Isa Al Masih katahona dou ra lu'ukai b̄a roh setan
5:1-20
5
Edempara Isa lab̄o anamorid̄oho-Na rongga ipa b̄ae b̄a Ndano Galilea, d̄i dana ro rasa Gerasa. 2 Ndede Isa londona d̄i sampa, Sia mai raka b̄a sab̄ua dou mone ma ralosa d̄i karombo rade. 3 Dou ede kuasakai b̄a roh setan ro nangge'e d̄i rade-rade. Sia watid̄u wa'u d̄iki b̄a dou, kone kai rante rau. 4 Wa'ura ntuwu ed̄i ro rimana randante, pala ntuwura rante-rante ede b̄isa b̄a sia, ro ^besi d̄i ed̄ina foka b̄a sia. Sia nawancuku tenggona b̄ara ndedena wati wara kone sab̄ua dou rau ma wa'una tapa. 5 Aimarai aimangad̄i sia narewo d̄i rade ro d̄i doro-doro to'i, ro kanggica ncauna ro ^boe kancuwuna sarumbu ndaina kai wadu.6 Wakatu eda sando'ona Isa ma mai, sia lao rai rakana Isa edempara sujuna d̄i tando Isa. 7 Sia kanggica kana'ena, <<Isa, Ana Allah3 Ma Wancu ^Dese Ro Ntasa! D̄i ka^bune-Mu nahu ake? Kai ngara Allah Ta'ala, nahu ma raho nemba, ai to'ina kancokimu nahu!>> 8 Dou ede nggahi ndedekaina b̄ara Isa manggahi d̄i sia, <<Roh setan, losa ra d̄i dou ake!>>
9 Edempara Isa sod̄ina sia, <<Cou ngaramu?>>
Cambe b̄a dou ede, <<Ngara nahu <Legiun> – b̄ara nami ake nawancuku mboto poda wekimu!>> 10 Ntuwu poda sia rahona loakud̄u Isa aina katesa roh-roh setan ra d̄i dana ro rasa ede.
11 ^Deni lab̄o hid̄i ede wara mboto poda wawi ma wunga ngupa ngaha d̄i kengge doro to'i. 12 Roh-roh setan ede rahona d̄i Isa, <<Takau to'ipu nami lu'u d̄i wawi-wawi ede!>> 13 Ro Isa nangawa. Ndad̄i roh-roh setan ede losana d̄i dou ede, edempara lu'una d̄i wawi-wawi ede. Sara'a wawi sarewo ede rai ro nggoncuna d̄i rengge lu'u ade ndano, edempara made mimina – sara'a wawi-wawi ede wara takasi 2.000 mbua.
14 Dou-dou ma tonggu wawi ede raina, ro kambouna haba ede aka kota ro d̄i kampo-kampo kompe ro peina. Edempara dou losa menana b̄a ne'ena eda au ma wa'ura nda^di. 15 Siad̄oho mai rakana Isa, edempara edana dou ra lu'ukai b̄a roh setan ma wa'ura taho, ma wunga doho ta ede. Sia nawa'ura kani ^baju ro sarowa, ro nawa'ura taho fiki ro kananuna. Ndad̄i siad̄oho sara'ana ndad̄i dahu. 16 Dou-dou ma wa'ura eda au ma ndad̄i mab̄oha dou ede ro wawi-wawi ede caritana d̄i dou-dou au ma wa'ura nda^di. 17 Edempara dou-dou d̄i dana ro rasa ede rahona loakud̄u Isa tu'u wi'ina dana ro rasa ede.
18 Wakatu Isa ne'ena sampa, dou ra kuasakai b̄a roh setan ma wa'ura taho ede rahona d̄i Isa, loakud̄u sia b̄atuna Isa.
19 Pala Isa wati kauna ro nggahi-Na, <<Dulara ro ngoapu d̄i iwa ro wekimu ro d̄i dou-dou d̄i kampomu au ra wa'u karawi b̄a Ruma d̄i ru'umu ro nawancuku tahona Ruma d̄i nggomi!>>
20 Dou ede lao lalona, ro tampu'u nuntu ro nggahina d̄i dana ro rasa Dekapolis aona Sampuru Kota au ra wa'u karawi b̄a Isa d̄i weki sia. Sara'a dou ma ringa mbora akana.
Isa Al Masih kamori mbalina Ana la Yairus -- Isa Al Masih katahona dou siwe ma supu mboho ra'a
5:21-43
21 Isa lao walina aka ipa b̄ae b̄a ndano. D̄i kengge ndano ede, mboto dou ma mai kahumbu heko Isa. 22 Maira sab̄ua dou ma ngara la Yairus. Sia eded̄u sab̄ua dou mana'ekai uma sambea ro ibadakai d̄i kota ede. Wakatu edana Isa, sia sujuna d̄i tando Isa, 23 ro raho nembana, <<Ruma, ana siwe mada wunga supu na'ena. Ta mai ^dama to'ipu, loakud̄u sia nataho ro aina made!>>
24 Edempara Isa lao samana lab̄o la Yairus. Mboto dou mab̄atu Sia ro naciciku weki, hekona Sia.
25 D̄i ade weki siad̄oho ede wara rau sab̄ua dou siwe ma wa'ura sampuru d̄ua mba'a supu mboho ra'a. 26 Sara'a ntau ro warana nawa'ura mpoi ^dicolakaina dou ma ralo'ina, pala wati wara ma wa'una kataho sia, supuna nanaha ipi tani. 27 Dou siwe ede nawa'ura mboto ringana mab̄oha Isa. Edempara d̄i ade woha dou mamboto ede, sia mai ^denina ta kontu Isa, 28 b̄a one kananu b̄a sia, <<Sura tudu mpa b̄a nahu jumba-Na, nahu ^dimataho!>>
29 Sia tuduna jumba Isa, ro wakatu ede wa'u dengga lalo supu mboho ra'ana. Sia iuna b̄a one sia nawa'ura taho. 30 Wakatu ede wa'u iu b̄a Isa b̄a one wara kuasa ma losa d̄i sarumbu-Na. Edempara Sia tambarina d̄i dou mamboto ede ro sod̄ina, <<Cou ma ratudu jumba Nahu?>>
31 Nggahi anamori^doho-Na, <<Ita ma'edaku b̄a one mboto dou ma cici angi. Ro Ita mbuipu so^dita, cou ma tudu jumba Ita?>>
32 Pala Isa ngge'e mpa tiona d̄i kompe ro pei-Na, nangupaku dou ma wa'ura tudu-Na. 33 Dou siwe ede nab̄adeku au ma wa'ura ndad̄i d̄i wekina, kai ^bi^bi ro dahuna, sia sujuna d̄i tando Isa ro mangakuna. 34 Edempara nggahi Isa d̄i dou siwe ede, <<Ana-Ku, b̄a one nggomi imbimu d̄i Nahu, nggomi wa'ura taho! Laora kai salama. Nggomi wa'ura taho poda!>>
35 Wakatu Isa mbuipu nuntu ro nggahina, pila-pila dou ra kakai b̄a iwa ro weki la Yairus mai ro nggahina d̄i la Yairus, <<Ana siwe Ita nawa'ura made, Ita aina kasusa Guru wali.>>
36 Pala wati kade'enai au ra nggahi b̄a dou-dou ede, nggahi Isa d̄i la Yairus, <<Aina dahu, imbi mpa!>> 37 Edempara Isa lampa walina, pala Sia wati kauna kone sab̄ua dou rau ma b̄atu Sia, selasi la Petrus, Yakub ro la Yahya arina. 38 Wakatu siad̄oho rongga aka uma la Yairus, ta aka Isa edana dou-dou ma ngango ro ringana dou ma nangi nduru. 39 Edempara Isa lu'una ro nggahina d̄i doud̄oho ede, <<^Ba^bauku ngango ro nangi menakaimu? Ana dou ede wati madena, pala sia namaruku!>>
40 Pala siad̄oho harikaina Isa. Edempara Isa kauna losa sara'a doud̄oho ede. Sawa'u b̄a ede Isa wa'ana ama ro ina ana dou ede ro tolu dou anamori-Na lu'u d̄i ade ^bili ana dou ede. 41 Isa nentina rima ana dou ede, edempara nggahina d̄i ana dou ede, <<Talitakum,>> aona, <<Ana siwe, Nahu manggahi d̄i nggomi: tu'ura!>>