Parenta Allah Ta'ala ro rawi rasa dou Yahudi
7:1-13
(Mat. 15:1-9)
7
Pila-pila dou Farisi ro ahli-ahli Taurat ma ramai ra d̄i Yerusalem mai rakana Isa. 2 Siad̄oho na'edaku pila-pila dou anamori Isa ma ngaha kai rima ma wati raso b̄atu atoran agama.3 Dou-dou Farisi, ndede rau sara'a dou Yahudi, nawancuku to'ana b̄atu lampa rawi ra nginakai b̄a wa'i ro waro siad̄oho.Siad̄oho wati ^dimangaha, sawatipu waca wa'una rima b̄une cara ra wa'u katantukai. 4 Au ra welina d̄i amba wati loa ^dingaha lalo, sawatipu b̄a waca wa'u. n Ro mbotopu atoran makalai ra nginakai b̄a wa'i ro waro siad̄oho ma mbuipu nenti kacia b̄a sia^doho; misakai cara alo gla, mangko, ro tau ro tu'i ra ndawi kai romba.o
5 B̄ara ndedena dou-dou Farisi ro ahli-ahli Taurat ede sod̄ina d̄i Isa, <<^Ba^bauku anamori-Mu wati waca wa'una rima sawatipu ngahana? ^Ba^bauku siad̄oho wati ^batukaina rawi ranginakai b̄a wa'i ro waro ndaita?>>
6 Cambe b̄a Isa Al Masih, <<Ncihi romo nggahi ro eli Ruma ra karongga b̄a Nabi Yesaya mab̄oha nggomid̄oho, oe dou-dou munafik! ^Bune wara ratunti:
Dou-dou ede nembana Nahu kai nggahi ro eli mpoa mpa,
pala ade siad̄oho d̄o'o d̄i Nahu.
7 Bata mpoa mpa siad̄oho nembana Nahu,
b̄a one atoran manusia ra tei b̄a siad̄oho
sapodakaina ede laina atoran Nahu!>
8 Parenta-parenta Allah Ta'ala wati b̄atu b̄a nggomid̄oho, ro atoran-atoran manusia nenti kacia b̄a nggomid̄oho.>>
9 Edempara nggahi wali Isa Al Masih, <<Nggomid̄oho maloa podaku tula parenta Allah Ta'ala loakud̄u ngge'e mpa nenti kaciamu au ra ngoa ro tei b̄a ndaimu. 10 Nabi Musa nawa'ura mbei parenta ake, <Lia ro horomapu ama ro inamu,> ro cou-cou ma'i'a ro ^ba'a ama ro inana, pab̄uaku d̄ihukum made.> 11 Pala nggomid̄oho mangoa ro teiku: Nggara dou nanggahisi d̄i dou matuana, <Au ma pab̄ua d̄imbei b̄a mada d̄i ru'u ama ro ina, wa'ura d̄onggo ro mbei b̄a mada d̄i Allah Ta'ala,> 12 ndad̄i nggomid̄oho wati kau pa^buamu dou ede kalampa su'u ro tundu d̄i ru'u b̄a ama ro inana. 13 Ndad̄i au ra ngoa ra tei b̄a ndai^dohomu d̄i doud̄oho ede, nggomid̄oho makamboraku nggahi ro eli Allah Ta'ala. Mbuipu mboto walina lampa rawi b̄une ake ra karawi b̄a nggomid̄oho.>>
Lampa rawi ma kasampu ro ma kanggelena dou
7:14-23
(Mat. 15:10-20)
14 Edempara Isa Al Masih ouna sakali wali dou mamboto ede ro nggahina d̄i siad̄oho, <<Ringa ro kade'e kab̄aepu loakud̄u loamu ka'ao! 15 Wati wara au-au ma ramai ta ari lua ma lu'u d̄i dou ma loana kandad̄i dou ede najis. Pala ma ralosa ra d̄i sab̄ua dou, edeku ma kanajisna. 16 Ndad̄i, nggara mantausi fiko, ringa ro kade'epu.>>
17 Wakatu Isa Al Masih tu'u wi'ina dou mamboto ede ro lu'una d̄ei uma, anamorid̄oho-Na sod̄ina d̄i Sia auku aona conto ro ibara ede. 18 Edempara Isa nggahina d̄i siad̄oho, <<Sab̄ua nggomid̄oho wati ngge'epu loamu ka'ao? Sab̄ua nggomid̄oho wati loamu ka'ao b̄a one ma ralu'u d̄ei sab̄ua dou wati loana kandad̄i dou ede najis? 19 B̄a one ma ralu'u ede wati lu'una d̄ei ade, pala nalu'u ade loko, edempara losa d̄i jamba.>> Kai nggahi ro elina ede, Isa nakatadaku b̄a one sara'ana ngaha ro nono halal.
20 Edempara Isa Al Masih nggahi walina, <<Ma ralosa ra d̄i dou, edeku ma kasampuna sia. 21 B̄a one ra ta d̄ei ade maikaina fiki ro kananu madab̄ae ma kandad̄ina dou karawi madab̄ae, mpanga, hade dou, 22 jina, kukukeko, fitina, ro dou ma karawi sara'a madab̄ae, na'e ade, wati ngawana ka'awa weki, hiana, sombo, ro ncoki d̄ingoa ro tei. 23 Sara'a ma iha ro dab̄ae ede ma ramai d̄ei maina, edeku ma kanajisna dou.>>
Imbi sab̄ua dou siwe Kana'an
7:24-30
(Mat. 15:21-28)
24 Sawa'u b̄a ede Isa Al Masih tu'u wi'ina hid̄i ede, ro laona aka dana ro rasa ^deni lab̄o kota Tirus. Sia lu'una d̄ei sab̄ua uma ro wati ne'ena d̄i b̄ade b̄a dou b̄a one Sia wara d̄i uma ede. Pala Sia wati loana cili weki. 25 Wara sab̄ua dou siwe, ana siwena ra lu'ukai b̄a roh setan, naringaku mab̄oha Isa. Sia maina d̄i Isa ro sujuna d̄i tando Isa, 26 narahoku loakud̄u Isa katesa roh setan d̄i anana ede. Dou siwe ede dou Yunani, rawarakaina d̄i dana ro rasa Fenisia d̄i Siria. 27 Nggahi Isa d̄i sia, <<^Dambe-^dambe to'i pab̄uaku paha kambocu ulu. Wati tahona weha wea ngaha ro nono d̄ambe to'i, sawa'u b̄a ede mbei d̄i lako.>>
28 <<Ncihi romo Ruma,>> cambe b̄a dou siwe ede, <<pala lako-lako ma wara awa wombo meja rau nangaha sewi-sewi ra b̄ab̄u b̄a d̄ambe-d̄ambe to'i!>>
29 Edempara Isa Al Masih nggahina d̄i sia, <<B̄ara nggahimu ede, dulara; roh setan nawa'ura losa d̄i anamu!>>
30 Dou siwe ede dulana d̄i umana ro sia edana anana ma wunga maru d̄i hid̄i marukai, ro roh setan nawa'ura losa.
Isa Al Masih katahona sab̄ua dou ma mpongi ro mpinga
7:31-37
31 Sawa'u b̄a ede Isa Al Masih tu'u wi'ina dana ro rasa Tirus, ro lampa sai-Na Sidon lao aka Ndano Galilea. Sia lampana ta ncai ma lampa sai dana ro rasa Dekapolis. 32 Ta ede wa'a b̄a dou d̄i Sia sab̄ua dou ma mpongi ro mpinga. Raho b̄a siad̄oho d̄i Isa loakud̄u toho to'ina rima-Na ese wawo dou ede. 33 Isa wa'a peso kalaina dou ede ra d̄i dou mamboto, edempara kalu'una kangge-Na d̄i ^bali b̄ae fiko dou ede. Edempara fela b̄a Isa, ro ^damana lera dou ede. 34 Sawa'u b̄a ede Isa ^dongana langi, edempara hintina nawa-Na ro nggahi-Na d̄i dou ede, <<Efata,>> aona <<Henggara weki!>>
35 Edempara fiko dou ede loana ringa ro lerana ndad̄i mapu mbali, ro sia tampu'ura loana nuntu. 36 Edempara Isa Al Masih kantana siad̄oho sara'a nuntu d̄i cou-cou rau mab̄oha lampa rawi ede. Pala nanaha kanta b̄a Isa, nanaha edeku kambou b̄a siad̄oho. 37 Ro samenana dou ma ringana ede nawancuku mbora akana. Nggahi siad̄oho, <<Sara'a ra karawi-Na kai taho! Sia nakandad̄iku dou mampinga naloa ringa ro dou mampongi naloa nuntu!>>