Yeézu Naaleengesibwa Ni Izimu Elikúlu
(Mariko 1:12-13; Luka 4:1-13)
4
1 Mála, Yeézu yeebeembelelwa no Omwooyo Mutakatíifu kuzeenda omu iluungu abone kuleengeswa ni Izimu Elikúlu. 2 Yaamala óokwo ebilo makumi aána, omuchilo na nyemisana naayeyima kulya ebyookulya. Aha muheleeluko, yaalumwa enzala bwooli. 3 Niho óogwo Omuleengesi yaámwiizaho abone kumuleengesa. Yaamuzila aáti, “Kabilaaba iiwe ni Mutábani wa Múungu, galagile amakúlugusi áaga gahiinduke kuba emikaate.” 4 Náho Yeézu yaámugalulila aáti, “Chaandikilwe omu Maandiko Matakatíifu chíti,‘Omuuntu tiyaákuhicha kutuungwa ebyookulya byoónka,
náho natuúngwa habwa buli chigaambo éecho echilikuluga omu kanwa ka Múungu.’a”
5 Niho éelyo Izimu Elikúlu kumutwáala Yeézu omu chikaali chitakatíifu cha Yeruzaléemu, lyaamuhikiza aha luswi olula bwooli oluli aha nzu ya Múungu,b 6 lyaámugaambila liti, “Kabilaaba iiwe ni Mutábani wa Múungu, yeénage ahaansi. Tiwaákuhicha kuhutaala, habwo kuba byaandíkilwe omu Maandiko Matakatíifu nka nikwo,
‘Múungu naalagila bamaléeka boómwe habwi iiwe,
nabo nibakwaanaánkula omu ngalo záabo,
amagulu gaawe gataákwiiza gakeékuumpa ahi ikulugusi lyoóna lyóona.’c”
7 Náho Yeézu yaámugaambila, “Kaandi byaandíkilwe nka nikwo, ‘Otamuleengesa Omukáma, ali Múungu waawe.’d”
8 Niho, Izimu Elikúlu kumutwáala Yeézu aha lugulu lwi ibaanga líla bwooli. Áaho, lyaamwooleka engoma zóona ze éensi hamo no obugéega bwaámo, 9 lyaámugaambila liti, “Kabilaaba noonteelela ebizwi no kuúndamya, nniinkuha byóona éebi.” 10 Náho Yeézu yaáligaambila aáti, “Luheendeho áaha, Izimu Elikúlu we! Eyaandikilwe omu Maandiko Amatakatíifu nka nikwo,
‘Omulámye Omukáma, ali Múungu waawe.
Omugomookele weényini weénka.’e”
11 Niho éelyo Izimu Elikúlu kumuleka Yeézu áaho. Ahonyini, bamaléeka ba Múungu beeza kumuheéleza Yeézu.
Yeézu Naabaánza Ikola Lyoómwe Aha Bweélu
(Mariko 1:14-15; Luka 4:14-15)
12 Obuchilo Yeézu yaahuliile nka nikwo Yohana Omubatiza baamuta omuli itáano, yaazeenda omuchaalo cha Galiláaya, 13 yaahika okwo omu iboma lya Nazaléeti. Niho yaafuluka Nazaléeti yaaza kutúula Kaperinaumu. Kaperinaumu ni iboma éelyo lili aha ngeégeelo ye enziba ya Galiláaya, olubazu lwo omu mbíbi ze ebyaalo bya Zabuloni na Naftáali. 14 Chikabaho chítyo, chibone kuhikiilila echigaambo éecho Múungu akagaambisa omubáasi Isaya nka nikwo,
15 “Eensi ya Zabuloni ne ya Naftáali,
omuháanda gwo kwoólekela aha nyaanza,
na buseeli yo omunóna gwa Yolodáani,
omuli Galiláaya áaho balikutuula Abanyamahaánga,
16 abaantu áabo abatuula omu nsiimbaazi,
baabona omwaanga mwíinzi,
na áabo abalikutuula omubibeho byo olufu,
baayakilwa omwaanga gwa amacheelelélwa.”f
17 Kubaandiza obuchilo óobwo, Yeézu yaabaanza kwoólekeelela abaantu aáti, “Mutamwe ebiheno byéenyu mumuhiindukile Múungu, habwo kuba obukáma bwo omu igulu bweéliliize!”
Yeézu Naatóoza Abategi Bana Kuba Entumwa Zoómwe
(Mariko 1:16-20; Luka 5:1-11)
18 Obuchilo Yeézu akaba naalibata ahaangeégeelo ye enziba ya Galiláaya, yaabona abategi bábili, Simoni ogwo akaba naayetwa Peétero na Andrea mudugu woómwe. Áabo bábili bakaba nibatéga emitégo omu nyaanza babone kukwáasa eénfwi. 19 Yeézu yaábagaambila aáti, “Mwiíze, muunkulaatile! Íinye nniimbahiindula mube abategi ba abaantu.”g 20 Ahonyini, baaleka emitégo yáabo, baámukulaatíla Yeézu.
21 Obuchilo Yeézu yeelilaho kache, omumeesóge yaabona abaantu abáandi bábili, bali abadugu, Yakobo na Yohana, batabani ba Zebedayo. Áabo bábili bakaba bali omu bwaato hamo na isébo, bakaba nibasoboólola emitégo yáabo. Yeézu yaábeeta bamukulaatile. 22 Ahonyini, basiga áaho obwaato na isébo, bamukulaatíla Yeézu.
Yeézu Naayegesa Abaantu No Kuchíza Abalwéele
23 Yeézu akaba azoongoloka omuchaalo chóona cha Galiláaya. Akaba natáaha omu isomeloh no kweégesamo abaantu. Akaba naayolekeelela abaantu Empola Nzima zo obukáma bwo omu igulu no kuchíza amalwáala gáabo góona. 24 Empola za Yeézu zikaba nizikumuuka bwooli kuhika omuunsi yóona ya Siíriya. Abaantu batwáala abalwéele báabo bóona abeena amalwáala ga buli lugaanda. Omuli áabo nyini, bakaba balimo abaabele nibaagalazibwa bwooli, áabo ababele batiilwe na amazimu, abagwi be ebisiimbo, na ababele bali ensege. Yeézu yaábachiza bóona. 25 Mbweenu, ebipípi biháango bya abaantu byaaba nibimukulaatila kuluga omuli Galiláaya, Dekapoolisi, Yeruzaléemu, Yudea na aba buseeli yo omunóna gwa Yolodáani.