Empola Nzima Za Yeézu Kristu Nkokwo Zayaandikilwe Na
Matayo
Olugaanda Lwa Yeézu Kristu
1
1 Áaga nigo amazíina go olugaanda lwa Yeézu Kristu.a Yeézu Kristu akalugiilila omu luzáalo lwo omukáma Daudi ogwo akaba ali mwiizukulu wo kuluga omu lugaanda lwa Ibrahímu.2 Ibrahímu akazáala Izáaka,
Izáaka yaazáala Yakobo,
Yakobo yaazáala Yuda na badugu boómwe.
3 Yuda yaazáala Peréesi na Zera hali Tamari,
Peréesi yaazáala Hezeróoni,
Hezeróoni yaazáala Aramu,
4 Aramu yaazáala Aminadabu,
Aminadabu yaazáala Nashoni,
Nashoni yaazáala Salumoni,
5 Salumoni yaazáala Boazi hali Rahabu,
Boazi yaazáala Obedi hali Ruthu,
Obedi yaazáala Yese,
6 na Yese yaazáala omukáma Daudi.
Daudi yaazáala Selemani kuluga aha mukázi ogwo akaba ali muka Uria,b
7 Selemani yaazáala Rehoboamu,
Rehoboamu yaazáala Abiya,
Abiya yaazáala Asa,
8 Asa yaazáala Yehoshafati,
Yehoshafati yaazáala Yoramu,
Yoramu yaazáala Uzia,
9 Uzia yaazáala Yoatamu,
Yoatamu yaazáala Ahazi,
Ahazi yaazáala Ezekia,
10 Ezekia yaazáala Manase,
Manase yaazáala Amoni,
Amoni yaazáala Yosia,
11 na Yosia yaazáala Yekonia na badugu boómwe,
obuchilo óobwo Abaiziraeli bakafululilwa babe abahalila omuunsi ya Babulóoni.
12 Abaiziraeli kabaabele baáfulukiile óokwo,
Yekonia yaazáala Shealitieli,
Shealitieli yaazáala Zerubabeli,
13 Zerubabeli yaazáala Abihudi,
Abihudi yaazáala Eliakimu,
Eliakimu yaazáala Azora,
14 Azora yaazáala Zadoki,
Zadoki yaazáala Akimu,
Akimu yaazáala Eliudi,
15 Eliudi yaazáala Eleazari,
Eleazari yaazáala Matani,
Matani yaazáala Yakobo,
16 Yakobo yaazáala Yozéfu, iíba wa Mariamu,
náwe Mariamu yaámuzáala Yeézu ogwo alikwéetwa Masiya.
17 Mbweenu, kuluga ahali Ibrahímu kuhika kuzaalwa kwo omukáma Daudi hakaba heena enzaalwa ikumi ne iína. Kaandi, kuluga ahali Daudi kuhika ha buchilo óobu Abaiziraeli baafululiilwe babe abahalila omuunsi ya Babulóoni, hakaba ne enzaalwa eziindi ikumi ne iína. Kaandi, kuluga omu buchilo óobwo baafululiilwe óokwo kuhika kuzaalwa kwa Masiya, hakaba ne enzaalwa eziindi ikumi ne iína.
Kuzaalwa Kwa Yeézu Kristu
18 Empola yo kuzaalwa kwa Yeézu Kristu niyo éezi. Mariamu nyina wa Yeézu, akaba asuumbikilwe na Yozéfu. Náho acháali batakalyaámile hamo, Mariamu yaasaangwa ayina eenda, ne eenda éezo akaba ayinayo aha buhicha bwo Omwooyo Mutakatíifu. 19 Yozéfu ali iíba, akaba ali omuuntu we entúungwa nzima omuméeso ga Múungu. Talayeenzile kumulega Mariamu, ha bwéecho akalamula kumuleka bwe eseleke.c
20 Náho achiba yaáteekwiize aátyo, ahonyini maléeka wo Omukáma amweésuululukiza omu kulóota, yaámugaambila, “Yozéfu, omutábani wa Daudi, otatiina kumutwáala Mariamu, habwo kuba echili omuunda yoómwe achibweene habwo obuhicha bwo Omwooyo Mutakatíifu. 21 Alyaázaala omutabani, neewe olyaámuluka izíina lyoómwe Yeézu,d habwo kuba óogwo niwe alichuúngula abaantu boómwe kuluga omu biheno byáabo.”
22 Éebyo byóona bikabaho bityo, chibone kuhikiilila echigaambo éecho Omukáma yaagaambisize omubáasi woómwe aáti,
23 “Leeba, omubiíkila alyaátwaala eenda,
náwe alyaázaala omutabani.
Niho bamuluke izíina lyoómwe Emanueli.”e
Ensoonga yi izíina éeli nikwo kugaamba oóti, “Múungu ayikala hamo neechwe.”