Empola Nzima Za Yeézu Kristu Nkokwo Zayaandikilwe Na
Matayo
Obweébeembezi
Echitabu éechi chikaandikwa na Matayo. Óobu Matayo akaba ali omuhaámbya, Yeézu akamwéeta kuba omuheémba woómwe. Empola nyiinzi éezo Matayo akaandika omu chitabu éechi, ne éezo akazisiinza weényini ha méeso goomwe. Omu chitabu éechi, Matayo akaandikila bole Abayahudi áabo abakamwiikiliza Yeézu. Náho Empola Nzima habwa Yeézu ti habwa Abayahudi boónyini boónka, náho na habwa abaantu bóona be éensi éezi. Empola Nzima nesoombola nka nikwo Yeézu niwe Kristu no Omuchuúnguzi ba abaantu. No kulabila Yeézu nka nikwo Múungu akahikiiliza góona áago akaba atiileho omulago ha baantu nka nikwo akole.
Echitabu cha Matayo chiloongizwe kuzima na nichisoomboola amahano meenzi omu bulami bwa Yeézu omúunsi éezi, kubaandiza kuzaalwa kwoómwe kuhicha kusuba kwoómwe omu igulu. Ahagáti nichisoombola ameégeso meenzi áago Yeézu akaba naayegesa abaantu. Omuunda ya ameégeso goómwe, nitubona kusombookelwa nka nikwo buli obukáma bwa Múungu, na nitwaangiswa kutúula omu bulami bwo kumunuliza Múungu.