Isa Al Masih mori mbalina
16:1-8
16
Sawa'u b̄a kalalo ainaina Sabat, la Maria Magdalena, Maria ina la Yakub ro la Salome lao welina marakani lo'i ^diborekaina timba Isa Al Masih. 2 Aimasi^di-si^di poda wakatu wontu liro, d̄i ainaina sarambakaina minggu ede, siad̄oho laona aka rade. 3-4 D̄i woha ncai siad̄oho nggahina d̄i sab̄ua lab̄o ma kalaina, <<Couku ma loana bantu ndai ^dimakiri peso wadu ^bontokai karombo rade?>> B̄a one wadu ede na'ipiku na'ena. Pala wakatu siad̄oho ronggana d̄i rade, siad̄oho edana wadu ede nawa'ura kiri weki. 5 Edempara siad̄oho lu'una ade rade ede. Ta ^deina d̄i wela wanana, eda b̄a siad̄oho sab̄ua dou sampela ma kani jumba lanta ma wunga doho, ro siad̄oho we^dina.6 Nggahi dou sampela ede, <<Aina dahu! Nahu ka^badeku nggomid̄oho mangupaku Isa Al Masih dou Nazaret ra salib ede. Sia wati warana ta ake. Sia nawa'ura mori mbali! Tiopu, ake hid̄i ra karukai Sia. 7 Ake laora, karonggapu haba ake d̄i anamori^doho-Na, ro d̄i la Petrus rau. Nggahipu, <Sia malao ulu aka Galilea. Ta aka nggomid̄oho d̄ima'eda angi lab̄o Sia, b̄une ra wa'u nggahi-Na d̄i nggomi^doho.> >>
8 Ndad̄i siad̄oho losana d̄i rade ede edempara raina b̄ara wed̄i ro dahuna. Siad̄oho wati nggahina au-au d̄i cou-cou rau, b̄ara dahuna.
CUMPUKAINA BUKU MARKUS ^BATU NGGAHI MA NTOI
Isa Al Masih katadana weki d̄i la Maria Magdalena
16:9-11
9 Sawa'u b̄a mori mbali Isa Al Masih ra d̄i madekaina, aimasi^di-si^di d̄i ainaina Ahad, saramba-rambakaina Isa katadana weki d̄i la Maria Magdalena. D̄i la Maria ede parana kalosa b̄a Isa pidu roh setan. 10 Edempara la Maria Magdalena lao ngoana mandad̄i ede d̄i lenga-lenga Isa, ma wunga ncoki ade ro nangi. 11 Pala wakatu ringa b̄a siad̄oho b̄a one Isa nawa'ura mori mbali, ro la Maria ma wa'ura eda Isa, siad̄oho wati imbina.
Isa Al Masih katadana weki d̄i d̄ua dou anamori-Na
16:12-13
(Luk. 24:13-35)
12 Sawa'u b̄a ede Isa Al Masih katadana weki d̄i d̄ua dou anamori-Na ma wunga lampa ro lao aka sab̄ua kampo. 13 Ndad̄i siad̄oho dula mbalina ro ngoana lampa rawi ede d̄i lenga^dohona ma kalai. Pala siad̄oho wati imbina.
Isa Al Masih katadana weki d̄i anamorid̄oho-Na
16:14-18
14 Cumpukaina, Isa Al Masih katadana weki d̄i sampuru sab̄ua anamori-Na, wakatu siad̄oho wunga ngahana. Sia rojona siad̄oho b̄ara siad̄oho wati imbina ro na'ipiku tera tutana, ndad̄ina wati imbina d̄i dou-dou ma wa'ura eda b̄a ndaina b̄a one Isa wa'ura mori mbali. 15 Edempara Isa nggahina d̄i siad̄oho, <<Laora aka sara'a dunia ro ngoa ro kahabapu Injil d̄i samenana manusia. 16 Dou ma wati imbi ^dihukum. Pala dou ma imbi ro d̄ikandeu raso, ^dimasalama. 17 D̄i bukutikai b̄a one siad̄oho imbina, dou-dou ede naloa katesa roh setan kai ngara Nahu; siad̄oho ^dimanuntu ro nggahi kai bahasa-bahasa ra wati b̄ade b̄a ndai siad̄oho. 18 Nggara siad̄oho nanentisi sawa atao nanonosi racu, siad̄oho wati ^dimamade. Nggara siad̄oho natohosi rimana ese wawo dou-dou ma supu, dou-dou ede ^dimataho.>>
Isa Al Masih hanta lao ese saroga
16:19-20
19 Sawa'u b̄a Ruma Isa nuntuna lab̄o siad̄oho, Sia hanta lao ese saroga. Ta aka Sia naparenta sama-sama lab̄o Allah Ta'ala. 20 Edempara anamorid̄oho-Na lao ro ngoa ro kahabana haba ma taho d̄i sara'a dunia. Ruma rau b̄atu karawi sama-sama lab̄o siad̄oho ro nakatadaku bukutina kai rawi ma^bisa ro guna b̄a one au ra kahaba b̄a siad̄oho ede napodaku.