Yeézu Yaasiindika Abaheémba Boómwe Ikumi Na Bábili
(Mariko 3:13-19, 6:7-13; Luka 6:12-16, 9:1-6)
10
1 Niho yaayeta abaheémba boómwe ikumi na bábili, yaábaha obuzizi bwo kubiinga amazimu na go kuchíza amalwáala góona. 2 Amazíina ge entumwa abo ikumi na bábili nigo áaga, wo kubaanza ni Simoni ogwo alikwéetwa Peétero, na Andrea omulúmuna, Yakobo mutábani wa Zebedayo, na Yohana omulúmuna, 3 Filipo, Balitolomayo, Tomaso, Matayo omuhaámbya, Yakobo mutábani wa Alifáayo, Tadayo, 4 Simoni Mzelotea na Yuda Iskaliote ogwo ayamukoongile Yeézu.5 Mbweenu, Yeézu yaasiindika éezo entumwa ikumi ne ibili, yaázilagila aáti, “Mtaákuzeenda aha Abanyamahaánga, kaandi mutaákutáaha omu iboma lyoóna lyóona lya Samalia. 6 Náho muzeénde aha Abaiziraeli, abo bali nke entaama ezihabile. 7 Obuchilo nimuzeenda owaabo, mube nimweelekeelela nka nikwo, ‘Obukáma bwo omu igulu bweéliliize!’ 8 Muchize abalwéele, muzóole abáfwiile, mweéze abeena obubeembe na mubiínge amazimu. Mweénaankwíile obuhicha óobwo busa, ne íimwe óobu musohoze busa. 9 Mutaákuzeenda ne ezaháabu, nali empilya nali emiliinga omu nkoba záanyu. 10 Kaandi, mutaákuzeenda omu luzeendo ne enfulebe, nali amagwáanda ábili, nali enkeeto, nali enkoni. Habwo kuba omukozi chimugasize kuhaabwa empeéla yoómwe.
11 “Omu iboma lyoóna lyóona nali omugoongo gwoóna gwóona óogwo mulaahikamo, muloondele omuuntu ogwo ali buligiligi kubanyegeza omúka yoómwe. Mbweenu, mwiikale hali weényini kuhicha obuchilo óobwo muliluga áaho. 12 Obuchilo nimutáaha omúka yoómwe, Mubaángaluche abaantu boómwe hakubeéndeza obuhóolo. 13 Mbweenu, kabalaaba balimo abo bali abaantu abakwíile, okwaangalucha kwaanyu nikubaha obuhóolo, náho kabalaaba batakwíile kwiinaankula obuhóolo óobwo, bubasubile íimwe, butaákusigala nabo. 14 Kabilaaba omúka yoóna yóona nali omu iboma lyoóna lyóona, abaantu baámo nibaánga kubeénaankula no kugeétegeeleza ameégeso gáanyu, musoholeho ahaanzu éezo nali ahi iboma éelyo na mukuunkumule enkuungu kuluga amagulu gáanyu.b 15 Mazima nniimbagaambila nka nikwo, omu chilo cho omuchwaáziiko, Múungu nachwaaziika bwooli abaantu bo omwiiboma éelyo, kuchila óokwo alaachwaáziika abaantu bo omunsi ya Sodoma na Gomóra!”c
Ebyaágalalo Éebyo Ebilikwiiza
(Mariko 13:9-13; Luka 21:12-17)
16 “Muunhúliilize, nniimbasiindika nke entaama ahagáti ye emisega. Ha bwéecho mbweenu, mube abacheluke nke enzóka, kaandi mube abafula nke echiiba. 17 Mube méeso na abaantu, habwo kuba nibabatwaála omu matégekelo, kaandi balaábakona enkoba omumasomelo gáabo. 18 Nibabatwaála omuméeso ga abatégeki be Echirúumi na abakáma ba Abayahudi habwaánze iinye. Nimweendelwa kuba baalubona baanze omuméeso gáabo no omuméeso ga abaantu ba mahaánga góona. 19 Obuchilo balabatwaála, mutaákwaagalala nkokwo nitutoóza tuta nali nitugaamba chiíha. Múungu naabaha amagaambo go kugaamba aha kaziingo áako. 20 Ti nka nikwo íimwe nimuhooya, náho no Omwooyo gwa Múungu Isiímwe ogwo gulahooya kulabila hali íimwe.
21 “Aha buchilo óobwo, nibiba nka nikwo omweene waabo naamukoonga omulúmuna ha babisa abone kwiitwa. Kaandi, íise naamuta omwaana omu ngalo za ababisa abone kwiitwa. Abaana balabagookela abazeele báabo aha kubanoba no kubaleetelela beétwe. 22 Abaantu bóona nibabatamwa habwi izíina lyaanze. Náho, weéna wéena ogwo aleégumisiliza kuhika ihelezo, niwe alichuúngulwa na Múungu. 23 Kabilaaba nibabaagalaza omu maboma bunaanka, mbweenu mwiilukile omu iboma elíindi. Mazima nniimbagaambila nka nikwo, mucháali mutakamazile emilimo yaanyu omu maboma góona go omuli Iziraeli, íinye Mutábani wo Omuuntu niímba naáhikile.
24 “Omuheémba tachila omweégesa woómwe, no omuzáana tachila omukáma woómwe. 25 Omuheémba naayeendelwa aábe nko omweégesa woómwe, no omuzáana náwe aábe nko omukáma woómwe. Íinye ndi mukúlu wáanyu na nibaanyeta Beelzebuli.d Kabilaaba baányeta bátyo, ngási tibakubeeta íimwe amazíina mábi hakusaagiliza?
Otiine Múungu Weénka
26 “Mbweenu, mutabatiina abaantu áabo. Choóna chóona echifuundikiilwe, chilyaáfuúndulwa neemwe, kaandi choóna chóona éecho echiselekilwe, chilyaáleebwa. 27 Góona áago ndikumbagaambila íimwe omuunsiimbazi, mugagaámbe ha mwaanga hali bóona. Kaandi, góona áago mulikuhulila kuluga hali íinye bwe seleke, mugoólekeelele aha bweélu omubaantu. 28 Mutatiina áabo abalikuhicha kwiita omubili gwéenyu, náho tibakuhicha kwiita omwooyo gwaanyu. Íimwe mutiine Múungu weénka, habwo kuba weényini niwe yaaakahicha kusikiiza omubili hamo no omwooyo omulyoongoola lyo omulilo gwa kuzimu.
29 “Ngási, enfuunzi ibili tizikuguzwa habwo obukaani buche kwoónka? Nóobu bityo, tihaliho nóobu enyonyi eémo éezo elikugwa ahaansi hataázila bweenzi bwe Isiímwe. 30 Na íimwe óobu, Múungu naamanya olubalo lwi isóke lyóona lye emitwe yáanyu. 31 Ha bwéecho mbweenu, mutatiina, habwo kuba mwiina obukáani kusaaga enfuunzi nyiinzi.
32 “Omuuntu kaálandángaana omuméeso ga abaantu nkokwo weényini no omuuntu waanze, na íinye ndaámulaangaana nka nikwo no omuuntu waanze omuméeso ga Táata owo omu igulu. 33 Náho, weéna wéena ogwo aliinyoga omuméeso ga abaantu, na íinye ndaámwooga omuméeso ga Táata ogwo ali omu igulu.”
Yeézu Aleesile Obutaániso
34 “Mutazila muti nyizile habwo kuleeta obuhóolo omuunsi éezi. Tiindeézile habwo obuhóolo, náho habwo kuléeta ichúmu. 35 Neeza kuléeta obutaániso aha musígazi ne eése, omuhalákazi na nyina, na aha mweenga na nyinazaala. 36 Enobi yo omuuntu balaaba abaantu be eéka yoómwe.e 37 Omuuntu weéna wéena ogwo ayeénda iíse nali nyina kuchila íinye, óogwo tichikwiilwe kuba omuheémba wáanze. Kaandi, weéna wéena ogwo alikumweenda omutábani nali omuhala kuchila íinye, óogwo náwe takwiilwe kuba omuheémba wáanze. 38 Omuuntu ogwo atakweenda kwiimucha omusalaba gwoómwe no kuunkuulaatila, ogwo takwiile kuba omuheémba wáanze. 39 Omuuntu ogwo alikweenda kuchígilila obulami bwoómwe, niwe alyaábunaga. Náho omuuntu ogwo alibuza obulami bwoómwe habwaánze, óogwo niwe alaabubonesa.”
Ensiimi Éezo Baliinaánkula Abaheémba Ba Yeézu
(Mariko 9:41)
40 “Omuuntu weéna wéena ogwo alikubaángisa íimwe, áaho naanyaangisa néenye. Kaandi, náwe ogwo alikunyaángisa íinye, naamwaangisa na Múungu ogwo annsiindikile íinye. 41 Weéna wéena ogwo alikumweénaankula omubáasi habwo kuba no omubáasi, Múungu naamuha empeéla nka nikwo alaaha omubáasi. Kaandi, weéna wéena ogwo alikumweénaankula omuuntu owe entúungwa nzima habwo kuba no owe ntúungwa nzima, Múungu naamuha náwe empeéla nka nikwo alikuheebwa owe ntúungwa nzima. 42 Weéna wéena ogwo alaamuha nóobu omutaho gwa meenzi galikunyilila ahali oómo omubaantu kanaku habwo kuba no omuheémba wáanze, mazima nniimbagaambila, ogwo takubuza empeéla yoómwe kuluga hali Múungu.”