Isa Al Masih mbeina ngaha 4.000 dou
8:1-10
(Mat. 15:32-39)
8
D̄i sab̄ua ainaina, wara wali dou mamboto ma mai kab̄oro weki. B̄ara siad̄oho wati wara ^dingaha ro nonona, ndad̄i Isa Al Masih ouna anamorid̄oho-Na ro nggahi-Na, 2 <<Nahu kasi ade-Ku d̄i dou mamboto ake. Wa'ura tolu nai ntoina siad̄oho sama-samana lab̄o Nahu, ro ake siad̄oho wati ntauna ngaha ro nono. 3 Nggara kausi b̄a Nahu dula siad̄oho kai loko ntaru, siad̄oho ^dimambisa d̄i woha ncai. Au walipu d̄i ade weki siad̄oho wara ma ramai ra d̄i hid̄i ma ^do'o.>>4 Cambe b̄a anamori Isa Al Masih, <<D̄i hid̄i ma d̄o'o ro lingi ake, ta b̄eku ^dirakakai b̄a dou ngaha ro nono ma ncihi d̄i ru'u b̄a samenana dou ake?>>
5 <<Pila mbua roti ma wara d̄i nggomi^doho?>> So^di b̄a Isa Al Masih.
<<Pidu mbua,>> cambe b̄a siad̄oho.
6 Edempara Isa Al Masih kauna dou mamboto ede doho d̄i wawo dana, sawa'u b̄a ede, Sia wehana roti pidu mbua ede ro renta-Na syuku d̄i Allah Ta'ala. Edempara to^be-to^bena roti ede kai rima-Na ro mbeina d̄i anamorid̄oho-Na loakud̄u cengga-cenggana d̄i ru'u b̄a doud̄oho ede. Sawa'u b̄a ede anamorid̄oho-Na kalampana au ra kaukai b̄a Isa. 7 Siad̄oho nantau rau pila-pila tembe uta to'i-to'i. Isa wehana uta-uta ede ro rentana syuku d̄i Allah Ta'ala. Edempara kauna anamorid̄oho-Na cengga-cengga uta ede rau. 8-9 Doud̄oho ede ngahana sampe mbocuna – wara takasi 4.000 dou ma ngaha. Sawa'u b̄a ede anamori Isa kab̄orona ma ncewi ra d̄i ngaha ro nono ede – pidu wonca ^bini. Edempara Isa kauna doud̄oho ede dula, 10 ro Sia lab̄o anamori-Na ne'e lalona sampa ro laona aka dana ro rasa Dalmanuta.
Dou-dou Farisi rahona Isa Al Masih karawi ma b̄isa ro guna
8:11-13
(Mat. 16:1-4)
11 Pila-pila dou Farisi mai rakana Isa Al Masih, ro tampu'u cencena lab̄o Sia b̄a ne'ena b̄ab̄u Isa. Siad̄oho rahona d̄i Isa karawi ma^bisa ro guna d̄imandad̄i tanda b̄a one Sia ma ramai ra d̄i Allah Ta'ala.
12 Isa Al Masih wetana d̄ei adena ro nggahi-Na, <<^Ba^bauku dou-dou jaman ake rahokaina Nahu karawi ma^bisa ro guna? Wati! Nahu wati d̄imambei tanda b̄une ede d̄i sia^doho!>>
13 Edempara Isa Al Masih tu'u wi'ina siad̄oho, ro nentena sampa; ro laona aka ipa b̄ae b̄a ndano ede.
Mab̄oha b̄uha dou-dou Farisi ro Herodes
8:14-21
(Mat. 16:5-12)
14 Anamori Isa Al Masih nefana wa'a kancihi roti. Siad̄oho nantau sab̄ua roti mpa d̄i sampa. 15 <<Aina kabare d̄i b̄uha dou-dou Farisi ro b̄uha Herodes,>> nggahi Isa d̄i siad̄oho.
16 Edempara anamori-anamori Isa ede tampu'ura nuntuna mab̄oha lampa rawi ede. Nggahi siad̄oho, <<Nggahi ndedekai Sia, b̄ara ndai wati ntauta roti.>>
17 Isa Al Masih nab̄adeku au ra nggahi b̄a siad̄oho.B̄ara ndedena sod̄i b̄a Sia d̄i siad̄oho, <<^Ba^bauku nggomid̄oho nggahikaimu b̄a one wati ntaumu roti? Sab̄ua nggomid̄oho wati b̄ademu ro wati ngge'epu loamu ka'ao rau? Sab̄ua nggomid̄oho ma sampula podaku? 18 Nggomid̄oho mantau mada -- sab̄ua nggomid̄oho wati loamu eda? Nggomid̄oho mantau fiko -- Sab̄ua wati loamu ringa? Sab̄ua wati ra kawara b̄a nggomid̄oho 19 lima mbua roti ntoina ede ra to^be-to^be b̄a Nahu d̄i ru'u b̄a 5.000 dou? Pila wonca b̄ini ma ncewi ra kab̄oro b̄a nggomi^doho?>>
<<Sampuru ^dua,>> cambe b̄a siad̄oho.
20 <<Ro wakatu to^be-to^be b̄a Nahu pidu mbua roti d̄i ru'u b̄a 4.000 dou,>> sod̄i wali b̄a Isa Al Masih, <<Pila wonca ma ncewi ngaha ro nono ra kab̄oro b̄a nggomi^doho?>>
<<Pidu wonca,>>cambe b̄a siad̄oho.
21 Isa Al Masih nggahi walina, <<Wati ngge'epu loamu ka'ao b̄a nggomi^doho?>>
Isa Al Masih katahona dou mambuda d̄i kota Betsaida
8:22-26
22 Siad̄oho ronggara aka kota Betsaida. Ta ede wa'a b̄a dou sab̄ua dou mambuda d̄i Isa, ro rahona loakud̄u Isa ^damana dou mambuda ede. 23 Edempara Isa nentina rima dou mambuda ede ro ^dandana sia losa ari mai b̄a kota ede. Sawa'u b̄a ede Isa felana mada dou ede, ro tohona rima-Na d̄i mada dou ede, edempara sod̄ina d̄i sia, <<Sab̄ua nggomi maloa eda au-au ake?>>
24 Dou ede cobana ntanda, edempara nggahina, <<Io, mada kaloa eda dou malampa-lampa; pala siad̄oho ^di'eda b̄a mada b̄une fu'u haju.>>
25 Toho wali b̄a Isa rima-Na d̄i mada dou ede. Sakali ake dou ede na'usahaku ntanda sawa'u-wa'una. Tahora madana, ro sia na'eda sara'aku kai taroa poda. 26 Edempara Isa nggahina d̄i dou ede, <<Dulara, ro aina lu'u mbali aka kampo ede.>>
Mangaku la Petrus mab̄oha Isa Al Masih
8:27-30
27 Isa Al Masih ro anamorid̄oho-Na laona aka desa-desa d̄i kompe ro pei Kaisarea Filipi. D̄i woha ncai sod̄i b̄a Isa d̄i siad̄oho, <<Ra nggahi b̄a dou, couku Nahu ake?>>
28 Cambe b̄a siad̄oho, <<Wara ma nggahi: la Yahya Mataki kandeu raso dou; wara rau ma nggahi la Elia, ro ma kalai wali manggahi: sab̄ua dou ade weki nabi.>>
29 <<Pala nggahi ndai nggomid̄oho, Nahu ake cou?>> So^di b̄a Isa Al Masih.
Cambe b̄a la Petrus, <<Ita Al Masih eded̄u Sangaji Makasalama!>>
30 Edempara Isa Al Masih ngoa ro kawarana siad̄oho, loakud̄u wati ngoana d̄i cou-cou rau mab̄oha weki ndai-Na.
Isa Al Masih ngoana mab̄oha susa ro ncoki-Na ro mab̄oha madekai-Na
8:31–9:1
31 Sawa'u b̄a ede, Isa tampu'ura ngoa ro teina anamori^doho-Na, b̄a one Sia ede Ana Manusia pab̄uaku mboto iuna susa ro ncoki, ro ^ditula ao b̄a dou-dou mana'ekaina, dou-dou mana'ekai imam, ro ahli-ahli Taurat. Sia ^dihade, pala d̄i ainaina katolukaina Sia ^dimamori mbali. 32 Isa ngoa kab̄aena lampa rawi ede d̄i anamori^doho-Na. Edempara la Petrus ra^bi wa'ana Isa Al Masih d̄i kompena, ro rojona Sia. 33 Pala Isa tambarina ro tiona anamori^doho-Na, edempara rojona la Petrus, <<Pesopu wekimu ta ede, Iblis! Fiki ro kananumu ede fiki ro kananu manusia; laina fiki ro kananu Allah Ta'ala!>>
34 Edempara Isa Al Masih ouna dou mamboto ma wara ta ede sama-sama lab̄o anamori^doho-Na. Edempara Sia nggahina d̄i doud̄oho ede, <<Dou ma ne'e b̄atu Nahu, dou ede pab̄uaku aina kananuna au ma penti d̄i ru'u b̄a weki ndaina, sawa'u b̄a ede tundu salibna, ro b̄atuna Nahu. 35 B̄a one dou ma ne'e sandaka nawana, ^dimambora nawana. Pala dou ma koroba morina d̄i ru'u b̄a Nahu ro d̄i ru'u b̄a Haba Mataho ma ramai ra d̄i Allah Ta'ala, sia nakasalamaku nawana. 36 Auku d̄iraka b̄a sab̄ua dou, nggara sara'a dunia ake ndad̄i ntauna, pala sia mbora morina? 37 Sab̄ua loaku mori ede cepe kai au-au?
38 Nggara sab̄ua dou namajasi mangaku Nahu ro au ra ngoa ro tei b̄a Nahu d̄i jaman maduruhaka ro iha ro dab̄ae ake, Ana Manusia namaja rau mangaku dou ede, wakatu Sia maina pea kai kuasa Ama-Na, ^dende b̄a mala'eka-mala'eka ma raso.>>