Conto ro ibara mab̄oha sampuru dou siwe sampela
25:1-13
25
Sawa'u b̄a ede, Isa nggahi walina, <<Karaja'an Saroga, ka'ada'ana peade b̄une conto ro ibara ake: Sampuru dou siwe sampela ma^dende ^bunti, sampela-sampela ede cua-cua weha menana ilo, edempara lao rai aona ^bunti mone.2 Lima dou d̄i ade weki siad̄oho ede nasampula, ro lima dou wali naloa timba ro lemba. 3 Lima dou siwe sampela ma sampula ede wa'ana ilo, pala wati wa'a sadiana mina. 4 Lima dou siwe sampela ma loa timba ro lemba, wa'ana ilo ro wa'a rauna mina. 5 Pala ^bunti mone ede wati ngge'epu wontu-wontuna, ndad̄i dou-dou siwe sampela ede tampu'ura ei madana edempara maruna.
6 D̄i wakatu b̄oha ai, wara ringa eli dou ma kanggica, <Arara ^bunti mone! Mai talao rai aoku sia!> 7 Sampuru dou siwe sampela ede tu'una, ro siad̄oho ka'ana ilona. 8 Dou-dou siwe sampela ma sampula ede nggahina d̄i lenga^dohona ma loa timba ro lemba, <Mbeijapu nami minamu sato'i, b̄a one ilo nami nane'era made.> 9 Pala cambe b̄a dou-dou siwe sampela ma loa timba ro lemba ede, <Aina, peade wati ncihina d̄i ru'u b̄a nami ro d̄i ru'u b̄a nggomid̄oho.Natahopu lao welimu aka hid̄i dou-dou ma landa mina.> 10 Edempara dou-dou siwe sampela ma sampula ede lao welina mina. Wunga lao siad̄oho, ronggara ^bunti mone ede. Dou siwe sampela limana ma wa'ura sadia ede lu'una lab̄o ^bunti mone d̄i ade hid̄i ndihakai, edempara kempa b̄a dou ta^da!
11 Edempara dou-dou siwe sampela ma ralao weli mina maina, ou b̄a siad̄oho, <ruma, ruma hengga wea to'ipu ncai.> 12 Pala cambe b̄a ^bunti mone ede, <Nahu wati pataku nggomi^doho!> >>
13 Edempara Isa kanggorina conto ro ibara-Na ede ro nggahi-Na, <<B̄ara ndedena jaga-jagapu, b̄a one nggomid̄oho wati b̄ademu ainaina ro wakatuna maikaina Ana Manusia.>>
Conto ro ibara mab̄oha tolu dou ada
25:14-30
(Luk. 19:11-27)
14 Edempara Isa, nggahi walina, <<Karaja'an Saroga ka'ada'ana peade b̄une conto ro ibara ake. Sab̄ua dou mone mane'e lao aka hid̄i ma ^do'o. Sia ouna ada^dohona, edempara imbikaina ntau ro warana d̄i siad̄oho. 15 D̄i sanikina adana ede mbei b̄a sia cua-cua ^diwa'ukai b̄a ndai adana. D̄i sab̄ua dou mbei b̄a sia 5.000 piti masa. D̄i makalai mbei b̄a sia 2.000 piti masa. Ro d̄i sab̄ua dou wali mbei b̄a sia 1.000 piti masa. Edempara sia laona. 16 Ada ma ratarima 5.000 piti masa ede lao daga ro uli lalona, edempara rakana kanaha 5.000 piti masa wali. 17 Ndede rau ada ma tarima 2.000 piti masa ede, sia rakana kanaha 2.000 piti masa wali. 18 Pala ada ma ratarima 1.000 piti masa ede, lao ngarina kancoa, edempara cilina piti rumana d̄i ade kancoa ede.
19 Ntoi sawa'u b̄a ede, ruma b̄a ada-ada ede dulana, sia tampu'ura sod̄ina au ra imbikaina d̄i ada^dohona. 20 Ada ma ratarima 5.000 piti masa ede mai ro d̄onggona 10.000 piti masa. Nggahi sia d̄i rumana, <ruma, Ita rambeita mada 5.000 piti masa. Tatiopu, mada wa'ura raka weaku kanaha 5.000.> 21 Nggahi b̄a rumana ede, <Taho, nggomi eded̄u ada ma taho ro ma to'a. B̄ara nggomi loa d̄i'imbikai ma sato'i, nahu ^dima'imbikaimu ma mboto. Mai lu'ura ro ^batupu kad̄ihi ade lab̄o nahu!>
22 Sawa'u b̄a ede maira ada ma ratarima 2.000 piti masa, ro nggahina, <ruma Ita wa'ura mbeita 2.000 piti masa d̄i mada. Tatiopu, mada wa'ura raka weaku kanaha 2.000 piti.> 23 Nggahi b̄a rumana ede,<Taho, nggomi eded̄u ada ma taho ro to'a. B̄ara nggomi loa d̄i'imbikai ma sato'i, nahu ^dima'imbikaimu ma mboto. Mai lu'ura ro ^batupu kad̄ihi ade lab̄o nahu!> 24 Sawa'u b̄a ede maira ada ma ratarima 1.000 piti masa ede, ro nggahina, <ruma, mada ka^badeku Ita dou ma toku. Ita pokemu wua haju d̄i hid̄i ma wati ranggu^dakai b̄a ita. Ro wehamu hasi aka hid̄i ma wati raparikai b̄a ita ^dei. 25 Mada kadahuku, ndad̄i mada lao wi'i ciliku piti Ita ede d̄i ade dana. Ake piti Ita.> 26 Nggahi rumana ede, <Nggomi ada ma dab̄ae ro ^daju! Nggomi mawa'ura b̄ade b̄a one nahu mapoke ro weha wuana d̄i hid̄i ma wati ra nggu^dakai b̄a nahu ro maweha hasi d̄i hid̄i ma wati ra parikaiku ^dei? 27 Nggara ndedesi, sapodakaina nggomi loa lao mbei piti nahu ede aka dou ma kalampa piti, loakud̄u raka wakatu dula nahu, nahu kaloa tarima mbali piti ede lab̄o ^bungana. 28 B̄ara ndedena, wehapu piti ede d̄i sia, ro mbeipu aka dou ma ntau 10.000 piti masa ede. 29 B̄a one dou ma wa'ura wara ntauna, d̄imbei kamboto wali, ndad̄ina sia ^dimaremba. Pala dou ma wati wara ntauna, sato'i ma mbuipu wara d̄i ndaina ede ^diweha rau. 30 Ro ada ma wati wara onena ede, pakipu d̄i rindikaina ta ari lua. Ta aka sia ^dimanangi ro ^dimasusa ro ncoki iu!> >>
Hukuman d̄i Ainaina Kiama
25:31-46
31 Isa nggahi walina, <<Wakatu Ana Manusia mai kai Sangajikai-Na, Sia ^di^dende b̄a samenana mala'eka-Na, Sia ^dimadoho ta ese wawo kadera sangajikai-Na ma d̄ese ro ntasa. 32 Samenana bangsa ^dikab̄oro d̄i tando Sia. Edempara Sia ^dimacenggana siad̄oho ndad̄i d̄ua kalompo b̄une dou ma ompukai jimba ma cengga kalai jimba lab̄o mbe'e. 33 Dou-dou ma karawi au ra kane'ekai b̄a Allah Ta'ala ^dikab̄oro ta wela wana-Na, ro ma kalai ta wela ku'i-Na. 34 Edempara Sangaji ede ^dimanggahi d̄i dou-dou ta wela wana-Na, <Maira nggomid̄oho ra mbei bareka b̄a Ama-Ku. Lu'ura d̄i ade Karaja'an ra sadia d̄i ru'umu ratampu'u aipu ndad̄i dunia. 35 B̄ara wakatu Nahu hi^doku, nggomid̄oho mambeiku ngaha Nahu, ro wakatu Nahu mango wo'oku, nggomid̄oho mambeiku oi nono. Wakatu Nahu kai dou lai rasa, nggomid̄oho matarimaku Nahu d̄i umamu. 36 Wakatu Nahu wati wara kani ro lomboku, nggomid̄oho mambeiku kani ro lombo d̄i Nahu. Wakatu Nahu supuku, nggomid̄oho kab̄ua katahomu Nahu. Wakatu Nahu bui b̄a dou, nggomid̄oho mabantuku Nahu.>
37 Edempara dou-dou ede ^dimacambena, <Ruma, b̄une aiku madad̄oho edamu Ita Ruma ma hid̄o edempara mbei b̄a madad̄oho ngaha, atao mango wo'ota edempara mbei b̄a madad̄oho oi nono? 38 ^Bune aiku madad̄oho edamu Ita Ruma kai dou lai rasa, edempara tarima b̄a madad̄oho Ita Ruma d̄i ade uma mada^doho? ^Bune aiku madad̄oho edamu Ita Ruma ma wati ntau kani ro lombo, edempara mbei b̄a madad̄oho kani ro lombo d̄i Ita Ruma? 39 ^Bune aiku madad̄oho edamu Ita Ruma ma supu atao rabui b̄a dou edempara bantu b̄a madad̄oho Ita Ruma?> 40 Sangaji ede ^dimacambena, <D̄i ^bademu, aipu nggomid̄oho kalampamu lampa rawi ede, konena d̄i sab̄ua dou d̄i ade weki cina ro angi Nahu ra katuna ro kab̄awa b̄a dou. Ede aona nggomid̄oho karawimu d̄i ru'u b̄a Nahu!>
41 Edempara Sangaji ede ^dimanggahi d̄i dou-dou ta wela ku'i-Na, <Laora aina wara ta ake, nggomid̄oho dou ma ipi da^bae! Lu'ura d̄i ade afi ma wati ^dimamade-made, ra wa'u sadia d̄i ru'u b̄a Iblis ro mala'eka-mala'ekana! 42 B̄a one wakatu Nahu hi^doku, nggomid̄oho wati mbeimu Nahu ngaha, wakatu Nahu mango wo'oku, nggomid̄oho wati mbeimu oi nono d̄i ru'u b̄a Nahu. 43 Wakatu Nahu kai dou lai rasa, nggomid̄oho wati tarimamu Nahu d̄i ade umamu. Wakatu Nahu wati ntauku kani ro lombo, nggomid̄oho wati mbeimu Nahu kani ro lombo. Wakatu Nahu masupu ro rabui, nggomid̄oho wati kab̄ua weamu Nahu.> 44 Edempara siad̄oho ^dimasod̄i d̄i Sia, <Ruma, b̄une aiku madad̄oho b̄ademu b̄a one Ita Ruma ma hi^do, ma mango wo'o, atao kai dou lai rasa, wati ntaumu kani ro lombo, masupu atao d̄i ade uma bui, edempara madad̄oho wati bantumu Ita Ruma?> 45 Sangaji ede ^dimacambe, <D̄i ^bademu: wakatu nggomid̄oho wati ne'emu bantu dou ra katuna ro kab̄awa b̄a dou ake, ede aona nggomid̄oho wati ne'emu bantu Nahu.> 46 Edempara dou-dou ede d̄ihukum kai hukuman ma ede ro hi^di, pala dou-dou ma rakarawi au ra kane'ekai b̄a Allah Ta'ala d̄ima'iu mori ma sapodakaina ro ma ede ro hi^di.>>