Isa Al Masih kad̄ese ro kantasa ese wawo doro
17:1-13
17
Ini nai sawa'u b̄a ede Isa wa'ana la Petrus, la Yakub ro cinana la Yahya, lao peso weki aka sab̄ua doro ma ^dese. 2 D̄i tando siad̄oho, Isa lai pahuna: Pahu-Na ndad̄i taroa b̄une liro ro kani ro lombo-Na ndad̄i lanta kancilo. 3 Sawa'u b̄a ede tolu dou ma b̄atu-Na ede edana Nabi Musa ro Nabi Elia ma nuntu lab̄o Isa. 4 Edempara nggahi la Petrus d̄i Isa, <<Ruma, nawancuku taho ro sanana ndai ta ake. Nggara ca'usi b̄a Ita Ruma, mada ^dimatu'una tolu mbua kema ta ake: sab̄ua d̄i ru'u b̄a Ita, sab̄ua d̄i ru'u b̄a Nabi Musa ro sab̄ua wali d̄i ru'u b̄a nabi Elia.>>5 Wakatu la Petrus mbuipu nuntuna, wed̄i lalo mpa londo apu ma taroa ma ^bontona siad̄oho, d̄i ade apu ede wara ringa eli ma nggahi, <<Akeku Ana meci b̄a Nahu. Siaku makasana wea ade Nahu. Ringa ro kade'epu Sia!>>
6 Wakatu ringana eli ede anamori-anamori Isa nawancuku dahuna, ndad̄ina siad̄oho suncuna d̄i dana. 7 Ndad̄i Isa lao rakana siad̄oho ro ^damana siad̄oho ro nggahi-Na, <<Tu'ura, aina dahu!>> 8 Wakatu siad̄oho hantana tuta, siad̄oho watid̄u edana cou-cou rau, selasi Isa mpa.
9 Wakatu siad̄oho londona d̄i doro ede, Isa ngoa ro kawarana siad̄oho, <<Aina ngoamu d̄i cou-cou rau au ra eda b̄a nggomid̄oho akande, sawatipu b̄a Ana Manusia mori mbalina ra d̄i madekaina.>>
10 Anamori-anamori Isa sod̄ina d̄i Sia, <<Guru, b̄ab̄auku ahli-ahli Taurat nggahina b̄a one Nabi Elia pab̄ua d̄imamai ulu?>>
11 Cambe b̄a Isa, <<Ncihi romo, Nabi Elia maina ro sia d̄imakanggorina samenana au-au ^diparalu. 12 Pala Nahu manggahi d̄i nggomid̄oho, nabi Elia wa'ura mai, pala dou-dou wati wara ma pata sia, ruku ro rawi siad̄oho d̄i Nabi Elia b̄e ra ne'e siad̄oho.Ro siad̄oho d̄imakarawi ndede rau d̄i Ana Manusia.>>
13 Edempara samenana anamori-Na naloa ka'ao b̄a one Isa manuntu ro nggahi mab̄oha la Yahya Mataki kandeu raso dou.
Isa Al Masih katahona ana dou ra lu'ukai b̄a roh setan
17:14-21
14 Wakatu Isa lab̄o tolu dou anamori-Na mai mbalina d̄i dou mamboto ede, Isa mai raka b̄a sab̄ua dou mone ro sujuna d̄i tando Isa, 15 nggahi dou mone ede, <<Ruma, takasi to'ipu adeta d̄i ana mada. Sia nasupu finca jara ro na'ipi podaku ncoki iuna. Sia ntuwu podara ma^buna d̄i afi ro oi. 16 Mada wa'ura wa'aku d̄i anamori Ita, pala siad̄oho wati loana kataho ana mada.>>
17 Cambe b̄a Isa, <<Oe, nggomid̄oho ma wati imbi ro ma santuda, sab̄une waliku ntoina, Nahu ngge'eku lab̄o nggomid̄oho? Sampe b̄une aiku Nahu pab̄uaku lembo ade d̄i nggomid̄oho? Mai wa'a ca'arapu ana dou to'i ede!>> 18 Sawa'u b̄a ede Isa katesana roh setan ma wara d̄i ana dou to'i ede. Edempara roh setan ede losana ro ana dou to'i ede taho lalona d̄i wakatu ede wa'u.
19 Sawa'u b̄a ede anamori-anamori Isa mai rakana Sia ro sod̄ina, <<Guru, b̄ab̄auku madad̄oho wati loakaimu katesa roh setan ede?>>
20 Cambe b̄a Isa, <<B̄a one nggomid̄oho kura imbimu. D̄i kawara b̄a nggomi^doho! Nggara nggomid̄oho mantausi imbi b̄une na'e isi sesawi, nggomid̄oho maloaku nggahi d̄i doro to'i ake, <Lao pesopu wekimu ta aka!> Tantu doro to'i ede d̄imalao peso weki. Wati wara ^didaloa karawi b̄a nggomi^doho! 21 Pala roh setan b̄une ake, wati loa ^dikatesa selasi kai do'a ro puasa mpa!>>
Isa Al Masih ngoa walina mab̄oha madekai-Na
17:22-23
(Mrk. 9:30-32; Luk 9:43b-45)
22 Wakatu anamori-anamori Isa kab̄orona weki d̄i Galilea, Isa nggahina d̄i siad̄oho, <<Wati^du ntoi walina Nahu, Ana Manusia ^di^donggo d̄i kuasa manusia. 23 Sia ^dihade, pala d̄i ainaina katolukaina Sia ^dikamori mbali.>>
B̄ara ndedena anamorid̄oho-Na ndad̄i ncoki poda adena.
Isa Al Masih colana bea d̄i ru'u b̄a Bait Allah
17:24-27
24 Wakatu Isa ro anamorid̄oho-Na rongga d̄i Kapernaum, dou-dou mataki tagi bea d̄i ru'u b̄a Bait Allah mai rakana la Petrus ro sod̄ina, <<Sab̄ua gurumu nacola bea Bait Allah atao wati?>>
25 Cambe b̄a la Petrus, <<Io, nacola!>>
Wakatu dula la Simon Petrus, sia rojo ulu b̄a Isa, <<Simon, b̄une kananu b̄a nggomi? D̄i couku sangaji-sangaji dunia ake wehakaina bea? Sab̄ua d̄i ela ro douna atao d̄i dou lai rasa?>>
26 Cambe b̄a la Petrus,<<D̄i dou lai rasa.>>
<<Nggara ndedesi,>> nggahi Isa, <<Ndad̄i, ela ro douna wati pori colana bea. 27 Pala ndai aina ka'iha wea ade doud̄oho ede. Ndad̄i, lao nggawipu aka ndano. Wehapu uta ma sarambakai ra raka b̄a nggomi. D̄i ade asa uta ede nggomi d̄imaraka piti ma ncihi ^dicolakai bea d̄i ru'u b̄a ndai ^dua. Wehapu piti ede ro colapu d̄i siad̄oho bea ndai d̄i ru'u b̄a Bait Allah.>>