ECHITABU CHO
KUBAANZA
Okuháangwa Kwi Igulu Ne Éensi
1
1 Obwa mbele na mbele, Múungu akahaanga igulu ne éensi. 2 Éensi ekaba elíbusa, etéena ensuso. Ekaba efuundikiilwe ne enziba za améenzi omuunsiimbaazi. Náho Omwooyo gwa Múungu gukaba gúsaambeele no kuteékana halugulu ya améenzi.Echilo Cha Mbele: Omwaanga
3 Múungu akagaamba, “Habeho omwaanga,” omwaanga gwaabáho, 4 yaánulilwa nkokwo omwaanga ni muzima bwooli. Hakukola aátyo akataaganísa omwaanga ne ensiimbaazi. 5 Yaayeta omwaanga, “Nyémisana,” ne ensiimbaazi, “Omuchilo.” Hakaba nyémisana, hakaba omuchilo, byóona hamo bikaba echilo cha mbele.
Echilo Cha Kábili: Igulu
6 Múungu akagaamba, “Omwáanya gubého ahagáti ya améenzi, gutaaganíse améenzi na améenzi.” 7 Hakukola óogwo mwáanya, gukataáganisa améenzi agali olugulu yo omwáanya na améenzi agali ahaansi yo omwáanya óogwo, bikaba nkokwo yaagaambile. 8 Yaayeta omwáanya óogwo, “Igulu,” hakaba nyémisana, hakaba omuchilo, echilo cha kábili.
Echilo Cha Kásatu: Kusohola Kwe Emimelo Omúunsi
9 Múungu akagaamba, “Améenzi agali iífo yi igulu geetúume hamo omumwáanya gwaágo, habého éensi eyómile,” bikaba nkokwo yaagaambile. 10 Yaayeta éensi eyómile, “Itaka,” ne emituumo ya améenzi yaazeeta, “Enyaanza,” yaánulilwa nkokwo éebyo byóona ni bizima. 11 Mála Múungu akagaamba, “Itaka lisohóze emimelo yóona eyina embíbo ne emiti elába amagoomba ageene embíbo, kati mumelo na kati muti no olugaanda lwaágwo halugulu ye éensi,” bikaba nkokwo yaagaambile. 12 Itaka lyaasohoza emimelo eyina embíbo zo olugaanda lwaázo, ne emiti eyina amagoomba agalíkuzáala embíbo zo olugaanda lwaázo. Múungu yaánulilwa nkokwo éebyo ni bizima, 13 hakaba nyémisana, hakaba omuchilo, echilo cha kásatu.
Echilo Cha Kána: Izóoba No Kwéezi
14 Múungu akagaamba, “Habeho emyaanga olugulu etaaganise omuchilo na nyemisana na eébe eméenko zo kumanyisa emihaanguko nké ebilo ne emyáaka. 15 Kaandi, eébe niyo emyaanga olugulu elikumulikila éensi,” bikaba nkokwo yaagaambile. 16 Akahaanga emyaanga ibili miháango, omwaanga omuháango gutegéke nyemisana no omwaanga omúche gutegéke omuchilo, kaandi akahaanga enyenyéezi. 17 Akatáho emyaanga éezo olugulu ebóne kumulikila éensi, 18 etegeke nyémisana no omuchilo no kutaáganisa omwaanga ne ensiimbaazi. Yaánulilwa nkokwo éebyo byóona ni bizima, 19 hakaba nyémisana, hakaba omuchilo, echilo cha kána.
Echilo Cha Kátaanu: Enyonyi Ne Eénfwi
20 Múungu akagaamba, “Enyaanza ziizule eénfwi ne ebihaángwa ebíindi ebiina obulami, ne ebipípi bíinzi bye enyonyi bituuntumuke hóona olugulu ye éensi.” 21 Habwéecho, akahaanga ebihaángwa biháango byo omunyaanza nké enkuungulutále na kati chihaángwa echituula omuméenzi no kwiízuza enyaanza kwiingana no olugaanda lwaácho. Kaandi akahaanga kati nyonyi eyina amanána kwiingana no olugaanda lwaáyo, yaánulilwa nkokwo éebi byóona ni bizima. 22 Áaho yaábifúuha ebihaángwa byo omunyaanza hakugaamba, “Muzaále muzaaliláne, mukánye omunyaanza.” Kaandi yaázífuuha enyonyi, hakugaamba, “Zikánye, ziizúze hóona olugulu ye éensi.” 23 Hakaba nyémisana, hakaba omuchilo, echilo cha kátaanu.
Echilo Cha Mukáaga: Ebituungaánwa, Enyameéswa, No Omuuntu
24 Múungu akagaamba, “Itaka lisohóze ebihaángwa ebiina obulami nké ebituungaánwa, ebihaángwa ebyaázula no kweékweesa ahaansi ne enyameéswa, kati chihaángwa no olugaanda lwaácho,” bikaba nkokwo yaagaambile. 25 Múungu akahaanga kati lugaanda lwe enyameéswa ne ebituungaánwa kwiingana ne engaanda zaábyo, ne ebihaángwa byóona ebyaázula no kweékweesa halugulu yi itaka kwiingana ne engaanda zaábyo, yaánulilwa nkokwo ni bizima. 26 Mála Múungu yaágaamba, “Tuhaánge abaantu ahaansuso yéetu, tubahaánge basusane neechwe babone kutégeka eénfwi zo omunyaanza, enyonyi zo olugulu, ebituungaánwa, enyameéswa, ne ebihaángwa byóona ebyaázula ne ebiikweesa halugulu ye éensi.” 27 Habwéecho, Múungu akahaanga abaantu balikususana nka weényini, akahaanga omukwaáta no omukázi. 28 Yaábafúuha hakubágaambila, “Muzaále muzaaliláne, mukánye, mwiizuze éensi, muzíte omubutégeki bwéenyu. Mutegeke eénfwi zo omunyaanza, ne enyonyi zo olugulu na kati chihaángwa echiina obulami echilibata halugulu ye éensi.” 29 Mála Múungu yaágaamba, “Muhuliilíze, naabaha kati mumelo oguzaala embíbo omúunsi yóona na kati muti oguzaala amagoomba ageene embíbo, éebi níbyo bilaaba ebyookulya byáanyu. 30 Nazo enyameéswa zóona omúunsi, enyonyi zóona zo olugulu, ebihaángwa byóona ebyaázula no kweékweesa ahaansi, ensoonga kati chihaángwa echiina obulami, niimbíha emimelo zóona zíbe ebyookulya byaázo,” bikaba bityo. 31 Múungu yaaleeba ebiintu éebyo byóona éebi yaahaangíle, mazima bikaba bili bizima bwooli, hakaba olweébazo, hakaba enchaákala, echilo cha mukáaga.