Yeézu Naaléengeswa
(Matayo 4:1-11; Mariko 1:12-13)
4
1 Yeézu yaaluga áaho ahamunóna gwa Yolodáani ayizwíile Omwooyo Mutakatíifu. Akeebeembelelwa no Omwooyo kuhika omuumbúga yo obwoóma,a 2 yaamala ebilo makumi aána, akaba naaleengesibwa ni Izimu Elikúlu. No omubuchilo óobwo, talalíile echiintu choóna chóona. Ahamuheleeluko gwe ebilo éebyo, enzala ekaba neemuluma.3 Niho éelyo Izimu kumugaambila, “Koólaaba íiwe oli Omwaana wa Múungu, oligaambile ibáale éeli lihiinduke kuba omukaate.” 4 Yeézu yaálisubiza, “OmuMaandiko Amatakatíifu chaandikilwe chíti, ‘Omuuntu tiyaákulama ahakulya echookulyab kwoónka.’c ” 5 Kalyaabalíile, Izimu éelyo lyaámutwaala Yeézu ahaantu hali olugulu bwooli, lyaamwooleka obukáma bwe éensi zóona ni ikuzo lyaámo ha káanya áako nyini. 6 Lyaámugaambila éelyo Izimu Elikúlu, “Obutegeki bwa byóona éebi, naakaákuha, hamo no obugéega bwaámo. Ha kuba byóona éebi, niinye óogwo nahéelwe, na kaandi nakaámuha omuuntu weéna wéena óogwo ndikwéenda. 7 Habwéecho, koólaandamya, niinkuha byóona éebyo.” 8 Yeézu yaálisubiza, “Chaandikilwe chíti, ‘Omulamye Múungu Omukáma wáawe, na omukolele weényini weénka.’d ”
9 Kalyaabalíile Izimu Elikúlu lyaámutwáala Yeézu Yeruzaléemu, lyaamweemeleza olugulu ha luswi lwe éenzu ya Múungu, lyaámugaambila, “Koólaaba níiwe oli Omwaana wa Múungu, yeénaguze ahaansi 10 habwo kuba chaandikilwe, ‘Múungu nalagila bamaléeka boómwe, babone kukweékomya.’ 11 Na kaandi, ‘Nibakusutula, amagulu gáawe oteéza okeékuumpa ahi ibáale.’e ”
12 Yeézu yaámusubiza, “Chaandikilwe chíti, ‘Otalileengesa Omukáma Múungu wáawe.’f”
13 Obuchilo Izimu Elikúlu kalyaabeele lyaámazile kumuleengesa Yeézu, lyaámuleka mpaka libone omwáanya ogúundi, gwo kumuleengesa.
Yeézu Naayaángwa Owáabo Nazaléeti
14 Káyaabaliile, Yeézu yaasuba owáabo Galiláaya, akaba ayina obuhicha bwo Omwooyo Mutakatíifu. Ne empoláze, zikasaámbáala bwooli omuunsi éezo yóona. 15 Yaazeenda naayegesa abaantu omuunzu záabo ze emikobo.g Na bóona, baaba nibamukúza.
16 Káyaabaliile, yaasuba omúka Nazaléeti, omumuzihwa óogwo yaalezílwe. Na ahachilo cha Sabato, nka nikwo yaabele amanyiile, akatáaha omuunzu yo omukobo, yeémuka, yaáyemeelela abone kusoma echigaambo cha Múungu. 17 Akahaabwa echitabu cho omubáasih Isaya, yaáchifuúndula, yaaloondela ahaandikilwe,
18 “Omwooyo gwo Omukáma, guli hamo neenye,
habwo kuba, yaantoólize kubamanyisa abahabi Empola Nzima.
Yaantuma mbone kubamanyisa embóhe,
nkokwo nibakomoololwa,
no kubamanyisa abahume,
nkokwo nibahuumbululwa améeso,
na áabo abalikwaágalazibwa,
mbachuúngule.
19 Mbone kuboólekeelela abaantu,
omwaaka óogwo Omukáma alaáyoleka engoonzi zoómwe.” i
20 Káyaamazile kusoma ebigaambo éebyo, Yeézu yaafuundikila echitabu, yaámusubiza omuhalila, male yeékala. Na abaantu bóona áabo abaabele bali omuunzu yo omukobo, bakaba nibamutukuliza améeso. 21 Niho yaabaanza kubagaambila, “Echaándiko éecho mwaahulila, leélo éezi chaáhikiilizwa omuméeso géenyu.”
22 Abaantu bóona baásobelwa bwooli ha bigaambo byoómwe bye embabazi ebyalugile omukanwa koómwe, nabo baamugaamba kuzima. Baabaanza kweébuuza, “Ngási, óogu tíwe mutábani wa Yozéfu?”
23 Yeézu yaábagaambila, “Tihéena mwaága nimuungaambile omugani óogu, ‘Íiwe mufumu, oyechíze íiwe nyini. Ensoonga, góona áago tuhuliíle áago okozile omumuzihwa gwa Kaperinaumu, ogakole na áaha omumuzihwa gwéetu!’ ” 24 Yeézu yaágaamba, “Niimbagaambila amazima, taliho omubáasi óogwo ayikilizwa omumuzihwa gwoómwe.
25 “Habuchilo bwa Eliya, telagwiile enzula emyáaka isatu na améezi mukáaga, mpaka enzala mpaango ekateela éensi yóona ya Izilaeli. Na mumanye kuzima nkokwo, bakaba baliho abakazi béenzi abakaambwiile omuunsi, omubuchilo óobwo. 26 Hamo ne éebyo, Eliya talatumilwe hali oómo wáabo. Náho kwoónka akatumwa ha mukazi oómo wo omu chaalo cha Zalefáati, omuunsi ya Sidóoni, ahéelu ya Izilaeli!
27 “No omubuchilo bwo omubáasi Elísha bityo, bakaba baliho ababeembe béenzi omuunsi ya Izilaeli. Hamo ne éebyo, taliho oómo wáabo óogwo yaayelizwe. Akachiza Naamani weénka, omuuntu kuluga éensi ya Siíriya!”
28 Áabo bóona áabo abaabele bakobile omuunzu éezo yo omukobo, obuchilo kábaahuliile áago magaambo ga Yeézu, baazila echihulumuko bwooli. 29 Ahonyini baáyemeelela bwaangu aha chiniga, baazeenda nibamusiindika. Baámusohoza ahéelu ye echaalo mpaka ahaangolomoko ndéehi yi ibaanga elyoombekilweho halugulu áaho omu chaalo cháabo, babone kumunáguza ahaansi. 30 Náho, yaahiingula ahagáti ye echipípi cha abaantu áabo, yaázeenda lwoómwe.
Yeézu Naataagucha Izimu Kumulugáho Omuuntu
(Mariko 1:21-28)
31 Káyaabaliile, Yeézu yaalugáho yaázeenda omumuzihwa gwa Kaperinaumu, omu iboma lya Galiláaya. Echilo cha Sabato, akatáaha omuunzu yo omukobo, yaabaanza kweégesa abaantu. 32 Ebyeégeso byoómwe, byaábasobela bwooli, habwo kuba bikaba biine obuzizi.
33 No omuunzu éezo yo omukobo, akaba alimo omuuntu oómo ayaabele akwaasilwe ni izimu. Izimu éelyo, lyaalila no kuhamuka ahi iláka, ha kugaamba, 34 “Íiwe Yeézu wa Nazaléeti, otatwágalaza íichwe! Weeza kutusiingáalicha? Niinkumanya íiwe, nkokwo niwe óogwo Omutakatíifu ayatooziibwe na Múungu!”
35 Yeézu akalikáama izimu éelyo ha kugaamba, “Buúmba akanwa káawe! Oluge ha muuntu óogu!” Ahonyini, izimu éelyo lyaámugwiisa omuuntu óogwo ahaansi, omuméeso ga abaantu áabo bóona. Male lyaamulugaho obutamuhutaaza.
36 Abaantu bóona, baásobelwa bwooli, beébuuza, “Ni magaambo chi áaga? Léeba mazimu, omuuntu óogu yaagazema ha buzizi na amagala nkokwo galugeho aha baantu, na ahonyini nigalugaho!” 37 Nikwo, empola za Yeézu, kusaambaala bwooli omuunsi éezo yóona.
Yeézu Naabachíza Abalwéele Béenzi
(Matayo 8:14-17; Mariko 1:29-34)
38 Yeézu akalugamo omuunzu éezo yo omukobo, yaatáaha omuunzu ya Simoni. Óomwo, nyinazáala wa Simoni akaba ayina omuswíiza muháango. Baámusaba Yeézu nkokwo amuchize.
39 Niho kweémeelela héehi náze, yaagukáama omuswiiza óogwo. Ahonyini omuswiiza gwaáhwa. Niho nyinazaala óogwo, yeemuka ahonyini, yaabaanza kubatóna ebyookulya.
40 No obuchilo izóoba likaba nilihweélamo, echilo cha Sabato nichihwa, abaantu baámuleétela Yeézu abalwéele báabo bóona aba malwéele gachiléene. Yeézu akateelaho buli oómo emikono yoómwe, yaábachíza. 41 Hamo ne éebyo, Yeézu yaabiinga amazimu omubaantu béenzi, gaatéela empámo omukugaamba, “Íiwe oli Omwaana wa Múungu!” Habwo kuba amazimu áago gakaba nigamumanya nkokwo Yeézu niwe Masiya,j yaagakáama no kugaángila gatagaambagáamba kaandi.
Yeézu Naayegesa Abaantu
(Mariko 1:35-39)
42 Nyeéncheémo, obuchilo haácha, Yeézu akalugaho áaho, yaázeenda ahaantu hatéena abaantu. Abaantu, baaba nibamuloondela no obuchilo baamubweene, baayeenda kumwaángila, kuba atabaleka. 43 Náho, Yeézu yaábagaambila, “Ni lwaampaka nzeénde kaandi omubyaalo ebiindi, mbone kubamanyisa Empola Nzima yo obukáma bwa Múungu.k Habwo kuba, nkatumwa habwe ensoonga éezo nyini.”
44 Niho, Yeézu yaázeendelela kulabila éensi ya Yudea,l naayegesa abaantu omuunzu záabo ze emikobo.