede lab̄o ina-Na aka Mesir. 15 Siad̄oho ngge'ena ta aka sampe made Herodes.
Lampa rawi ede ncihi ncao b̄une au ra nggahi b̄a Ruma ra karongga b̄a nabi-Na: <<Nahu ma'ou ana-Ku ra d̄i Mesir.>>
Hadekai d̄ambe-d̄ambe to'i d̄i Betlehem
2:16-18
16 Wakatu b̄ade b̄a Herodes b̄a one dou-dou maloa ilmu ntara ma ramai Ele mai ede kekona sia, sia nawancuku mbanina. Edempara sia kauna dou hade sara'a d̄ambe to'i mamone ma b̄ou ra nggana sampe ma umu d̄ua mba'a ma wara aka Betlehem ro d̄i dana ro rasa kompe ro peina. Ede ncihi ncao lab̄o haba ra rakana d̄i dou-dou maloa ilmu ntara ede mab̄oha wakatu tadana ntara ede.
17 Ndedeku ndad̄ina au ra wa'u nggahi b̄a Nabi Yeremia,
18 <<D̄i Rama maringaku eli nangi nduru,
weta ro nangi.
La Rahel nangi nduruna d̄i ru'u b̄a ana^dohona;
sia wati ne'ena d̄irere b̄ara anad̄ohona watid̄u warana.>>
Dula ra d̄i Mesir
2:19-23
19 Sawa'u b̄a made Herodes, mala'eka Ruma katadana weki d̄i la Yusuf d̄i ade nifi wakatu sia mbuipu d̄i Mesir. 20 Nggahi mala'eka ede, <<Dou-dou ma ne'e hade Ana dou to'i ede, nawa'ura made. B̄ara ndedena tu'ura, wehapu Ana dou to'i ede lab̄o Ina-Na ro lao mbalira aka Israel.>> 21 Sawa'u b̄a ede la Yusuf tu'una edempara wa'ana Ana dou to'i ede lab̄o ina-Na ro dula mbalina aka Israel.
22 Pala sawa'u b̄a ede, la Yusuf ringana haba b̄a one la Arkelaus, ana Herodes ma cepe amana ndad̄i sangaji aka dana ro rasa Yudea. Ndad̄i la Yusuf nadahuku lao ta aka. Sawa'u b̄a sia rakana ngoa ro tei wali b̄a Ruma ade nifina, edempara sia laona aka dana ro rasa Galilea. 23 D̄i dana ro rasa Galilea la Yusuf ngge'ena d̄i kota Nazaret. Lampa rawi ede ndad̄ina ncihi ncao b̄une ra nggahi b̄a nabi-nabi mab̄oha Ana dou ede: <<Sia ^dipehekai Dou Nazaret.>>