Yeézu Naachíza Omu Beembe
(Mariko 1:40-45; Luka 5:12-16)
8
1 Obuchilo Yeézu yaatuukile kuluga áaho ahi ibaanga, ebipípi biháango bya abaantu bikamukulaatila. 2 Leeba, yeeza omuuntu oómo ayaabele ali omubeembe, yaámwiililila, yaateela ebizwi omu méeso ga Yeézu, yaámugaambila aáti, “Mukáma waanze, nniinsombookelwa nka nikwo oyine obuhicha. Koólaaba nichikusemelela, nniinsaba onyéze!” 3 Yeézu yaagolola omukonógwe, yaamukolaho, yaámugaambila aáti, “Niinyeénda ochile, oyichume!” Ahonyini, yaayézwa endwáala yoómwe. 4 Niho, Yeézu yaámugaambila aáti, “Lola, otabigaambila muuntu weéna wéena! Choónka ozeénde oze kweéyoleka ha mugabe, osohoze echitáambo nka nikwo ebilagilo bya Musa bilikulagila, obóne kwoóleka abaantu nka nikwo weéchuma chuma.”Okwiikiliza Kwo Omwiímeelelezi Wa Abalwaanila Ngoma
5 Obuchilo Yeézu akaba naatáaha omu iboma lya Kaperinaumu, omwiímeelelezi oómo wa abalwaanila ngoma be Echirúumi yaamwiilukilaho abone kumuzuna. 6 Yaámugaambila aáti, “Íiwe Mukáma, nyina omuhalila omúka ali aha chihalala, yaábeele ensege, ayine obusáasi buháango bwooli.” 7 Yeézu yaámugalulila aáti, “Niinyiza kumuchiza.” 8 Niho omwiímeelelezi óogwo yaámugalulila, “Mukáma, mazima tiinkwiílwe otaahemo omwaánze. Náho lagíla kwoónka, omuhalila waanze náwe naachila. 9 Habwo kuba neenye nyini nzila abaankulila, nyina abalwaanila ngoma áabo bali ahaansi yaanze. Kaándikulagila oómo nka nikwo, ‘Zeénda,’ entulo eémo azeénda. Kaandi, kaándikulagila oóndi nka nikwo, ‘Iíza,’ entulo eémo náwe ayiza. Na kaándikumulagila omuzáana waanze nka nikwo, ‘Kola omulimo óogu,’ náwe agukola.”
10 Obuchilo Yeézu yaahuliile amagaambo áago, yaásobelwa bwooli. Yaábagaambila abo abaabele nibazeénda náze aáti, “Mazima nniimbagaambila nka nikwo, nóobu omu Baiziraeli bóona, tiínkabweene omuuntu weéna wéena owo kwiikiliza kuháango nko óoku! 11 Niimbagaambila nka nikwo, obuchilo bwa amazenyi go kuhika kwo obukáma bwo omu igulu, abaantu béenzi nibeéza kulugiilila obutuluka no obugwa. Baleékala ahaansi babone kulya hamo na baguúku béetu Ibrahímu, Izáaka na Yakobo. 12 Náho abaantu bo obukáma óobwo, balyaánagwa ahéelu omu nsiimbaazi, áaho, halyaábaho okuchula no kuteélana ameeno.”
13 Mbweenu, Yeézu yaágaambila omwiímeelelezi óogwo wa abalwaanila ngoma aáti, “Zeénda omúka. Chibe hali íiwe nka nikwo kuli okwiikiliza kwaawe.” Áako kaziingo nyini, omuhalila woómwe aba yaáchila.
Yeézu Naachíza Abalwéele Béenzi
(Mariko 1:29-34; Luka 4:38-41)
14 Niho Yeézu kuzeenda omúka ya Peétero. Kayaátaahilemo omuunzu, yaámubona nyinazala wa Peétero abyaamile aha chitabo, atiilwe omuswíiza. 15 Yeézu yamukola ha mukono, entulo eémo omuswíiza óogwo guba gwaamulugaho. Nikwo kwiimuka, yaabaanza kumugabila Yeézu.
16 Izooba kalyaaheenzile omukóno, baamuleetela Yeézu abaantu béenzi áabo abaabele bakwaasilwe na amazimu. Náwe yaágabiinga amazimu áago habwo kulagila. Kaandi, yaachíza abaantu bóona abaabele bali abalwéele. 17 Yeézu akakola áago góona, abone kuhikiiliza echigaambo éecho echaabele chigaambilwe habwa weényini no omubáasi Isaya nka nikwo,
“Akeemela enaku zéetu,
akahikiilila amalwáala géetu.”a
Entaángano Ya Kumukulaatila Yeézu
18 Obuchilo Yeézu akabona nka nikwo embága ya abaantu bamuzoongolokile, yaalagila abaheémba boómwe beloonze kwaambúka enziba bazeénde hamulaambo. 19 Mbweenu, omweégesa oómo we ebilagilo bya Musa yaamwiililaho Yeézu, yaámugaambila aáti, “Íiwe Mweégesa, hoóna hóona áaho olaáza, íinye ninkúkulaatila.” 20 Yeézu yaámugalulila aáti, “Nyamuhaábwa zizila ebiina ne enyonyi zizila ebyaali, náho íinye Mutábani wo Omuuntu,b tiinzila nóobu ho kubyaámika omutwe gwaanze!”
21 Omuheémba oóndi womwa Yeézu yaámugaambila aáti, “Mukáma, nkuúndila ntaandike nzeénde kumuziika táata.” 22 Yeézu yaámugalulila aáti, “Iiwe onnkuláatile, nooleke abáfwiile omu mwooyoc babaziike abáabo abáfwiile.”
Yeézu Nachuleéza Omuyaga Muháango Omu Nyaanza
(Mariko 4:35-41; Luka 8:22-25)
23 Mbweenu, Yeézu yaataaha omu bwaato, na abaheémba boómwe baámukulaatíla. 24 Obuchilo kábaahikile ahagáti ye enziba, ahonyini gweeha omuyaga muháango bwooli na amakóonzo gasweeka obwaato. Náho Yeézu weényini akaba ahuniile. 25 Abaheémba boómwe baámwiililiho baámusisimula, nibateéla eyoombo báti, “Íiwe Mukáma, otuchize! Twaásiingaalika!”
26 Yeézu yaábagaambila aáti, “Íimwe banya kwiikiliza kuche, habwaáchi nimutiina?” Áaho nyini ayemeelela, agukáama omuyaga ne enziba. Entulo eémo, enziba chaba echineembe. 27 Abo baantu baásobelwa, baágaamba báti, “Omuuntu óogu ni muuntu chii, alikugomokelwa omuyaga ne enziba?”
Yeézu Nataagucha Amazimu Kuluga Ha Bagadara Bábili
(Mariko 5:1-20; Luka 8:26-39)
28 Obuchilo Yeézu akaba yaáyaambukile buseeli ye enyaanza, yaáhika éensi ya Abagadara. Yaabugana áaho na abaantu bábili abakwaasilwe amazimu. Bábili áabo bakaba nibaluga omu nyáanga zo kuziikilamo abáfwiile.d Bóona bakaba bazazaheele muno na táliho omuuntu ogwo ayagimile kulabila óogwo muháanda.
29 Mbweenu, batéela eyoombo baágaamba báti, “Íiwe Yeézu Mutábani wa Múungu, tukatuulanwa chi iiwe ne neechwe ka notuloónda? Ngási, wéeza kunu éezi kutwaaya gutakahikile omuhelo gwa akachilo kéetu?” 30 Héehi na áaho baabele bali, hakaba haliho obusho bwe empunu nizilya. 31 Niho amazimu áago gaámutoozela Yeézu, gaazila gati, “Kabilaaba nootubiínga áaha, otwiikililize tutaahemo omu busho bwe éezo mpunu.” 32 Náwe yaagagaambila aáti, “Nimwiilooko!” Mala, amazimu gabalugamo abaantu áabo, gazeénda no kutaahilila omu mpunu éezo. Ahonyini, óobwo busho bwóona bwaátuuka bwaangu ahaangolomoko nibweesiindikiliza no kuza kúgwa omunyaanza, no kufweela omu meenzi óomwo.