Cou ma ipi penti?
18:1-5
18
D̄i wakatu ede anamori-anamori Isa maina d̄i Sia ro so^dina. <<Couku ma ipi penti^di ade Karaja'an Saroga?>>2 Ndad̄i Isa ouna sab̄ua ana dou to'i ro kauna ki^di d̄i tando siad̄oho. 3 Edempara nggahi Isa, <<Imbipu! Nggara nggomid̄oho matobasi ra d̄i dosa-dosamu ro ndad̄imu b̄une ana dou to'i ake, nggomid̄oho d̄imandad̄i anggota Karaja'an Saroga. 4 Dou ma ka'awa weki ro ndad̄i b̄une ana dou to'i ake, sia edeku ma ipi penti d̄i ade weki ela Karaja'an Saroga. 5 Ro dou ma tarima ao ana dou to'i b̄une ake, b̄ara Nahu, ede aona natarimaku Nahu.>>
Lampa rawi-lampa rawi ma kandad̄ina dou karawi dosa
18:6-9
6 Sawa'u b̄a ede, Isa nggahi walina, <<Cou-cou makandad̄ina sab̄ua dou d̄i ade weki ana dou to'i ake watid̄u imbi walina d̄i Nahu, nancewi tahopu dou ede d̄iki tero kai wadu nggirukai d̄i wo'ona, sawa'u b̄a ede lo'o tau d̄i ade moti ma ^dei. 7 Nawancuku ihana dunia ake, b̄ara lampa rawi-lampa rawi d̄i dunia ake ma kamaina dosa dou. Poda romo lampa rawi-lampa rawi b̄une ede ^dimawara ncau, pala ihara dou ma rakandad̄ina lampa rawi ede!
8 Nggara rima atao e^dimu makamaina dosa, dompo pakipu. Nancewi tahopu nggomi morimu lab̄o Allah Ta'ala konena dawara sa^bae rima atao sa^bae e^dimu, nggara nggomi ntaumu rima ro ed̄i ^bali ^bae, pala nggomi ^dipaki ade afi anaraka. 9 Ro nggara madamu makamaina dosa, cingga pakipu isi madamu ede, nancewi tahopu nggomi morimu lab̄o Allah Ta'ala konena dawara isi madamu sa^bae nggara nggomi ntaumu mada ^bali ^bae, pala ^dipaki ade afi anaraka.>>
Conto ro ibara mab̄oha jimba ma moda
18:10-14
(Luk. 15:3-7)
10 Sawa'u b̄a ede, Isa nggahi walina, <<D̄i kawara b̄a nggomi^doho! Aina kab̄awa ro katunamu sab̄ua dou d̄i ade weki ana dou to'i ake. B̄a one Nahu manggahi d̄i nggomid̄oho, <Mala'eka-mala'eka ma jaga siad̄oho ngge'e mpa warana d̄i tando Ama-Ku d̄i saroga.> >>
11 B̄ara Ana Manusia maina ^dimakasalama dou ma santuda!
12 <<B̄une kananu b̄a nggomid̄oho? Misakai wara dou ma ntau 100 mbua jimba, pala sab̄ua jimba d̄i ade jimba-jimba ede moda, auku d̄ikarawi b̄a dou ede? Tantu sia natu'u wi'iku jimbana ma ciwi mpuru ciwi mbua ede d̄i doro to'i ro sia nalao ngupaku jimbana ma sab̄ua ma moda ede. 13 Ro nggara narumpa mbalisi jimbana ma ramoda ede, imbipu Nahu – sia na'ipipu neo adena b̄ara jimbana ma sab̄ua ra wa'u eda mbalina ede ntewikaisi lab̄o jimbana ma ciwi mpuru ciwi mbua ma wara ede. 14 ^Bune ede rauku Amamuo ma wara d̄i saroga wati ne'ena sab̄ua dou d̄i ade weki dou-dou ma b̄oupu imbi d̄i Nahu ake modana.>>
Mab̄oha cina ro angimu nakarawisi dosa
18:15-17
15 Edempara Isa nggahi walina, <<Nggara cina ro angimu ma sama-sama imbi lab̄o nggomi nakarawisi dosa d̄i nggomi,p ngoa ro tei katahopu sia. Karawipu ede kai nari-nari d̄i weki nggomid̄oho d̄ua mpa. Nggara na^batusi au ra nggahi b̄a nggomi, ndad̄i nggomi maraka mbaliku cina ro angimu ede. 16 Pala nggara watisi ngawana kade'e au ra ngoa ro kawara b̄a nggomi, wa'apu sab̄ua atao d̄ua dou wali. B̄ara ade Kitab Suci wara ratunti; <sadawara-warana d̄ua atao tolu dou sakasi ampo loa d̄iwi'ikai ncara sab̄ua dou.>
17 Nggara sia watisi tarimana ngoa ro tei kataho b̄a dou-dou ede, ngoapu rawi ede d̄i ela Ruma. Ro cumpukaina, nggara sia watisi ne'ena tarima ngoa ro tei kataho b̄a ela Ruma, wi'ikaipu sia kai dou mataki tagi bea ro sab̄ua dou ma wati pata Allah Ta'ala.>>
Ma loa d̄ikarawi ro ma wati loa d̄ikarawi
18:18-20
18 <<D̄i b̄ade b̄a nggomi^doho! Au ra kantakai b̄a nggomid̄oho d̄i ade dunia, ^dikanta rau d̄i saroga. Ro au ra kancihi b̄a nggomid̄oho d̄i ade dunia ake, d̄ikancihi rau d̄i saroga.
19 Ro d̄i b̄ade raumu: Nggara d̄ua dou d̄i ade weki nggomid̄oho d̄i ade dunia ake mafakamu raho au-au rau, ndad̄i au ra rahomu ede d̄imbei b̄a Ama-Ku ma wara d̄i saroga. 20 B̄a one ta b̄e rawarakai d̄ua atao tolu dou makab̄oro weki kai ngara Nahu, Nahu wara d̄i ade woha siad̄oho.>>
Conto ro ibara ada ma wati ngawa kangampu wea ncara dou
18:21-35
21 Sawa'u b̄a ede la Petrus mai sod̄ina d̄i Isa, <<Ruma, nggara cina ro angi mada nakarawisi dosa d̄i mada, sampe pila kaliku mada pab̄uaku kangampu wea sia? Sampe pidu kali?>>
22 Cambe b̄a Isa, <<Wati, laina sampe pidu kali, pala sampe pidu mpuru kali pidu kali.q 23 B̄ara Karaja'an Saroga, ka'ada'ana b̄une ade conto ro ibara ake: Waraku sab̄ua dou sangaji ma ne'e kanggori nconggo-nconggo ada^dohona. 24 Wakatu sia tampu'ura paresana, mai wa'a b̄a dou d̄i sia sab̄ua dou ada manconggo ma ipi poda mboto, 25 ro wati wa'una cola. Ndad̄i, sangaji ede parentana loakud̄u ada dou ede ^dilanda sama-sama lab̄o wei ro anana ro sara'a ntau ro warana ^dicolakai nconggona ede. 26 Ada ede sujuna d̄i tando sangaji ede ro raho poda-podana, <ruma, kalembo wa'u to'ipu adeta, sara'a nconggo mada ede, mada d̄imacola kanggorina.> 27 Sangaji ede nata adena eda ada dou ede, edempara fura sara'ana nconggo ada dou ede.
28 Wakatu ada dou ede losana, sia eda angina lab̄o lengana, lengana ede ada dou rau, ma nconggo d̄i sia sato'i mpa. Nentina lengana ede, ke'ena ro nggahina, <Cola sara'apu nconggomu!> 29 Edempara lenga ra ke'ena ede sujuna d̄i tando sia ro raho poda-podana, <Kalembo wa'upu ademu cina, nconggo nahu ede, nahu d̄imacola sara'ana!> 30 Pala lengana ede wati ne'ena. Sawa'u b̄a ede, sia kalu'una lengana ma nconggo sato'i ede ade uma bui sampe lengana ede cola kanggorina nconggona. 31 Wakatu eda b̄a ada-ada ma kalai au ma ndad̄i ede, siad̄oho ncoki adena ro lao ngoana au ma wa'ura ndad̄i ede d̄i sangaji. 32 Edempara sangaji ede ouna ada ma dab̄ae ede ro nggahina d̄i sia, <Oe, ada ma da^bae! Sara'a nconggo nggomi wa'ura fura b̄a nahu b̄ara nggomi raho nembamu d̄i nahu. 33 Sapodakaina nggomi rau pab̄uaku ntaumu kasi ade d̄i lengamu ede, b̄une nahu ma wa'ura kasi ade d̄i nggomi.> 34 Ndad̄i sangaji ede nawancuku mbanina. Ada dou ma dab̄ae ede tauna ade uma bui sampe cola kanggori sara'ana nconggona ede.>>
35 Isa kanggorina carita-Na kai nggahina b̄une ake, <<B̄une ede rauku Ama-Ku ma wara d̄i saroga kalampana d̄i ru'u b̄a cua-cua ndai nggomid̄oho, nggara nggomid̄oho watisi kangampu weamu cina ro angimu kai nira ademu.>>