Mafaka ne'e hade Isa Al Masih
26:1-5
26
Wakatu Isa nggori ngoa ro tei sara'ana ede, nggahi Sia d̄i anamori^doho-Na, 2 <<Nggomid̄oho mab̄adeku d̄i d̄ua nai wali Aruraja Paskah, ro Nahu, Ana Manusia ^di^donggo loakud̄u ^disalib!>>3 D̄i wakatu ede, dou-dou mana'ekai imam ro dou-dou matuakai Yahudi kab̄orona weki aka asi Imam Agung ma ngara la Kayafas. 4 Siad̄oho mafakana ne'e wa'u ro leto Isa kai nari-nari ro hade Sia. 5 Pala nggahi b̄a sia^doho,<<Pala, aina wakatu Aruraja, loakud̄u dou-dou mab̄atu Sia wati ngango ro ngorana.>>
Isa Al Masih lua b̄a dou siwe kai mina mengi d̄i kota Betania
26:6-13
6 Wakatu Isa warana aka Betania, d̄i uma la Simon ma rasupu ncola ntoina, 7 Isa mai raka b̄a sab̄ua dou siwe ro wa'ana sab̄ua boto marmar isina mina mengi ma nggali co'i. Mina mengi ma nggali co'i ede lua b̄a sia ese wawo tuta Isa ma wakatu ede wunga doho ngaha. 8 Edana lampa rawi ede, anamori-anamori Isa ndad̄i mbani. Siad̄oho nggahina, <<^Ba^bauku ^dipaki ka'ihakai? 9 Mina mengi ede loa ^dilanda kai co'i ma nggali, ro pitina loa d̄imbei d̄i dou mancoki mori!>>
10 Isa nab̄adeku fiki ro kananu siad̄oho, edempara nggahi Sia, <<^Ba^bauku ngangokai b̄a nggomid̄oho mab̄oha dou siwe ake? Sia nakarawiku ma taho d̄i ru'u b̄a Nahu. 11 Dou mancoki mori ngge'e mpa warana d̄i woha nggomid̄oho, pala Nahu wati ^dimangge'e santoi-ntoina d̄i woha nggomid̄oho. 12 Kai b̄uina mina mengi ede d̄i sarumbu Nahu, sia ka'ambina weki ^di'umbukai Nahu. 13 Imbipu d̄i sara'a dunia ta b̄e-b̄e rau Haba Mataho ra d̄i Allah Ta'ala d̄ingoa ro kahaba, ndad̄i au ra karawi b̄a dou siwe ake rau d̄i nuntu rau b̄a dou tanda kawarakai sia.>>
La Yudas nangawa d̄onggo Isa Al Masih d̄i dou-dou ma musu-Na
26:14-16
14 Edempara sab̄ua dou d̄i ade weki sampuru d̄ua anamori Isa, ma ngara la Yudas Iskariot. Sia lao rakana dou-dou mana'ekai imam. 15 Nggahi sia d̄i siad̄oho ede, <<Auku d̄imbei b̄a itad̄oho d̄i ru'u b̄a mada, nggara mada ka^donggosi Isa d̄i ita^doho?>> Edempara siad̄oho rekena tolu mpuru piti salaka ro d̄onggona d̄i la Yudas. 16 Tampu'u ede la Yudas ngupana wakatu ma taho d̄i ^donggokaina Isa d̄i dou-dou ma musu-Na.
Isa Al Masih ngaha Paskahna lab̄o anamorid̄oho-Na
26:17-25
17 D̄i ainaina masarambakaina ade Aruraja Roti Ma Wati Kani ^Buha, anamori Isa mai rakana Sia ro sod̄i b̄a siad̄oho, <<Ta b̄eku ^dine'ekai b̄a Ita hid̄i ^dika'ambi weakai b̄a madad̄oho ngaha ro nono Paskah d̄i ru'u b̄a Ita?>>
18 Cambe b̄a Isa, <<Laopu aka sab̄ua dou d̄i kota ro nggahipu d̄i sia, <Nggahi Guru, wa'ura raka wakatuna d̄i ru'u b̄a Nahu; Nahu kane'e kandiha Paskah d̄i umamu sama-sama lab̄o anamori^doho-Ku.> >>
19 Anamori-anamori Isa kalampana au ra kaukai b̄a Isa d̄i siad̄oho.Siad̄oho lao ka'ambina ngaha ro nono Paskah ede.
20 Sawa'u b̄a nga^di ai, Isa ro anamorid̄oho-Na ma sampuru d̄ua dou ede doho ngahana. 21 Wakatu siad̄oho wunga ngahana, nggahi Isa, <<Nggomid̄oho ringa ro kade'epu: Sab̄ua dou d̄i ade weki nggomid̄oho d̄imad̄onggo Nahu d̄i dou-dou ma musu Nahu.>>
22 Ringana nggahi ndede Isa, sara'a anamorid̄oho-Na nawancuku ncoki mena adena. Edempara siad̄oho, sab̄ua-sab̄ua dou sod̄ina d̄i Isa, <<Tantu laina mada ra nggahi b̄a Ita ede Ruma?>>
23 Cambe b̄a Isa, <<Dou ma ^deta roti sama-sama lab̄o Nahu d̄i ade sab̄ua mangko, sia edeku d̄imad̄onggo Nahu d̄i dou-dou ma musu Nahu. 24 Ncihi romo b̄a one Nahu, Ana Manusia d̄imamade b̄une ra tunti ade Kitab Suci. Pala ihara dou ma ra^donggona Ana Manusia ede d̄i dou-dou ma musu-Na! Nancewi tahopu nggara dou ede wati ranggana b̄a inana!>>
25 Edempara la Yudas ^dima^donggo-Na ede nggahina, <<Tantu laina mada ra nggahi b̄a Ita, Guru?>>
Cambe b̄a Isa, <<Ndedeku nggahi b̄a nggomi!>>
Do'a Jamu Ruma
26:26-30
26 Wakatu siad̄oho wunga ngahana, Isa wehana roti, edempara do'a syukuna. Sawa'u b̄a ede Sia to^be-to^bena roti ede kai rima-Na, edempara mbeina d̄i anamori^doho-Na, ro nggahi-Na, <<Weha ro ngahara; akeku sarumbu Nahu.>>
27 Sawa'u b̄a ede Sia wehana gla anggo, edempara do'a syukuna d̄i Allah Ta'ala. Sawa'u b̄a ede Sia d̄onggona gla ede d̄i anamorid̄oho-Na ro nggahina, <<Nonora nggomid̄oho. 28 B̄a one akeku ra'a Nahu ma kasahana au ra sake b̄a Allah Ta'ala – ra'a ra ^boho d̄i ru'u b̄a dou mamboto ro ^dikangampu weakai dosa siad̄oho. 29 Nahu manggahi d̄i nggomid̄oho, <Nahu wati ^dimanono anggo ake wali sampe rakakai wakatuna Nahu nonoku anggo ma b̄ou sama-sama lab̄o nggomid̄oho d̄i Karaja'an Ama-Ku.>>>
30 Sawa'u b̄a ede siad̄oho rawana sab̄ua rawa roi ro wadi, edempara Isa ro anamorid̄oho-Na laona aka Doro To'i Zaitun.
Isa Al Masih ngoa ro kawarana b̄a one la Petrus ^dimakawati pata Isa Al Masih
26:31-35
31 Edempara Isa nggahina d̄i anamori^doho-Na, <<D̄i aimangad̄i ake wa'u nggomid̄oho sara'ana ^dimarai tu'u wi'i Nahu; b̄ara ade Kitab Suci wara ratunti: Nggahi Allah Ta'ala, <Nahu ^dimahade dou ma ompukai jimba ede, ro jimba-jimbana d̄imambari mbura.> 32 Pala sawa'u b̄a Nahu mori mbaliku, Nahu d̄imalao ulu aka Galilea.>>
33 Nggahi la Petrus d̄i Isa, <<Co'opu siad̄oho sara'a tu'u wi'ina Ita, Guru, pala mada wati d̄imatu'u wi'i Ita!>>
34 Nggahi b̄a Isa d̄i la Petrus, <<Kawarapu Petrus, d̄i aimangad̄i ake wa'u, sawatipu b̄a koko janga, nggomi tolu kali nggahimu b̄a one nggomi wati patamu Nahu!>>
35 Cambe b̄a la Petrus, <<Kone kamade sama lab̄o Ita, mada wati ^dimanggahi b̄a one mada wati pataku Ita!>>
Sara'a anamori Isa ma kalai nggahi ndede rauna.
Isa Al Masih do'ana d̄i Getsemani
26:36-46
36 Sawa'u b̄a ede Isa laona lab̄o anamorid̄oho-Na aka sab̄ua hid̄i ngarana Getsemani. Ta aka Sia nggahina d̄i anamori^doho-Na, <<Nggomid̄oho dohopu ta ake, Nahu d̄imalao do'a.>> 37 Edempara Sia recena la Petrus ro d̄ua dou ana la Zebedeus. Ndad̄i Isa tampu'ura iuna lalai ade ro darura ade-Na. 38 Nggahi Sia d̄i anamorid̄oho-Na ede, <<Nahu wancuku lalai ade-Ku, b̄une ^dimane'e made iu-Ku, nggomid̄oho midipu ta ake, ^bola lab̄opu Nahu.>>
39 Sawa'u b̄a ede Isa lao d̄o'o narina sato'i, edempara Sia sujuna awa dana ro do'a-Na, <<Ama, nggara loasi, kad̄o'o to'ipu lab̄o Mada gla susa ro ncoki ma pab̄ua ^di'iu b̄a Mada ake. Pala aina b̄une ra kane'ekai b̄a Mada, malaisi b̄une ra kane'ekai b̄a Ita, Ama.>>
40 Sawa'u b̄a ede Isa lao mbalina aka anamori-Na ma tolu dou ede ro edana siad̄oho wunga maruna. Nggahi Sia d̄i la Petrus, <<Kone b̄a samporo to'i, nggomid̄oho tolu wati wa'umu ^bola lab̄o Nahu? 41 Jaga-jagapu, ro do'apu loakud̄u nggomid̄oho wati ma^bumu ade coba'an. Poda romo d̄i ne'e b̄a ademu karawi ma taho, pala wati wa'u b̄a nggomid̄oho, b̄a one tabe'a manusiakaimu ede namapu ro rome.>>
42 Sakali wali Isa lao do'ana, nggahi-Na, <<Ama, nggara gla susa ro ncoki ake d̄ipab̄ua iu b̄a Mada, ro wati loa ^dika^do'o, co'opu b̄une ra kane'ekai b̄a Ita mpa Ama ^dimanda^di.>> 43 Sawa'u b̄a ede Isa lao mbali walina, ro edana anamorid̄oho-Na ma mbuipu maru, b̄ara siad̄oho na'ipiku ei madana.
44 Sakali wali Isa tu'u wi'ina siad̄oho ro katolu kalikaina lao do'ana kai rentana ma sama. 45 Sawa'u b̄a ede Sia lao mbali walina aka anamorid̄oho-Na ro nggahi-Na, <<Mbui ngge'epu maru ro sanawamu nggomid̄oho? Tiopu, wa'ura raka wakatuna Nahu, Ana Manusia ^di^donggo d̄i dou-dou madosa. 46 Tu'ura, mai ndai talaora. Tiopu! Dou ma^donggo Nahu d̄i dou-dou ma musu Nahu nawa'ura mai!>>
Isa Al Masih wa'u ro leto b̄a dou
26:47-56
47 Wakatu Isa wunga nuntuna lab̄o anamori^doho-Na, la Yudas sab̄ua dou ade weki anamorid̄oho-Na mai sama-samana lab̄o dou mamboto ma wa'a peda ro kapodo. Siad̄oho rakau b̄a dou-dou mana'ekai imam ro dou-dou mana'ekai dou Yahudi. 48 Dou ma^donggo Isa d̄i dou-dou ma musu-Na ede nawa'ura ngoa d̄i dou mamboto tanda b̄une ake: <<Dou rangilu b̄a mada, edeku douna, wa'u ro letopu Sia!>>
49 Ndede ronggana d̄i hid̄i ede, la Yudas lao raka lalona Isa ro nggahina, <<Salam Guru!>> Sawa'u b̄a ede sia ngiluna Isa.
50 So^di b̄a Isa, <<Cina, sab̄ua d̄i ru'u b̄a ake Nggomi maimu?>>x
Sawa'u b̄a ede, dou mamboto ede lu'una ta d̄ei ro wa'u ro letona Isa. 51 Sab̄ua dou anamori-Na ma wara ta ede lab̄o Isa, olona peda ro fatina ada Imam Agung sampe kori fikona. 52 Nggahi Isa d̄i anamori-Na ede, <<Kalu'u mbalipu pedamu d̄i lapina, b̄a one samenana dou ma mpa'a kai pedana d̄imamade b̄a peda. 53 Kacai b̄a nggomi, Nahu wati loaku raho bantu d̄i Ama-Ku, ro ake-ake wa'uku Ama Nahu d̄imanggadu tentara mala'eka ncewi sampuru d̄ua pasukan? 54 Pala nggara ndedesi, b̄uneku loana ndad̄i au ra karongga b̄a Allah Ta'ala d̄i ade Kitab Suci b̄a one poda pab̄uaku ndad̄ina wakatu b̄une ake?>>
55 Edempara Isa nggahina d̄i dou mamboto ede, <<Sab̄ua Nahu ake dou madab̄ae, sampe nggomid̄oho mai wa'amu peda ro kapodo ro wa'u ro letomu Nahu? Sanai-nai Nahu mangoa ro tei aka Bait Allah, nggomid̄oho wati wa'u ro letomu Nahu! 56 Pala pab̄ua romoku ndad̄i ndakena loakud̄u ndad̄ina au ra tunti b̄a nabi-nabi d̄i ade Kitab Suci.>>
Sawa'u b̄a ede, sara'a anamori-Na rai tu'u wi'ina Isa.
Isa Al Masih d̄iparesa ncihi ro ncara-Na d̄i tando Mahkamah Agama
26:57-68
57 Sawa'u b̄a wa'u ro letona Isa, dou-dou ede lao wa'ana Isa aka uma Imam Agung eded̄u la Kayafas. Ta aka ahli-ahli Taurat ro dou-dou matuakai Yahudi nawa'ura kab̄oro weki. 58 La Petrus b̄atu salandona Isa sampe aka sarei uma Imam Agung. Edempara lu'u la Petrus ade sarei ede, ro doho samana lab̄o dou-dou majaga. Sia nane'e b̄ade b̄uneku cumpukaina sara'a mandad̄i ede. 59 Dou-dou mana'ekai imam ro sara'a anggota mahkama Agama na'usahaku ^dirakakaina sakasi cowa loakud̄u rakana b̄ab̄u kai hukuman made d̄i ru'u b̄a Isa. 60 Pala siad̄oho wati rakana bukuti kone sa^bua, konena mboto dou mambei sakasi cowa. Cumpukaina wara d̄ua dou ma lu'u ta d̄ei tando. 61 Nggahi siad̄oho, <<Dou ake nggahina, <Nahu kaloa ^dumba Bait Allah, ro ade tolu nai naloa katu'u mbali.> >>
62 Edempara Imam Agung ede tu'u ki^dina ro nggahina d̄i Isa, <<Sab̄ua nggomi wati cambemu au ra b̄ab̄u ro lo'o b̄a dou d̄i ru'u b̄a Nggomi ede?>> 63 Pala Isa namidi mpa. Sakali wali Imam Agung nggahina d̄i Isa, <<Kai ngara Allah Ta'ala ma mori, nggahipu d̄i nami sab̄ua Nggomi, Ana Allah,y Sangaji Makasalama?>>
64 Cambe b̄a Isa, <<Ndedeku nggahi b̄a ndai ita. Pala imbipu: tampu'u d̄i wakatu ake, itad̄oho d̄ima'eda Mada, Ana Manusia ma doho ta sa^bae wanaz Allah Ta'ala Mawancu Na'e Kuasa, ro namai ese apu d̄i langi!>>
65 Edempara Imam Agung ede sipa-sipana kanina,a ro nggahina, <<Sia na'i'a ro ^ba'aku Allah Ta'ala! Wati paralu walina sakasi. Nggomid̄oho sara'a ma wa'ura ringa b̄a ndaimu b̄a one Sia i'a ro ^ba'ana Allah Ta'ala.
66 Ake, b̄uneku kananu b̄a nggomi^doho?>>
Cambe b̄a siad̄oho, <<Sia nancara, ro pab̄uaku d̄ihukum made.>>
67 Edempara siad̄oho katufena pahu Isa, ro ^boena Sia. Wara rau ma topa Sia, 68 ro nggahina, <<Nggahijapu ro ngoapu d̄i nami, oe Sangaji Makasalama! Cou ma ratopa Nggomi?>>
La Petrus nggahina b̄a one sia wati patana Isa Al Masih
26:69-75
69 La Petrus wunga dohona ta ari sarei. Sab̄ua dou ada siwe maina ro sod̄ina la Petrus. <<Sab̄ua laina nggomi rausi ma sama-sama lab̄o Isa dou Galilea ede?>>
70 Pala la Petrus wati mangakuna d̄i tando doud̄oho ede ro nggahi sia, <<Nahu wati loaku ka'ao nggahi nggomi ede.>> 71 Edempara sia laona aka ta^da ncai sarei. Sab̄ua dou ada siwe ma kalai ma'eda la Petrus, ro nggahina d̄i dou-dou ta ede, <<Dou ake rau ma sama-sama lab̄o Isa dou Nazaret ede!>>
72 Edempara la Petrus wati mangaku walina, ro sumpana, <<Poda-poda nahu wati pataku dou ede!>>
73 Wati ntoina sawa'u b̄a ede, dou-dou ma ki^di ta ede mai rakana la Petrus, ro nggahina, <<Tantu nggomi sab̄ua dou ade weki siad̄oho.Ede tada ipi d̄i sentumu.>>
74 Pala nggahi b̄a la Petrus, <<Sumpa, nahu poda-poda wati pataku dou ede!>>