Okwiikiliza Kwo Omwiímeelelezi Wa Abalwaanila Ngoma
7
1 Obuchilo Yeézu káyaamazile kugaamba ebigaambo éebyo byóona ha chipípi cha abaantu, yaázeenda yaatáaha omumuzihwa gwa Kaperinaumu. 2 Omumuzihwa óogwo, hakaba heena omwiímeelelezi wa abalwaanila ngoma be Echirúumi. Omwiímeelelezi óogwo, akaba ayina omuhalila óogwo akaba ayeenda bwooli. Náho omuhalila óogwo akaba naalwaála, ali héehi no okufwa.3 Habwéecho, omwiímeelelezi óogwo, obuchilo káyaahuliile empola za Yeézu, yaatuma abanyaampala abaandi ba Abayahudi hali Yeézu, baze kumusaba ayize kumuchíza omuhaliláwe. 4 Abanyaampala áabo, obuchilo kábaahikile hali Yeézu, baámuneémbelela bwooli ha kumugaambila, “Omuuntu óogwo, akwiile omukolele echigaambo éechi, 5 habwo kuba naayeénda éensi yéetu, nawe niwe óogwo ayatwoombekiile éenzu yéetu yo omukobo.”
6 Niho Yeézu yaalugáho hamo na abanyaampala áabo kuzeenda omúka yo omwiímeelelezi óogwo wa abalwaanila ngoma. No obuchilo Kábaabeele beéliliza áaho, omwiímeelelezi óogwo akasiindika abanywaaníbe, baazeenda ne empola zoómwe hali Yeézu, baámugaambila, “Íiwe Mukáma, otaákwiiyagalaza bwooli, habwo kuba iinye tiinkwiílwe kuba ni isima liháango lityo, íiwe otaahe omuunzu yaanze. 7 Ne éezo niyo ensoonga naabona kaandi nkokwo tiinkwiíle kuhika hali íiwe. Náho, ogaámbe echigaambo chimo kwoónka, mazima omuhalila waanze naachila.
8 “Habwo kuba, neenye ndya ahaansi yo obutégeki bwa abakúlu báanze, nyina abalwaanila ngoma abali ahaansi yaanze. Kaándikumulagila oómo, ‘Ozeénde’, ahonyini naazeénda. Kaándikumulagila oóndi, ‘Iíza’, nawe ahonyini naayiza. No omuhalila waanze, kaándikumulagila, ‘Kola oóti’, nikwo alaakola.”
9 Obuchilo Yeézu káyaahuliile éebyo, yaámusobelwa bwooli. Yaábechebuka echipípi cha abaantu áabo abaabele nibamukulaatíla, yaábagaambila, “Niimbagaambila nkokwo, noobu omu Abaizilaeli bóona, nchaali tiínkabweene omuuntu weéna wéena owo kwiikiliza kuháango nko óoku!”
10 Áaho, abaantu áabo abaatumilwe kabaasubile omúka yo omwiímeelelezi óogwo, baasaanga omuhalila yaáchizile.
Yeézu Naamuzoola Omusígazi Óogwo Afwíile
11 Hakáanya káche, Yeézu akazeenda omu chaalo chilikweetwa Naíni, akaba ali hamo na abaheémba boómwe, na abaantu abaandi béenzi. 12 No obuchilo káyaabeele yeéliliza iléembo lyo omuzihwa, yaabugana na abaantu abaabele beemukize omutúumbi gwo omukwaáta. Omukwaáta óogwo, akaba niwe ali omwaana nyakámo, hali nyina, óogwo ayaabele ali omukazi akaambwiile. Omukazi óogwo, akaba akulaatileene na abaantu béenzi bo omumuzihwa óogwo.
Yeézu naamuzóola omusígazi ayaabele yaáfwíile. (7:12)
13 Obuchilo Omukáma yaamubwéene óogwo omukazi, yaamuzilila echiganyizi, yaámugaambila, “Leka kuchula.” 14 Yeelila héehi ne echitwaálizi echaabele chiimuchíze omutúumbi, yaachikolaho. Na abaantu áabo abaabele bachiímukize, baayemeelela.
Yeézu yaágaamba, “Íiwe musígazi, niinkugaambila, ‘imuka!’ ” 15 Óogwo ayaabele afwíile, ahonyini yeémuka. Yeékala, yaabaanza kaandi no kugaambagaamba. Niho, Yeézu yaamuhikiiliza hali nyina.
16 Abaantu áabo bóona, beétimwa bwooli, baabaanza kumukúza Múungu omukugaamba, “Omubáasia mukúlu, yeesulukiza omuli íichwe!” Kaandi baágaamba, “Múungu, yéeza kuhwéela abaantu boómwe!” 17 Empola ze éebyo, zaásaambala bwooli omuli Yudea yóona, no omuunsi eziindi zo obutuuzi.
Yohana Omubatiza Naatuma Abaantu Kumubuuza Yeézu
18 Obuchilo Yeézu akaba naakola byóona éebyo, abaheémba ba Yohana, baamuleétela empola. Yohana nawe yaayeta bábili omuli áabo, 19 yaabatuma nkokwo bazeénde kumubúuza Omukáma Yeézu, nkokwo, “Ngási íiwe niwe óogwo aliíza, nali tutegamilile oóndi?”
20 Nikwo, obuchilo áabo bábili bamuhikileho, baámugaambila, “Yohana Omubatiza yaátutuma hali íiwe, tukubúuze, ‘Ngási niwe íiwe óogwo nyini aliíza, nali tutegamilile oóndi?’ ”
21 Habuchilo óobwo nyini, Yeézu akaba naachiza abaantu béenzi amalwáala gáabo. Akaba naachíza kaandi abalikwaágalazibwa na amazimu. Akabaha amagala abahume béenzi baabona kuleeba.
22 Niho, Yeézu kubasubiza, “Muzeénde kumumanyisa Yohana byóona éebyo mwaabona, na byóona éebyo mwaahulila. Nkokwo, abahume, nibahweéza, abalema, nibalibata, aba mabeembe, nibachizwa, enziba matwi, nibahulila, abáfwiile, nibazoolwa, na abahabi, nibaheébwa Empola Nzima.b
23 “Ayina omugisa, weéna wéena óogwo atéena kutahwa tahwa hali iinye!”
24 Kábaabeele áabo bábili baalugáho áaho, Yeézu yaabaanza kubagaambila echipípi cha abaantu empola za Yohana, nkokwo, “Mubeele nimuzeénda kuleeba chiíha omuumbúga yo obwoóma?c Akasahuunga akalikuchuúndagulwa chúundagulwa no omuyaga? Mmahi! 25 Náho, mubele muzeenzile kuleeba chiíha? Ngási omuuntu óogwo azwéele ebizwáalo biluunzi? Mmahi! Mumanye, abaantu áabo abazwáala ebizwáalo biluunzi, no obweendeza omubiintu biinzi éebyo béenabyo, áabo baba nibeekala omumazu maháango ge echikáma!
26 “Ngási! Mubele nimuzeénda kuleeba chiíha? Omubáasi? Éego! Niimbagaambila nkokwo, weényini no omubáasi, na noobu kuchila omubáasi. 27 OmuMaandiko Amatakatíifu, niwe óogwo ayayaandikiilwe éebi,
‘Huliiliza, niinsiindikad entumwa yaanze omuméeso gáawe,
Óogwo alaakweébeembelela omukukugololela omuhaanda.’e ”
28 Yeézu yaágaamba kaandi, “Neenye niimbagaambila nkokwo, omubaantu bóona, taliho óogwo ali mukúlu kumusaaga Yohana. Hamo ne éebyo, omubukáma bwa Múungu, óogwo ali muto kusaaga bazeenzíbe niwe óogwo ali mukúlu kumusaaga weényini.”
29 (Áabo baantu bóona, hamo na abahaámbya, obuchilo baahulíle amagaambo áago ga Yeézu, beékiliza nkokwo omuzeenzo gwa Múungu hali boónyini ni muluunzi. Ha kuba abaantu áabo nibo áabo Yohana yaababatíize. 30 Náho Abafalisayo na abeégesa be ebilagilo, boónyini, bakáanga éebyo Múungu yaabeendíize, habwo kuba bakáanga kubatizwa na Yohana.)
31 Yeézu yaágaamba kaandi, “Abaantu bo oluzáalo óolu, iinye mbasusanise na chiíha? Béena ntuungwa chi? 32 Nibasusana na abáana abekeele omwiigulilo, nibeegaambila báti,
‘Habwaáchi twaabatéelela omuléela, náho timukunegula!
Mala twaabazinila enzina ze entíimba,f náho timukuzoolelwa!’
33 “Habwo kuba, obuchilo Yohana Omubatiza yeézile, akaba atakulya emikáate, noobu kunywa eviini. Íimwe nimugaámba nkokwo yaakwásilwe na izimu! 34 Na Omwaana ba Omuuntu obuchilo yeezile, weényini ayinakulya emikaate na okunywa eviini. Óobu íimwe nimugaámba nka nikwo, ‘Leeba! Omutuubi óogu, kaandi no omutamiizi! Na no munywáani wa abahaámbya, na abeena ebiheno!’
35 “Noobu bityo, bóona abeene okweétegeza, nibamanyisa nkokwo okweétegeza óokwo nikugasa.”
Yeézu Naamuganyila Omukazi Owe Ebiheno
36 Omufalisayo oómo, akamwaángisa Yeézu ayize kulya owoómwe. Niho, Yeézu kutáaha omuunzu yo óogwo Mufalisayo, yaaba yeekala kulya ebyookulya.
Bukaba buli obuteéka bwa Abayahudi kwiikala ahaluhélo báti. (7:36)
39 Omufalisayo, obuchilo yaabweene áago, yaáteekuza omumuganyágwe aáti, “Omuuntu óogu, yaakubeele ali omubáasi, yaakumanyile nkokwo, omukazi óogu alikumukólaho, no omuuntu aliho aáta. Yakaámanyile nkokwo, weényini atuula ali omuhéni!”
40 Yeézu yaámugaambila, “Íiwe Simoni, nyine echigaambo niinyeénda kukugaambila.” Nawe yaámusubiza, “Íiwe Mweegesa, ngaambila.”
Niho, Yeézu kugaamba, 41 “Hakaba heena abaantu bábili, áabo bábili bakaba nibatoóngwa empilya na ayaabele aboóhosize. Oómo wáabo, akaba ayohosize edináarih magana atáanu. Muzeenzíwe nawe, akoohoza edináari makúmi atáanu. 42 Áabo bábili, obuchilo baabuzilwe empilya zo kumuliha amabaanza gáabo, óogwo ayaabele aboóhosize yaábaganyila, bataliha. Mbweenu, omuli áabo bábili, no oóha alaayeenda bwooli?”
43 Simoni yaámusubiza, “Niinzila nkokwo, neeba óogwo ayaabele aganyiilwe ibáanza elihaango.” Yeézu yaámugaambila, “Waasubya kuzima.”
44 Áaho, Yeézu yaamweechebuka omukazi óogwo, yaamugaambila Simoni, “Nomuléeba omukazi óogu? Natáaha omuunzu yaawe íiwe, náho tiwanyegeza ha kuúmpa améenzi go kunáaba amagulu gaanze.i Náho weényini, yaayoza amagulu gaanze na amaziga goómwe, no kugasusula ni isóke lyoómwe. 45 No obuchilo nonyaangalucha, tiwaányweegela. Náho weényini, kuluga obuchilo bwóona niintáaha óomu, takalemilwe kunyweégela amagulu gaanze. 46 Tiwaampa isima ha kuunsiiga omutwe gwáanze amazuta. Náho weényini, yaánsiiga amagulu gaanze emizeeze. 47 Habwéecho niinkugaambila, habwo kuba engoonzi zo óogwo mukazi ni nyiinzi, neeyolecha nkokwo ebiheno byoómwe biinzi, byaáganywiilwe. Náho weéna wéena óogwo ayaáganyiilwe ebiheno bíche, óogwo, aba ayina engoonzi nche kwoónka.”
48 Mala, Yeézu yaamugaambila óogwo mukazi, “Waáganyiilwe ebiheno byaawe.”
49 Abazenyi abaandi áabo baabele beekeele hamo náze ahabyookulya, baabaanza kweébuuza, nkokwo, “No oóha óogu, alikuhicha noobu kuganyila ebiheno?”
50 Áaho, Yeézu yaagaambila omukazi óogwo, “Echaákuchuungula no okwiikiliza kwáawe! Ozeénde no obuhóolo.”