Kuzaalwa Kwa Yeézu
2
1 Omubilo éebyo, Kaizaalia Augusto yaálagila nkokwo, abaantu bóona abali omuunsi zoómwe, bazeénde beeyaandikise. 2 Okweeyaandikisa óoku kukaba kuli okwaambele, omubuchilo Kureniyo obu akaba ali omwaanaángwa we ensi ya Siíriya. 3 Nikwo, abaantu bóona baazeenda kweéyaandikisa, buli muuntu omu chaalo cháabo.4 Yozéfu nawe akaluga omu mumuzihwa gwa Nazaléeti omu iboma lya Galiláaya, yaahanama kuzeenda omuunsi ya Yudea omu mumuzihwa gwa Betlehemu. Habwo kuba Betlehemu nicho echaalo cha Daudi, na Yozéfu akaba ali wo lugaanda lwoómwe. 5 Omubuchilo óobwo, Yozéfu akazeenda kweéyaandikisa hamo na Mariamu, óogwo akaba amusuumbikile. Na Mariamu akaba ayine eenda. 6 No omubuchilo óobwo bakaba bali áaho Betlehemu, omwáanya gwo kuzáala kwo óogwo Mariamu bwaáhika, 7 yaazaala omwaana wo obukwaáta ali wo obuzigeezo, yaámusweekelela omumyéenda, yaámulyaámika omukáato ko kunyweésezamo ente. Habwo kuba, tibalabonesize echiseenge omuunzu yo kulyaama abazenyi.
Abalíisa Kweésulukizwa Na Maléeka
8 Omuumbúga ya áaho, bakaba balimo abalíisa abaabele nibeekala óomwo nibaleeba ebituungaánwa byáabo omuchilo. 9 Ahonyini, beesulukizwa na maléekab wo Omukáma. Ni ikuzo lyo Omukáma lyaábamulikila embazu zóona, baazila okweétimwa kuháango bwooli. 10 Náho maléeka óogwo yaábagaambila, “Mtatiina! Léeba, niimbamanyisa empola nzima bwooli za amanulilwa maháango ha baantu bóona, 11 kuba leélo éezi, omuchaalo cho omukáma Daudi, Omuchuúnguzi yaázaalwa ha bwéenyu. No óogwo Muchuúnguzi niwe Masiya,c Omukáma. 12 Ne emanyiso yo kubamanyisa éebyo, niyo éezi: nimusaánga omwaana omucheche asweekeliilwe emyéenda za abacheche, alyaamikizwe omukáato ko kunyweésezamo ente.”
13 Ahonyini, ahali óogwo maléeka, haabonekanáho ebihuumbi bya abalwaanila ngoma bya bamaléeka bazeenzíbe kuluga omwiigulu, baaba nibamukúza Múungu baáti,
14 “Múungu ali omwiigulu akuzibwe!
No omuunsi, obuhóolo bube
ha baantu áabo alikweenda!”
15 Áabo bamaléeka, kábaabeele baásubileyo omwiigulu, abalíisa beégaambila, “Tuzeénde Betlehemu, tubone kuleeba éebyo nka nikwo Omukáma yaatugaambila.” 16 Nikwo baazeenda nibeeluka, baábasaanga Mariamu na Yozéfu, baamubona óogwo mwaana omucheche alyaamile omukáato ko kunyweésezamo ente. 17 Na kábaabeele baámubweene omwaana óogwo, baábamanyisa abaantu empola zóona zo óogwo mwaana, éezo yaabagaambiile óogwo maléeka. 18 Na bóona abaahuliile áago baagaambiilwe na áabo balíisa, baásobelwa bwooli. 19 Náho, Mariamu yaagabiika áago góona omumwooyo gwoómwe, yaaba naagateekuza.
20 Kábaabalíile, abalíisa áabo baasuba, kunu nibamukúza Múungu, hali byóona éebyo baahulíile no kubona. Nkokwo baagaambiilwe na maléeka, nikwo bityo byóona byaabeele.
Yeézu Naahikiílizwa Hali Múungu
21 Omwaana óogwo Yeézu, obuchilo yaahicha echilo cha munáana, baámusala ikóba, baamuha izíina Yeézu. Nilyo izíina éelyo óogwo maléeka akaba yaámuheele, obuchilo nyina akaba atakatwéele eenda.
22 Mbweenu, kwiingana no óokwo byaabele nibyeendelwa omubilagilo bya Musa,d ebilo byo kweéyeza kwáabo byaaba byaáhika, Yozéfu na Mariamu baatwaala óogwo mwaana Yeézu óokwo Yeruzaléemu, babone kumuhikiiliza ha Mukáma. 23 Habwo kuba, chaandikilwe omubilagilo byo Omukáma nkokwo, “Buli mwaana wo obuzigeezo wo obukwaáta, naayeendelwa atoózwe kuba omutakatíifu ha Omukáma.”e 24 Hamo ne éebyo, bakaba nibeénda basohoze éecho chitáambo cho kweéyeza, echilikugaambwa chíti omubilagilo byo Omukáma, “Musohoze echitáambo cho otugúuti tubili, nali amáana ábili ge ebiiba.”
25 Na áaho Yeruzaléemu, hakaba haliho omuuntu oómo, izíina lyoómwe ali Simeyoni. Óogwo Simeyoni, akaba ali owe bikolwa bizima omuméeso ga Múungu, na akaba naamukoondoókela, kunu naaliindilila kuleeba okuchuungulwa kwa Abaizilaeli. Omwooyo Mutakatíifu akaba ali hamo náze, 26 na akaba yaamumanyisize no omwooyo mutakatíifu nkokwo talifa, obuchilo atakamubweene Masiyaf wo Omukáma Múungu. 27 Na abazeele boómwe kabamutweele Yeézu omuunzu ya Múungu,g babone kukola nkokwo ebilagilo bilikubalagila, óogwo Simeyoni nawe, Omwooyo Mutakatíifu yaámweebeembelela nkokwo ataáhemo óomwo. 28 Áaho yaamwáanaankula omumikonóye mwaana óogwo Yeézu, kunu naamusiingiza Múungu aáti,
29 “Íiwe Omukáma, mukúlu wa byóona,
óobu wakaánkuundila iinye omuhalila waawe,
iínfe omubuhóolo.
Nkokwo waandagiile, waábihicha,
30 habwo kuba neébonela obuchuúnguzi bwáawe,
31 óobwo waaloongize omuméeso ga abaantu bóona.
32 Óobwo buchuúnguzi no omwaanga gwo kwoóleka
omuhaanda gwaawe áabo Abanyamahaánga,
kaandi abaantu baawe Abaizilaeli nabo
babone ikuzo.”
33 Empola éezo yaagaambile Simeyoni zo óogwo mwaana, zaabasobeza iíse na nyina. 34 Áaho Simeyoni yaábafuuha, yaámugaambila Mariamu, nyina wo omwaana óogwo aáti, “Léeba! Óogu mwaana, atiilweho na Múungu nkokwo naabagwiisa Abaizilaeli béenzi, mala naabeemucha Abaizilaeli abaandi béenzi. Kaandi alyáaba emanyiso elyaangwa na abaantu, 35 mpaka ebyaabeele byeéselekile omumiganya yáabo bimanyiike kuba ahabwéelu. Neewe omumuganya gwaawe noosáasa bwooli, nko ochumisilwe no olubaadi.”
36 Na áaho hakaba haliho omubáasi oómo, omukeékulu bwooli, izíina lyoómwe ali Ana, muhala wa Fanwéeli, wo olugaanda lwa Ashéeri. Óogwo Ana akahicha emyáaka musaanzu yoónka ali hamo ne eéba, niho iíba kufwa. 37 Mala yaaba omukazi akaambwiile mpaka kuhicha amakamo ge emyáaka makumi munáana ne éena. Akaba asigala óomwo nyini omuunzu ya Múungu, kunu naamusaba nyemisana no omuchilo hachisiibo cho obutalya.
38 Omubuchilo óobwo Simeyoni naahooya na Mariamu, Ana yaaba yaáhika áaho, yaabaanza kumweésiingiza Múungu, no kugaamba empola zo omwaana óogwo ha baantu bóona abamutegiize nkokwo Múungu alyaáchuúngula Yeruzaléemu.
39 Yozéfu na Mariamu, kábaabeele baámazile kukola ebilagilo byóona byo Omukáma okwo bilikulagila, baasuba omúka omumuzihwa gwa Nazaléeti, omu iboma lya Galiláaya. 40 Óogwo mwaana yaákula, no kuba na amagala, akaba naayizuzwa amasala, no kufuuhwa na Múungu.
Omwaana Yeézu Omuunzu Ya Múungu
41 Abazeele ba Yeézu bakaba bazeenda Yeruzaléemu buli mwaaka, ha bilo bikulu bya Paásika.h 42 No obuchilo Yeézu obu akaba ali omwaana we emyáaka ikumi ne ibili, baazeenda náze óokwo omubilo bikulu kwiingana no obuteéka bwáabo. 43 No obuchilo bwe éebyo bilo bikulu bwáaba bwaáhwa, áabo bazeele bo óogwo mwaana Yeézu baasuba kutaaha omúka, náho weényini yaasigalayo óokwo Yeruzaléemu. Na abazeele boómwe tibalamanyile éecho, 44 náho bakateékuza nkokwo ali hamo na bazeenzíbe áabo baabele nibasuba hamo omúka. No obuchilo kábaabeele baázeenda oluzeendo lwe echilo chimo, bali omumuhaanda, baabaanza kumuloondela omubadugu na abanywáani báabo. 45 Na kabamubuzilwe, baasuba Yeruzaléemu, kunu nibamuloondela.
46 Omuchilo cha kásatu, baamusaanga omuunzu ya Múungu, ayikeele ahagáti ya abeégesa. Akaba naabahuliliza, naababuúza amabúuzo. 47 Abaantu bóona abaahuliile nkokwo yaabele naagaámba, baásobelwa bwooli habwo kweétegéeleza kwoómwe, na habwa akasubize koómwe.
48 Áabo bazeele boómwe, obuchilo kabaamubweene, nabo baásobelwa bwooli. Nyina yaámugaambila, “Íiwe mwaana waanze, na aha ensoonga chi! Kutukolela oótyo? Léeba iíso na iinye, tubeele twiina okutahwa tahwa bwooli omukukuloondela!” 49 Omwaana nawe yaábasubiza, “Habwaáchi mubele nimundoondela? Timukusoombookelwa nkokwo ni lwaampaka iinye kuba omuunzu ya Táata waanze?” 50 Óokwo kusubya kwa Yeézu, áabo bazeele boómwe tibalasoombookiilwe.