Dou ra kakai b̄a la Yahya Mataki kandeu raso dou
11:1-19
(Luk. 7:18-35)
11
Sawa'u b̄a Isa ngoa ro teina d̄i ru'u b̄a sampuru d̄ua anamori-Na, Sia tu'u wi'ina hid̄i ede ro laona aka kota-kota d̄ingoa ro kahabakaina Injil.2 Wakatu la Yahya Mataki kandeu raso dou wunga bui b̄a dou, sia ringana haba mab̄oha au ra karawi b̄a Al Masih. Edempara sia kauna pila-pila dou anamorina lao sod̄i d̄i Isa, 3 <<Sab̄ua Ita, Sangaji Makasalama d̄imamai b̄une ra sake b̄a Allah Ta'ala atao pab̄uaku madad̄oho ngenamu dou makalai?>>
4 Cambe b̄a Isa, <<Lao mbalipu aka la Yahya ro ngoapu au ra ringa ro eda b̄a nggomi^doho: 5 dou ma mbuda naloa eda, dou ma made ^binci naloa lampa, dou ma supu ncolai nataho; dou ma mpinga naloa ringa, dou ma made namori mbali ro Haba Mataho ma ramai ra d̄i Allah Ta'ala d̄ingoa ro kahaba d̄i dou-dou mancoki mori. 6 Taho ro sanara dou ma wati tula ao Nahu!>>
7 Sawa'u b̄a lao dou-dou ra kakai b̄a la Yahya ede, Isa tampu'ura nuntu ro nggahi-Na d̄i dou mamboto mab̄oha la Yahya, nggahi-Na, <<Nggomid̄oho laomu aka so sarae, auku lao tiomu? Sab̄ua malao tioku salela mpori ra ewu b̄a angi? 8 Nggomi^doho, auku lao tiomu? Sab̄ua malao tioku dou ma kani, kani ro lombo ma ntika? Dou-dou ma kani mantika b̄une ede nangge'e aka asi sangaji! 9 Ndad̄i nggomid̄oho auku lao tiomu aka so sarae? Sab̄ua ma lao tioku nabi? Ncihi romo, dou ede nancewi na'e wali ntewikaisi nabi. 10 B̄a one mab̄oha la Yahya edeku ratunti d̄i ade ayat Kitab Suci ake;
<Akeku dou ra nggadu b̄a Nahu,> nggahi Allah Ta'ala,
<Nahu d̄imanggadu ulu sia sawatipu b̄a Nggomi,
loakud̄u sia d̄imahengga ulu ncai d̄i ru'u b̄a Nggomi.>
11 Kawarapu! D̄i dunia ake watipu parana wara dou ma ncewi na'e ntewikaisi la Yahya Mataki kandeu raso dou. Pala, kone ade ndedekaina dou ma cumpukai to'i d̄i ade anggota Karaja'an Saroga nancewi na'e ntewikaisi lab̄o la Yahya. 12 Ra'aipu la Yahya ngoa ro kahabana haba ede saraka ake, wara dou-dou ma wati ca'u Karaja'an Saroga ro nane'eku kuasakai Karaja'an ede. 13 B̄a one sara'a nabi ro Kitab Taurat nangoa ro kahabaku au d̄imandad̄i sampe maikai la Yahya. 14 Ro nggara nggomid̄oho mane'esi imbi, la Yahya edeku la Elia, maikaina wa'ura kahaba ulu. 15 Nggara mantausi fiko, ringa ro kade'epu!
16 Kai auku d̄ipab̄ua ntewikai b̄a Nahu, dou-dou jaman ake? Siad̄oho ede b̄une santika d̄ambe-d̄ambe to'i ma doho d̄i amba ma ou nggao lenga^dohona: 17 <Nami ma'ufi jalitu d̄i ru'u b̄a nggomid̄oho, pala nggomid̄oho wati ngawamu joge! Nami marawa ^dilalaikai ade, pala nggomid̄oho wati ngawamu nangi nduru!> 18 La Yahya maina, sia puasana ro wati nonona anggo; ro nggahi b̄a dou-dou, <Sia ralu'ukai b̄a setan!> 19 Edempara Ana Manusia maina, Sia ngaha ro nonona ro nggahi b̄a dou-dou, <Tiopu dou aka! Na'e ngahana, naca'u mawu, lenga dou mataki tagi bea ro lenga dou ma dosa.> Kone ade ndedekaina, timba ro lemba Allah Ta'ala wa'ura wara pahuna d̄i ade sara'a dou ma tarimana.>>
Kota-kota ma wati imbi
11:20-24
(Luk. 10:13-15)
20 Edempara Isa tampu'ura kancarana kota-kota hid̄i ra karawikai-Na mboto b̄isa ro guna. B̄ara dou-dou d̄i kota-kota ede wati ne'ena toba ra d̄i dosa-dosa siad̄oho. 21 <<Ihara nggomi, kota Korazim! Ro iha raura nggomi, kota Betsaida! Paisi b̄isa ro guna-^bisa ro guna rakarawi d̄i woha nggomid̄oho ede, rakarawi d̄i Tirus ro Sidon, tantu dou-dou ta aka ntoi wa'ura tobana ra d̄i dosa-dosana ro nakaniku kani ro lombo tanda ncokikai adena ro natauku kalu^bu d̄i wawo tutana. 22 Pala Nahu manggahi d̄i nggomid̄oho, <<D̄i ainaina kiama, dou-dou Tirus ro Sidon, nawancuku ncewi mod̄ana ^dikangampu wea b̄a Allah Ta'ala dosana ntewikaisi nggomi^doho! 23 Ro nggomi, Kapernaum! Sab̄ua nggomi d̄ikad̄ese sampe ese saroga? Wati, malaisi nggomi d̄ilo'o paki ade anaraka. Paisi b̄isa ro guna-^bisa ro guna ede rakarawi d̄i Sodom b̄une ra karawi d̄i nggomi tantu kota Sodom ede mbuipu warana saraka ake! 24 Pala Nahu manggahi d̄i nggomi, <<D̄i Ainaina kiama, dou-dou Sodom nawancuku ncewi mod̄ana ^dikangampu wea dosana b̄a Allah Ta'ala ntewikaisi nggomi^doho!>>
Maipu ara Nahu
11:25-30
(Luk. 10:21-22)
25 Wakatu ede Isa do'ana, <<Ama, Ruma ma kuasakai langi ro dana! Mada marenta tarima kasi d̄i Ita, Ruma. Sara'ana ede, Ita wati ngoata d̄i dou-dou maloa ro mantau ilmu, pala Ita maturu teiku d̄i dou-dou ma wati ntau ilmu. 26 Edeku ma kasana wea ade Ita Ama!>>
27 Edempara Isa nggahina, <<Samenana wa'ura d̄onggo b̄a Ama d̄i Nahu. Wati wara kone sab̄ua dou rau ma pata Ana, selasi Ama. Wati wara rau ma pata Ama selasi Ana ro d̄i dou-dou ra kane'ekai b̄a Ana edeku kapatana d̄i Ama.
28 Maipu ara Nahu, nggomid̄oho sara'a ma rome ro ma dawa'u ro ma'iu tani ade mori ro woko; Nahu d̄imambei tenggo ro wale d̄i nggomi. 29 ^Batupu parenta Nahu ro tana'opu d̄i Nahu. B̄ara Nahu ake lembo ade ro mapu nggahi ro eli-Ku, ndad̄i nggomi ma'iuku tenggo ro sana. 30 B̄ara parenta-parenta Nahu nakasana weaku mori ro wokomu ro au ra kaukai b̄a Nahu wa'a, wati tanina pala naneo.>>