2
1 Óokwo nikwo kuhaangwa kwiígulu ne éensi na byóona ebilímo kwaahwéele.Echilo Cha Musaanzu: Múungu Yaáhuúmula Emilimo
2 Múungu káyaamazile emilimóze zóona zo kuhaanga, yaáhuúmula kukola emilimo echilo cha musaanzu. 3 Yaachifúuha echilo cha musaanzu no kuchisoloola kúba chitakatíifu, habwo kuba káyaamazile ebilo mukáaga byo kuhaanga, Múungu akahuúmula hachilo cha musaanzu.
Omuuntu Kutéebwa Omumusili Mzima Gwa Edeni
4 Éezi nizo empola zo kuhaangwa kwiígulu ne éensi. Obuchilo óobwo Omukáma Múungu káyaahaangile igulu ne éensi, 5 hakaba hatalího emimelo yoóna yóona halugulu ye éensi habwo kuba Omukáma Múungu akaba atákasiíndikile enzula omúunsi. Kaandi hakaba hatalího omuuntu wo kuzílima. 6 Náho améenzi ge enzwéelo gakaba nigafulúbila no kwiitilila éensi yóona. 7 Mbweenu nu, Omukáma Múungu akabuumba óogwo mukwaáta kuluga omwiitaka no kumuhúuhila olwóoya lwo obulami omunyíindo, yaaba echihaángwa echiina obulami. 8 Kaandi Omukáma Múungu akabyáala omusili gusemíile bwooli gwe emiti omuli Edeni,a olubazu lwo obutúluka bwe éensi, abóne kumutámo óogwo mukwaáta yaabuúmbíle. 9 Omu itaka lyo musili óogwo Omukáma Múungu akameza buli lugaanda lwe miti. Ne éezo miti yóona ekaba eli miluunzi na ekaba elába amagoomba galikunula agalíkugasa kulíibwa. Ahagáti yo musili óogwo hakaba haliho omuti gwo obulami no omuti gwo kumanya ebizima ne ebíbi. 10 Hakaba haliyo omunóna kuluga Edeni niguzéla améenzi nigwiitílila omusili óogwo. Kulugiilila áaho, omunóna óogwo gweébaganisa amatábazi aána. 11 Itábazi elya mbele nilyeétwa Pishóoni, nílyo lilikuzoóngoloka zoongoloka éensi yóona ya Havila aheene ezaháabu. 12 Ezaháabu ye éensi éezo ni nzima bwooli, etéena akatókoozi.b Heene ebiintu ebilikununkilila emizeeze nibyeétwa Bedóola na amabáale galíkweengelela nigeétwa Shoháamu. 13 Itábazi lya kábili nilyeétwa Gihóoni, nilizoongoloka zoongoloka éensi yóona ya Kushi.c 14 Itábazi lya kásatu ni Tíígilisi, nilizéla olubazu lwo obutúluka bwa Ashúuru. Itábazi lya kána ni Efuráati. 15 Omukáma Múungu akamuta óogwo mukwaáta omuli óogwo musili óokwo Edeni, abóne kuzílima no kuzeémanya. 16 Obuchilo óobwo, Omukáma Múungu yaámulagila, “Nookuundílwa kulya amagoomba go omuti gwoóna gwóona omuli óogwo musili. 17 Kwoónka amagoomba go omuti gwo kumanya ebizima ne ebíbi otagálya, habwo kuba obuchilo bwooligálya amagoomba áago, mazima olyaáfwa.”
Adáamu Na Eva
18 Omukáma Múungu akagaamba, “Tí kuzima óogu mukwaáta ayikále weénka, nniimukoléla omuhweezi wo kususana náze no wo kumugasa.” 19 Mála yaábúumba kuluga omwiitaka enyameéswa ne ebituungaánwa byóona bye éensi, ne enyonyi zóona zo olugulu. Omukáma Múungu yaábiléeta hali Adáamud abóne kumanya Adáamu naabyeeta amaziináchi. Amazíina áago yaabyeésile ebihaángwa éebyo gaaba nígo amazíina gaábyo. 20 Áaho Adáamu yaayeta izíina buli chituungaánwa, buli nyameéswa na buli nyonyi, náho talábwéenwe omuhweezi wo kumugasa Adáamu. 21 Habwéecho, Omukáma Múungu yaamuleetela Adáamu otúlo twíinzi. Káyaabeele achili omutúlo, Múungu yaámwiiháho olubazúlwe lúmo no kuhafuúndikiza enyama áaho yeehíle óolwo lubazu. 22 Omukáma Múungu akakola óolwo lubazu kúba omukázi, mála yaámuléeta hali Adáamu.
23 Níkwo Adáamu kugaamba, “Oótyo! Óogu ni igúfa kuluga omumagúfa gaanze, ne enyama kuluga omunyama yaanze. Óogu nichigása ayétwe ‘Omukázi’ habwo kuba yaaluga hamukwaáta.” 24 Ha ensoonga éezo, omukwaáta amuléka iíse na nyina, nawe azeénda kweékwaatanisa na mukazíwe, nabo bábili baaba omubili gúmo. 25 Adáamu na mukazíwe bóona bakaba bali busa, náho tibalábweene ensóni.