11
1 Obuchilo Yeézu káyaamazile kubalagila abaheémba boómwe ikumi na bábili ebilagilo éebyo, yaalugáho áaho, yaazeendelela no oluzeendo lwoómwe lwo kweégesa no kwoólekeelela abaantu omu maboma gáabo.Yeézu Naayikiliza Nka Nikwo Weényini Niwe Masiya
2 Obuchilo óobwo, Yohana Omubatiza akaba abohilwe omwi ibóhelo. Obuchilo akaba ali óomwo, akahuliza áago Masiya akaba naakola. Niho yaasiindika abaheémba boómwe hali weényini, 3 bamubuuze báti, “Ngási, iiwe niwe Masiyaa ogwo aleéza, nali tumutegezeyo oóndi?”
4 Yeézu yaábasubiza aáti, “Muzeénde mumugaambile Yohana góona áago mulikubona no kugahulila. 5 Abahume nibabona kuhweeza, enziíngami nizibona kulibata, ababeembe nibabona kuchila, enziba matwi nibabona kuhulila, abáfwiile nibazoolwa na abahabi niboolekeelelwa Empola Nzima ya Múungu.b 6 Ayina omugisa, weéna wéena óogwo atéena kutahwa tahwa hali iinye!”
7 Áabo abaheémba ba Yohana kabaabele baálugileho, Yeézu yeemucha kusiingiza embága ya abaantu empola za Yohana. Yaábabúuza aáti, “Obuchilo mwaaziile omu iluungu kumuleeba Yohana, ngási, mukazeenda kuleeba chiíha? Ngási, mukazeenda kuleeba omuuntu ogwo alikwiikiliza amagaambo góona nko olusekeyaanda óolwo oluchuundagulwa no omuyaga? Mmahi. 8 Mbweenu, mukazeenda kuleeba chiíha? Ngási, mukazeenda kuleeba omuuntu ogwo azwéele ebizwáalo byo obukaani? Mmahi. Abaantu áabo abazwaala ebizwáalo byo obukaani, nibatuúla omu maka ge echikáma. 9 Mbweenu, mukazeenda kuleeba chiíha? Ngási, mukazeenda kuleeba omubáasi? Éego nyini no omubáasi, náho nniimbagaambila nka nikwo, Yohana ni mukúlu kusaagáho omubáasi. 10 Óogwo niwe alikusoomboolwa omu Maandiko Matakatíifu nka nikwo,
‘Huliiliza, nniinsiindika entumwa yaanze omuméeso gaawe,
Óogwo alakweebeembelela omukukugololelela omuháanda.’c
11 “Mazima nniimbagaambila nka nikwo, omubaantu bóona áabo abazeelwe na abakázi, takabahoga omuuntu weéna wéena ali mukúlu kusaaga Yohana Omubatiza. Nóobu bityo, omuuntu atéena mugaso omubukáma bwo omu igulu, niwe mukúlu kumusaaga Yohana. 12 Kulugiilila omu buchilo bwa Yohana Omubatiza kuhicha leélo éezi, obukáma bwo omu igulu buzaazaanwa lwa amagala na abaantu,d na abaantu enduluhe babunyagilila no kubwaaya lwa amagala. 13 Ababáasi bóona hamo na Musa omubilagilo byoomwe bakasohoza obubáasi habwo obukama óobu kuhika obuchilo bwa Yohana. 14 Mbweenu kabilaaba nimwiikiliza obubáasi bwaabo, Yohana niwe Eliya, óogwo ayaagaambílwe nka nikwo, alyéeza.e 15 Oogwo ayina amatwi, na ahulile!
16 “Ngási, abaantu bo oluzáalo óolu mbasusanise na chiíha? Nibasusana na abaana áabo abatuunkumeele ahi igulizo nibeéta bazeenzi báabo nka nikwo, 17 ‘Tukabateelela emileela, náho kubona nimunegula mahi! Mala twaabazinila enzina ze entíimba, náho timukuzoolelwa!’ 18 Bityo nyini obuchilo Yohana akeeza. Akaba atalya nali kunywa evíini, na abaantu baágaamba nka nikwo, ‘Óogu ayina izimu!’ 19 Mbweenu, óobu íinye Mutábani wo Omuuntu nyizile, niíndya ebyookulya na niínywa evíini, na abaantu baágaamba nka nikwo, ‘Léeba! Óogu no owomuhaanka na kaandi no omutamiizi, male ni munywáani wa abahaámbya na abakola ebiheno abáandi!’ Náho nóobu bityo, amasala ga Múungu gamanyisibwa kuba ga mazima habwo muháanda gwe ebikolwa bya abaantu boómwe.”
Yeézu Nakaama Abaantu Omu Maboma Áago Balikumwaanga
20 Niho Yeézu yaabaanza kukaama amaboma áago akakolelamo amahano meenzi, habwo kuba abaantu baamo tibalatamilwe no kulekela ebiheno byáabo. Yaabazila nka nikwo, 21 “No ilóoko íiwe Korazíini! Na íimwe Betisaida! Kabilaaba amahano áago nkakola hali íimwe, naakugakozile omu byaalo bya Tíilo na Sidóoni, mazima abaantu ba ebyaalo éebyo baakuba baátamilwe ebiheno byáabo. Bakayolekile bátyo habwo kuzwaala amagunila no kweésiiga iízu. 22 Náho, nniimbagaambila nka nikwo, omu chilo cho omuchwaáziiko, Múungu nachwaaziika íimwe bwooli kuchila óokwo alachwaaziika abaantu ba Tíilo na Sidóoni.f 23 Neewe Kaperinaumu, nooteekuza nka nikwo olyaásutuka kuhika omu igulu? Mmahi! Olyaágolomolwa ohike omulyoongoola lya kuzimu yo olufu. Gaakuba amahano áago gakoliilwe iiwe nigakolelwaángu omu chaalo cha Sodoma,g éecho chaalo chaakabeeleho kuhicha leélo. 24 Náho nniimbagaambila nka nikwo, aha chilo cho omuchwaáziiko, Múungu nachwaaziika íimwe bwooli kuchila abaantu be eensi ya Sodoma.”
Yeézu Niwe Ahaantu Ho Kuhuúmula
25 Obuchilo óobwo Yeézu yaágaamba aáti, “Íiwe Táata, Mukáma wi igulu ne éensi, nniinkusiima habwo kuba amagaambo áago okaseleka abaantu abeena amasala na abamanyi, okagata aha bweélu aha baantu áabo abeena okwiikiliza nka abayaánda abato. 26 Nikwo Isiinye, oótyo nikwo óokwo wayeenzile.”
27 Niho Yeézu yaábagaambila abaantu aáti, “Táata ampeele byóona. Tihaliho omuuntu ogwo alikumusoombookelwa Mutábani wa Múungu nka nikwo aáli, náho Táata weénka. Kaandi, taliho muuntu ogwo alikumusoombookelwa Táata nka nikwo aáli, náho Omutábani weénka, na buli omuuntu ogwo Omutábani woómwe alaayeénda kumumanyisa.
28 “Mwiíze hali íinye bóona áabo mwaálemilwe no kulemeelelwa ne emigugu, ne íinye nniimbahuumuza. 29 Íinye no omuteékaani, kaandi omuchuléezi. Habwéecho, mweékome itwaale lyaanze, mweéyege kuluga hali íinye, niho ndaababonesa kuba no obuhóolo omu miganya yaanyu. 30 Itwaale lyaanze nilyooloba no omugugu gwaanze ni guhuhuúka.”