9
<<D̄i ^bademu!>> Nggahi Isa. <<D̄i ade weki nggomid̄oho ta ake wara ma wati ^dimamade, sawatipu b̄a edana karaja'an Allah kai kuasa!>>Isa Al Masih kad̄ese ro kantasa ese wawo doro
9:2-13
2 Ini nai sawa'u b̄a ede, Isa wa'ana la Petrus lab̄o la Yakub ro la Yahya, teka d̄i sab̄ua doro ma ^dese. D̄i hid̄i ede, wati wara dou makalai selasi siad̄oho mpoa mpa. D̄i tando mada siad̄oho Isa rungka weki. 3 Kani ro lombona ndad̄i lanta kancilo. Wati wara kone sab̄ua dou rau d̄i dunia ake ma wa'u du^ba kalanta b̄une lanta ede. 4 Ndad̄i tolu dou anamori-Na ede edana Isa ma nuntu lab̄o nabi Elia ro nabi Musa. 5 Edempara nggahi la Petrus d̄i Isa, <<Guru, nawancuku sana ndai ta ake. Satahona madad̄oho matu'u tolu mbua kema: sab̄ua d̄i ru'u b̄a Ita, sab̄ua d̄i ru'u nabi Musa, ro sab̄ua wali d̄i ru'u b̄a nabi Elia.>> 6 Sapodakaina la Petrus wati b̄adena auku d̄ipab̄ua nggahina, b̄ara sia lab̄o lengana d̄uana ede na'ipiku dahuna.
7 Edempara londo apu ma^bonto siad̄oho ro ade apu ede wara ringa eli ma nggahi, <<Akeku Ana ra meci b̄a Nahu, ringa ro kade'epu Sia!>> 8 Siad̄oho roci tiona d̄i kompe ro peina, pala watid̄u eda walina cou-cou rau ta ede ma sama-sama lab̄o siad̄oho, selasi Isa Al Masih mpoa mpa. 9 Wakatu siad̄oho londona d̄i doro ede, Isa ngoa ro kawarana siad̄oho, <<Aina ngoamu d̄i cou-cou rau au ra eda b̄a nggomid̄oho akande sawatipu b̄a Ana Manusia ^dikamori mbali ra d̄i madekai-Na.>>
10 Siad̄oho b̄atuna au ra ngoa b̄a Isa ede, pala d̄i ade weki siad̄oho tampu'ura cua sod̄ina d̄i sab̄ua lab̄o ma kalaina auku aona nggahi Isa <<mori mbali ra d̄i madekai-Na>>. 11 Edempara sod̄i b̄a siad̄oho d̄i Sia, <<^Ba^bauku guru-guru agama nggahikaina b̄a one nabi Elia pab̄uaku mai uluna?>>
12 Cambe b̄a Isa Al Masih, <<La Elia poda mai uluna d̄imakanggorina samenana au-au. Pala b̄uneku lampa rawi mab̄oha Ana Manusia? ^Ba^bauku d̄i ade Kitab Suci wara ratunti b̄a one Sia d̄ima'iu mboto susa ro ncoki ro ^dikatuna ro kab̄awa b̄a dou? 13 Pala Nahu manggahi d̄i nggomi^doho: la Elia nawa'ura mai, pala dou-dou nakarawi b̄e rane'e siad̄oho d̄i sia, ede ncihi ncao lab̄o ratunti ade Kitab Suci mab̄oha weki ndaina.>>
Isa Al Masih katahona ana dou ra lu'ukai b̄a roh setan
9:14-29
14 Wakatu Isa lab̄o tolu dou anamori-Na kab̄oro weki wali lab̄o anamori-Na ma kalai, eda b̄a siad̄oho mboto dou ta ede. Pila-pila dou ahli Taurat wunga cence ncihina lab̄o anamori Isa ede. 15 Ndede eda b̄a dou-dou ede Isa, siad̄oho mbora akana, edempara rai aona Sia. 16 <<Ausi cencekai nggomid̄oho lab̄o ahli-ahli Taurat ede?>> So^di b̄a Isa d̄i anamori^doho-Na.
17 Sab̄ua dou d̄i ade weki dou mamboto ede cambena, <<Guru, mada mamai wa'a ana mada d̄i Ita. Sia nampongi b̄ara lu'ukai b̄a roh setan. 18 Nggara ana dou ede namai deisi b̄a roh setan, ndad̄i ana dou to'i ede na^bate-^bateku sarumbuna d̄i dana, oi felana nakabubu d̄i asana, nandu'uku woina, ro sara'a sarumbuna nakiro. Mada wa'ura rahoku d̄i anamori Ita loakud̄u kalosana roh setan ede, pala siad̄oho wati wa'una katesa roh setan ede.>>
19 Edempara nggahi Isa d̄i siad̄oho, <<Nawancu podaku nggomid̄oho ake! Nggomid̄oho poda-poda dou ma wati imbi. Sampe b̄une aiku Nahu pab̄uaku midi sama lab̄o nggomid̄oho ro lembo ade d̄i nggomid̄oho? Wa'a ca'arapu ana dou ede!>> 20 Edempara wa'a b̄a siad̄oho ana dou ede d̄i Isa.
Ndede roh setan ede edana Isa, roh setan ede kandad̄ina sarumbu ana dou ede kiro, ndad̄ina ana dou to'i ede mab̄u kali worena d̄i dana. Asana b̄ini b̄a oi fela ma kabubu. 21 Edempara sod̄i b̄a Isa d̄i amana, <<Sa^bunera ntoina sia ndakena?>>
<<Ra'aipu to'i wa'una!>> Cambe b̄a amana. 22 <<Wa'ura ntuwu poda roh setan ede ne'ena hade sia, randa kalu'una sia d̄i ade afi atao d̄i ade oi. Pala nggara Ita taloasi bantu, kasi to'ipu adeta d̄i madad̄oho ro bantu to'ipu mada^doho!>>
23 <<Bune nggahimu? Nggara loasi b̄a Ita?>> Cambe b̄a Isa Al Masih. <<Sara'ana loa, d̄i ru'u b̄a dou ma imbi!>>
24 Ama ede kanggica lalona, <<Ruma, mada ka'imbi. Pala bantu to'ipu mada loakud̄u ncewi imbi wali!>>
25 Wakatu Isa Al Masih edana b̄a one mboto dou matampu'u mai kab̄oro weki ro hekona Sia, parenta b̄a Sia roh setan ede kai nggahi-Na, <<Roh makamaina mpinga ro mpongi, Nahu maparenta nggomi losapu d̄i ana dou ake, ro aina lu'u walimu d̄i ana dou ake!>>
26 Roh setan ede kanggicana, edempara kandad̄ina sarumbu ana dou ede kiro, ro roh setan ede losana d̄i ana dou ede. Ana dou ede d̄i edamu b̄une timba, ndad̄ina sara'a dou nggahina, <<Sia nawa'ura made!>> 27 Pala Isa nentina rima ana dou ede ro katu'una.
28 Sawa'u b̄a Isa lu'una d̄ei uma, anamorid̄oho-Na mai rakana Sia ro sod̄ina, <<^Ba^bauku madad̄oho wati loakaimu katesa roh setan ede?>>
29 Cambe b̄a Isa, <<Roh setan b̄une ede wati loa ^dikatesa kalosa kai cara au-au rau, selasi kai do'a.>>
Isa Al Masih ngoa walina mab̄oha madekai-Na
9:30-32
30 Isa lab̄o anamorid̄oho-Na tu'u wi'ina hid̄i ede ro lao lampa walina aka Galilea. Isa wati ne'ena b̄ade b̄a dou ta b̄e warakai Sia, 31 b̄a one Sia wunga ngoa ro teina anamori^doho-Na. <<Nahu, Ana Manusia ^di^donggo d̄i kuasa manusia,>> ndede nggahi Isa, <<ro Sia ^dihade, pala d̄i ainaina katolukaina Sia ^dimamori mbali!>>
32 Anamori^doho-Na wati loana ka'ao au ra ngoa ro tei b̄a Isa, pala siad̄oho nadahuku sod̄i d̄i Sia.
Couku ma ipi penti?
9:33-37
33 Siad̄oho ronggara d̄i Kapernaum. Sawa'u b̄a rongga d̄i uma, Isa sod̄ina d̄i anamori^doho-Na, <<Au cence ncihi nggomid̄oho d̄i woha ncai akande?>>
34 Siad̄oho wati cambena, b̄a one d̄i woha ncai siad̄oho cence ncihina mab̄oha couku ma ipi penti d̄i ade weki siad̄oho. 35 Isa dohona, edempara ouna sampuru d̄ua anamori-Na ede. Nggahi Sia d̄i anamori^doho-Na, <<Dou ma ne'e ndad̄i sarambakaina, sia pab̄uaku ndad̄i ma cumpukai ro pab̄uaku ndad̄i ada d̄i ru'u b̄a samenana dou.>> 36 Edempara Isa wehana sab̄ua ana dou to'i ro kaki^dina ana dou to'i ede d̄i tando siad̄oho sara'a. Pohu b̄a Isa ana dou to'i ede ro nggahina d̄i anamori^doho-Na, 37 <<Dou ma tarima ana dou to'i b̄une ake b̄ara Nahu, ede aona natarimaku Nahu. Ro dou ma tarima Nahu, sia laina tarimana Nahu mpoa, pala natarima rauku Sia ma ranggadu Nahu.>>
Sab̄ua dou ma laina ana mori Isa Al Masih katesana roh setan
9:38-41
(Luk. 9:49-50)
38 Edempara nggahi la Yahya d̄i Isa, <<Guru, madad̄oho edamu sab̄ua dou makatesa setan kai ngara Ita. Ro madad̄oho kantamu dou ede b̄ara sia laina lenga ndaita.>>
39 Pala nggahi b̄a Isa, <<Aina kantamu dou ede, b̄a one wati wara kone sab̄ua dou rau ma karawi ma^bisa ro guna kai ngara Nahu, ma wakatu ede wa'u ma loa kab̄awa ro katuna Nahu. 40 B̄a one dou ma wati musu ndaita, ede aona nahoruku ndaita. 41 Kawarapu! Dou ma mbei oi nono sacanggi d̄i ru'u b̄a nggomi b̄ara nggomid̄oho dou ma imbi d̄i Al Masih eded̄u Sangaji Makasalama, dou ede tantu d̄imatarima ufana.>>
Lampa rawi-lampa rawi ma kandad̄ina dou karawi dosa
9:42-50
42 <<Cou-cou makandad̄ina sab̄ua dou d̄i ade weki ana dou to'i ake watid̄u imbi walina d̄i Nahu, nancewi tahopu dou ede d̄iki tero kai wadu nggirukai d̄i wo'ona, sawa'u b̄a ede lo'o tau d̄i ade moti. 43 Nggara rimamu makamaina nggomi dosa, dompopu rimamu ede! Nancewi tahopu nggomi morimu lab̄o Allah Ta'ala kone wati wara sa^bae rimamu ntewikaisi nggomi morimu lab̄o ^bali b̄ae rimamu pala lu'u ade anaraka, eded̄u afi ma ede ro hi^di. 44 Ta aka afi wati ^dimamade-made, ro kako wati ^dimamade-made. 45 Ro nggara e^dimu makamaina nggomi dosa, dompopu e^dimu ede. Nancewi tahopu nggomi morimu lab̄o Allah Ta'ala konena wati wara e^dimu sa^bae, ntewikaisi nggomi mori lab̄o e^dimu ^bali ^bae, pala ^dipaki d̄i ade anaraka. 46 Ta aka afi wati ^dimamade-made ro kako wati ^dimamade-made. 47 Nggara madamu makamaina dosa, cingga pakipu isi madamu ede! Nancewi tahopu nggomi lu'umu d̄i ade Karaja'an saroga kone wati wara sa^bae madamu, ntewikaisi nggomi lab̄o madamu ^bali ^bae, pala ^dipaki d̄i ade anaraka. 48 Ta aka afi wati ^dimamade-made ro kako wati ^dimamade-made.
49 B̄a one sanikina dou ^dikaraso kai afi.
50 Sia ede taho, pala nggara sia nawa'usi ra ca^ba, sab̄ua loaku d̄i kandanga mbali? Ndad̄i, pab̄uapu nggomid̄oho ndad̄imu b̄une sia -- mori sama-samapu kai taho ro meci angi.