Emilimo Ya Yohana Omubatiza
(Mariko 1:1-8; Luka 3:1-18; Yohana 1:19-28)
3
1 Ebilo kabyaachiile, akabaho omuuntu oómo ogwo akaba naayetwa Yohana Omubatiza. Yohana óogwo akaba naayolekeelela omu iluungu lya Yudea aáti, 2 “Mutamwe ebiheno byéenyu mumuhiindukile Múungu, habwo kuba obukáma bwo omu igulua bweéliliize.” 3 Yohana niwe ogwo ayagaambílwe no omubáasi Isaya aáti,“Omuuntu alikuhámuka ahi iláka omu iluungu,
‘Muguloonze omuháanda gwo Omukáma Múungu,
mugolole obulabo óobwo alaahiíngula.’ ”b
4 Emyeenda za Yohana zikaba zikozilwe na amooya ge entwaangabuleende náwe akaba azwaala omusumi gwe enkoba gumunywa eenda.c Ebyookulya byoómwe bikaba bili empalala na amoochi moochi go omu iluungu. 5 Abaantu baaba nibamuhululukila kuluga omu chikaali cha Yeruzaléemu, omuchaalo chóona cha Yudea, ne enkási zóona zo omunóna gwa Yolodáani. 6 Abaantu áabo baaba nibegaámba ebiheno byáabo, náwe yaaba naababatiza omunóna gwa Yolodáani.
7 Náho obuchilo Yohana akaba naabona Abafalisayo na Abasadukayod baamwiizáho beenzi abone kubabatiza, yaábagaambila, “Íimwe oluzáalo lwe empili! No oóha ayaábahana nka nikwo nimuhicha kweéliga echihulumuko cha Múungu éecho echilikwiiza habwo kubatizwa kwoónka? 8 Mbweenu, mwooleke ha bikolwa byeenyu nka nikwo mazima mwaálekeliile ebiheno byaanyu na nimumutegeza Múungu. 9 Mutazila nka nikwo Múungu naabeekiliza kamulaaba nimweebona nka nikwo, ‘Isiichweénkulu ni Ibrahímu!’ Niimbagaambila nka nikwo, Múungu yaakaáhicha kuhiindula amakúlugusi áaga kuba abaana ba Ibrahímu! 10 Óobu omuchwaáziiko gwa Múungu guli hali íimwe nke enséenya eli ahalugulu ye echitáko cho omuti. Na áabo abatakwooleka ebikolwa ebizima nibachwaaziíkwa, nkokwo buli muti óogwo ogutakulabya amagoomba agalikugasa, gunogolwa no kunagwa omumulilo.
11 “Íinye nniimbabatiza na meenzi kwoóleka nka nikwo mwaálekeliile ebiheno byaanyu no kumuhiindukila Múungu. Náho naayiza omuuntu oóndi ogwo alikuunnchila ha buhicha. Buzima tiinkwiílwe nóobu kuba omuzáana woómwe no kumusumuululila enkóba ze enkeeto zoómwe. Óogwo niwe alibabatiza aha Mwooyo Mutakatíifu na aha mulilo. 12 Óobu akwaasile olutemele omu ngalo zoómwe abone kweesula ebititi kuluga omu ngano. Engano éezo alyaázikobakobeza omu chitala choómwe, náho ebititi alyaábisiliiza omu mulilo óogwo ogutalilaala nakáti.”
Yohana Naamubatiza Yeézu
(Mariko 1:9-11; Luka 3:21-22)
13 Mbweenu, obuchilo óobwo Yeézu yaaluga Galiláaya, yaazeenda aha munóna gwa Yolodáani abone kubatizibwa na Yohana. 14 Náho Yohana yaagema kumuzibila, hakugaamba aáti, “Bita iiwe kwiiza hali íinye? Íinye niwe ndikweendelwa kubatizibwa neewe.” 15 Yeézu yaámugalulila aáti, “Iiwe okuúnde omubatize óobu, habwo kuba nitweendélwa tuhikiilize amazima góona áago Múungu naayeénda.” Mbweenu, Yohana yeékiliza, aba yaámubatiza.