Yeézu Naabaánza Kutáho Abaheémba Boómwe
(Matayo 4:18-22; Mariko 1:16-20)
5
1 Echilo chimo, Yeézu akaba ayemeeliile ahaangeégéelo ye Enyaanza ya Genezareti,a kunu naayegesa abaantu echigaambo cha Múungu. Baaba nibamwiililila, babone kumuhuliiliza, mpaka baámumigisiliza. 2 Na áaho ahaangeégéelo ye enyaanza, Yeézu akabona amáato ábili. Abategi bakaba bagalekile amáato, habwo kuba bakaba niboóza emitégo yáabo.
Abategi niboóza no kusoboolola emitégo yáabo. (5:2)
4 No obuchilo káyaamazile kweégesa, yaámugaambila Simoni, “Búga obwaato muzeende obuziba, mutege emitégo zéenyu, muzubule eénfwi.” 5 Simoni yaámusubiza, “Íiwe mukáma wéetu, léeba obwíile kucha tuléele nitukola omulimo gwo kutega ha kweéyomeleza obutabonesa chiintu! Náho habwo kuba ni íiwe waángaambila oótyo, niinzitega óobu nyini.”
6 Habwéecho Simoni na bazeenzíbe baázitega emitégo yáabo omuméenzi, baázubula eénfwi nyiinzi bwooli, mpaka emitégo záabo zaabaanza kutéemuka. 7 Kuhicha baayeleeza emikono kwéeta bazeenzi baabo abaabele bali omubwáato obuundi, beéze kubahweela. Obuchilo kabeezile, béezuza eénfwi amáato ábili, mpaka bakaba beéliliza no kutubila.
8 Simoni, káyaabweene amahano áago, yaateela ebizwi omuméeso ga Yeézu, yaámugaambila, “Íiwe Mukáma, oondugého iinye, habwo kuba iinye ndi omuhéni!”
9 Simoni akagaamba ebigaambo éebyo, habwo kuba weényini hamo na bazeenzíbe bóona, bakasobelwa bwooli kubonesa eénfwi nyiinzi éezo baazubwíile. 10 Yakobo na Yohana, batábani ba Zebedayo, bakaba nibatega hamo na Simoni. Éebyo byaábasobela nabo.
Niho Yeézu kugaamba, “Íiwe Simoni, otaákutiina! Ha kuba kulugiilila leélo éezi, noóba omutegi wa abaantu.” 11 Simoni na bazeenzíbe baasubya amáato ahachaambo, baaleka amáato gáabo ne ebiintu byáabo byóona, baámukulaatila Yeézu.
Yeézu Naabachíza Aba Mabéembe
(Matayo 8:1-4; Mariko 1:40-45)
12 Obuchilo Yeézu akaba ali omumuzihwa gúmo, hakeeza omuuntu oómo ayaabele ayizwíile amabéembe omubili gwóona. Óogwo káyaamubweene Yeézu, yaázumala omuméeso goómwe, yaahicha obusobwe ahaansi, yaámusaba, “Íiwe Mukáma, koólayeenda, oyine obuhicha bwo kuunyéza.” 13 Yeézu yaagolola omukóno, yaamukolaho, yaámugaambila, “Niinyeénda, oyele!” Ahonyini, amabéembe goómwe gaamulugáho.
14 Yeézu yaamulagila aáti, “Otamugaambila omuuntu weéna wéena éebi! Náho, zeénda oyeyoleke ha bagabe ba Múungu, osohoze echitáambo cho kwoóleka nkokwo waayézwa,b nkokwo Musa okwo yaalagíile.”
15 Hamo ne éebyo, empola za Yeézu zaaguma kumanyika bwooli ha baantu. Bakaba nibamwiizaho ebipípi ne bipípi, babone kuhuliiliza Ebyeégeso byoómwe, no kuchízwa amalwáala gáabo. 16 Náho, Yeézu akaba abaleka no kuzeenda ahaantu hatéena baantu amusabe Múungu.
Yeézu Naachiza Omuuntu Óogwo Alageele Omubili
(Matayo 9:1-8; Mariko 2:1-12)
17 Echilo chimo, Yeézu akaba naayegesa abaantu. No omuli áabo, bakaba balimo Abafalisayo,c hamo na abeégesa be ebilagilo.d Áabo, bakaluga buli emitúulo ya Galiláaya ne ya Yudea, ne ya Yeruzaléemu. Yeézu akaba ayina obuhicha kuluga ha Mukáma Múungu abone kuchiza abaantu.
18 Niho, béeza abakwaáta, bakaba beemukize omuuntu ayaabele alageele omubiligwe, akaba alyaamile ahamukeeka gwoómwe. Bakaba nibeénda kumutaasha omuunzu, babone kumuléeta omuméeso ga Yeézu. 19 Náho bakalemwa kubonesa ho kumulabya, habwo kuba hakaba heena embága ya abaantu béenzi bemigisiliize. Niho baalamula kuhanama olwéego baahika ahaluswi lwe éenzu, beemukize omuuntu óogwo. Obuchilo baabele bali ahalugulu, baafumulaho aaho ahaluswi, baámutuucha ne echitabo choómwe ahagáti ya abaantu áabo bóona, omuméeso ga Yeézu.
Baámutuucha ne echitabo choómwe ahagáti ya abaantu áabo bóona, omuméeso ga Yeézu. (5:19)
21 Abeégesa be ebilagilo na Abafalisayo áabo, ahonyini baabaanza kuduguluma nibeegaambila, “Noóha óogu? Léeba naagaámba ebigaambo byo kumuzuma Múungu? Taliho muuntu owo kuhicha kuganyila ebiheno, náho Múungu weényini weénka!”
22 Áago bakaba nibateekuza, ahonyini Yeézu yaágamanya, yaábabúuza, “Habwaáchi nimuteekuza mútyo omumiganya yéenyu? 23 Mbweenu! Nichiiha echili bwaangu? Kumugaambila omuuntu, ‘Ebiheno byaawe byaáganyilwa,’ nali kumugaambila, ‘Yemeelela, ozeénde?’ 24 Iinye, niinyeénda mumanye kuzima nkokwo, Omwaana wo Omuuntue ayina obuzizi bwo kuganyila ebiheno omuunsi.”
Male Yeézu yaámugaambila omuuntu óogwo, “Niinkugaambíla, yemeelela! Oyimuche echitabo cháawe, ozeénde omúka.”
25 Ahonyini, omuuntu óogwo yaáyemeelela omuméeso ga abaantu, yeemucha omukeeka gwoómwe éecho akaba abyaámiile, yaazeenda omúka kunu naamweesiingiza Múungu. 26 Abaantu bóona áabo, baásobelwa bwooli no kuzila okweeganya. Hamo ne éebyo, bakaba nibamweesiingiza Múungu, nibagaámba, “Kási! Leélo, twaabona ebigaambo byo kusobeza!”
Yeézu Naamugaambila Láawi Nkokwo Amukulaatile
(Matayo 9:9-13; Mariko 2:13-17)
27 Kagahwéele áago, Yeézu yaalugamo omuunzu, yaabona omuhaámbya oómo, izíina lyoómwe naayetwa Láawi. Nawe Láawi, akaba ayikeele omukazu koómwe kokutobesezamo oluhaambwe.
Áaho, Yeézu yaámugaambila, “Íiwe Láawi, onkulaatile!” 28 Ahonyini, Láawi yaáyemeelela, yaaleka byóona, yaaba naamukulaatila Yeézu.
29 Káyabaliile, Láawi yaamukolela Yeézu obuzenyi buháango omukáye. Omuunzu óomwo, bakaba bakobile abahaámbya béenzi, na abaantu abaandi abaabele nibalya hámo haluhélo. 30 Chaaletelela Abafalisayo, na abeégesa báabo be ebilagilo, kuzeenda kubadugulumila abaheémba ba Yeézu, baágaamba, “Habwaáchi nimulya no okunywa hamo na abahaámbya, na abaandi abeene ebiheno?”
31 Yeézu yaábasubiza, “Abaantu abatakulwáala, tibakugaswa omufumu. Náho abaantu áabo abalikugaswa nawe náabo abalikulwáala! 32 Bityo nyini, iinye tiindeézile kwéeta áabo abalikweébona nkokwo beena ebikolwa bizima omuméeso ga Múungu baankuláatile. Náho néeza kwéeta abaheni, nkokwo babileke no kumutegeza Múungu.”
Yeézu Naabuúzwa Empola Ze Echisiibo
(Matayo 9:14-15; Mariko 2:18-20)
33 Abaantu áabo baámugaambila Yeézu, “Abaheémba ba Yohana nibazila echisiibo che ebyookulya entulo nyiinzi, obuchilo nibamusaba Múungu. Bityo na abaheémba ba Abafalisayo, nabo bakola batyo nyini. Náho abaheémba báawe, habwaáchi tibakuzila echisiibo, nibazeendelela kulya no okunywa!”
34 Yeézu yaabasubiza, “Obuchilo omuswéezi achili hamo na abazenyi boómwe omubweenga, nimuhicha muta kubakola abazenyi áabo babe ne echisiibo cho okulya no okunywa? 35 Náho, omubilo éebyo ebiliiza, omusweezi alyaáyihwaho omugati yáabo. Omubilo éebyo, niho baliba ne echisiibo cho okulya.”
Yeézu Naasusanisa Ameégeso Ga Kala Na Goómwe Amasha
(Matayo 9:16-17; Mariko 2:21-22)
36 Yeézu yaábagaambila omugani ogúundi, yaágaamba, “Taliho omuuntu óogwo ahikize kutema echiláka kuluga ha mweenda musha, abone kuchibaziila aha mweenda omukulukulu. Habwo kuba, kaálakola aátyo, naába yaásiisa omweenda gwoómwe omusha. Hamo ne éebyo, echiláka éecho cho omweenda omusha, tichikukuúndilana no omweenda omukulukulu.
37 “Na taliho omuuntu óogwo ahikize kutamo eviinif eénsha omuunfulebe enkulukulu. Habwo kuba, kaálakola aátyo, eviini eénsha neebila, neeyáta embíiko éezo, nayo neseéseka. Ne embíiko éezo, zítyo nyini nazo nizibiíha. 38 Náho eviini eénsha, nigeendelwa gateébwe omuumbiiko ze eémpu eénsha!
Enfulebe yo kubiikamo eviini. (5:38)
39 “No omuuntu óogwo amanyiile kunywa eviini ya kala, áaba atakulígilag eviini eénsha. Agaamba nka nikwo, eya kala niyo nzima.”