Abamagi Be Enyenyéezi Nibeéza Kumulámya Yeézu
2
1 Yeézu káyaabeele yaázeelwe, akazaalwa omumuzihwa gwa Betlehemu, omuchaalo cha Yudea, no obuchilo óobwo omukáma Herode akaba ali omutwáale. Leeba, abamagi be enyenyéezi bakaluga obutúluka, baáhika omu chikaali cha Yeruzaléemu. 2 Baábuuza báti, “Ali nkáhi ogwo omukáma wa Abayahudi ayaázaalwa? Tumanyisizwe nka nikwo yaázaalwa, kuba tukabona enyenyéezi yoómwe obutúluka. Ha bwéecho, tweeza kumulámya.”3 Áaho omukáma Herode káyaahuliile amagaambo gáabo, yaázululukilwa bwooli, hamo na abaantu bóona ba Yeruzaléemu. 4 Niho yaakobya abakúlu bóona ba abagabe ba Múungu na abeégesa be ebilagilo, yaábabúuza aáti, “Masiya naazaálwa nkáhi?” 5 Nabo baámusubiza, “Naazaálwa omumuzihwa gwa Betlehemu, omuchaalo cha Yudea. Nitusoomboókelwa éecho, habwo kuba omubáasi wa Múungu akaandika amaandiko aáti,
6 ‘Iiwe omuzihwa gwa Betlehemu éensi ya Yuda,
toli wo kugaywa nakáti omu batégeki be éensi ya Yuda.
Aha nsoonga omuliiwe alaálugamo omutégeki ogwo alitégeka abaantu baanze ba Iziraeli,
nko omuliisa alikuliisa entaama zoómwe.’a”
7 Mála Herode yaayéta habwe eseleke áabo abamagi be enyenyéezi babone kwiiza bamusoomboolele kuluunzi obuchilo óobwo baabaandize kuzibona éezo nyenyeezi. 8 Niho, yaabasiindika kuza Betlehemu, naabazila, “Mwiilooko mucheengelele kuluunzi kulemwa musoomboókelwe omwaana óogwo áaho aáli. Mbweenu, kamulimukwaása no kumubona, muundeétele empola bwaangu mbone ne éenye kuzeenda kumulámya.”
9 Obuchilo abamagi be enyenyéezi áabo kabamazile kuhuliiliza amagaambo go omukáma, bába baalugáho áaho. Léeba ahonyini, enyenyéezi éezo bakaba baabweene olubazu lwo obutúluka bába baázibona kaandi, yaabeébeembelela, yaálemwa yaahika áaho akaba ali omwaana, niho kweémeelela. 10 Áaho kábaabweene enyenyéezi éezo, baánulilwa endanuliilwe. 11 Mbweenu, kabataahile omuunzu, baabona akaana-olucheche hamo na Mariamu nyina, baateela ebizwi aha kumulámya omwaana. Bafuundula ensáho záabo, baáheeleza omwaana engabilano ze ezaháabu, obubaani na amazuta go omugaazu. 12 Kunu, Múungu abahanile omu kulóota nka nikwo batagaluka kaandi ahali Herode. Ha bwéecho, baátaaha owaabo aha kulabila omuháanda ogúundi.
Yeézu Na Abazeele Boómwe Nibahuungila Omu Ihaánga Lya Miísiri
13 Áaho abamagi be enyenyéezi áabo bakaba nibataaha, ahonyini maléeka wo Omukáma amwesuululukiza Yozéfu omu chilooto. Yaámugaambila, “Imuka! Otwaále omwaana na nyina, muhuungile omu ihaánga lya Miísiri. Mwiikaleyo óokwo kuhicha obuchilo ndeeza kubasoomboolela kusuba, habwo kuba Herode naayeénda kumuloondela omwaana óogwo abone kumusikiiza.” 14 Mbweenu, omuchilo óomwo nyini, Yozéfu yeémuka, yaatwaala mukázi woómwe hamo no omwaana, yaahuungila nabo omu ihaánga lya Miísiri. 15 Baahika Miísiri, beekala óokwo kuhicha obuchilo óobwo Herode akafwa. Éebyo bikabaho bityo, chibone kuhikiilila echigaambo éecho Omukáma akagaambisa omubáasi woómwe aáti, “Nkamweeta omutábani waanze kuluga Miísiri.”b
Abaana Bo Bwoózo Ba Betlehemu Nibasiingaalichibwa
16 Obuchilo Herode yaácheenga nka nikwo abamagi be enyenyéezi áabo bamukoóbile, yaánigahala muno. Niho yaasiindika abalwaanila ngoma boómwe Betlehemu hamo na ahaantu hóona he ebyaalo byo obutuuzi, yaábalagila nka nikwo, beéte kati mwaana wo bwoózo wéena ayaáhikize emyáaka ibili na áabo abatakazihikize. Akakola aátyo kwiingana no obuchilo óobwo akabuulizamo abamagi be enyenyéezi. 17 Niho echigaambo chahikiile éecho omubáasi Yeremia akagaamba aáti,
18 “Empámo zikoomba omumuzihwa gwa Rama,
empámo no kubolooga kwiinzi.
Raáhéeli naachulila abaana boómwe,
náwe takwéenda kusuumbililwa,
habwo kuba abaana boómwe baáfwiile.”c
Yeézu Na Abazeele Boómwe Nibasuba Kuluga Omu Ihaánga Lya Miísiri
19 Áaho Herode akaba yaáfwiile, maléeka wo Omukáma akamweesuululukiza Yozéfu omu chilooto óokwo Miísiri, 20 yaámugaambila, “Imuka! Otwaále omwaana na nyina, muze omuunsi ya Iziraeli, habwo kuba áabo abaabele nibeénda kumwíita omwaana óogwo, baáfwiile.”
21 Mbweenu, Yozéfu yeémuka, yaatwaala omwaana na nyina, yaasuba nabo omu ihaánga lya Iziraeli. 22 Náho óobu yaahuliile nka nikwo Arkelao mutábani wa Herode, akaba naategeka éensi ya Yudea ha lugazi lwe eése, aba yaátiina kuzeendayo óokwo. Múungu yaámuhana omu chilooto nka nikwo atazeéndayo óokwo kaandi. Ha bwéecho, baazeenda omuchaalo cha Galiláaya, 23 baahika omu iboma lya Nazaléeti, beekala óokwo. Niho echigaambo chahikiilizwe éecho echagaambilwe na ababáasi habwa Yeézu chíti, “Alyaáyetwa Omunyanazaléeti.”