Yeézu Naabatuma Abaheémba Abaandi Makumi Musaanzu
10
1 Kagahwéele áago, Omukáma Yeézu yaatóoza abaheémba abaandi makumi musaanzu.a Yaábatuma bábili bábili, bamweébeembelele buli muzihwa na buli hóona, áaho yaabeele alamwíile weényini kuhika. 2 Yeézu yaábagaambila, “Ebyookugéswa ni biinzi, náho abagesi ni báche. Habwéecho, mumusabe kaanyina omusili, atume abagesi abaandi omumusilígwe. 3 Mwiilóoko, muzeénde íimwe. Náho, mumanye nka nikwo niimbatúma nka abaana be entaama éezo ezilikulibata hagati ye emisege! 4 Mutaákutwáala enfulebe ye empilya, nali ensáho, nali enkéeto. Mala kaandi mutaángalucha omuuntu weéna wéena omumuhaanda.b5 “No obuchilo mulaataahámo omuunzu, mwaangaluche abaantu bo óomwo, múti, ‘Íimwe, mube no obuhóolo.’ 6 Na kahalaaba heena omuuntu wo obuhóolo óomwo, obuhóolo óobwo muláaba mwiinabwo, nibusigala nawe. Náho, kihalaaba hatéena omuuntu wo obuhóolo omuunzu óomwo, obuhóolo bwéenyu nibubasubila. 7 Mutaákuba nimuzeénda kulyáama omuunzu eziindi zíindi. Náho, mwiikale omuunzu éezo mwaazamo, nimulya ebyookulya éebyo balikubaha. Habwo kuba omukozi naayeendelwa kuhaabwa empeéla yoómwe.
8 “Obuchilo mulaataahámo omumuzihwa bunaanka, na abatúuzi nibabanyégeza, mulye ebyookulya éebyo baláaba nibabaha. 9 Na abalwéele abali omumitúulo éezo, mubachíze. Mubagaambile abatúuzi nkokwo, obukáma bwa Múungu bwaábeliliile.
10 “Náho, obuchilo mulaataahámo omumuzihwa bunaanka, na abatúuzi tibakubanyégeza íimwe, mulabile omumihaanda, nimugaámba, 11 ‘Noobu enkuungu yo omuzihwa gwéenyu éezo elamasile ahamagulu géetu, nituzikuunkúmulaho, neéba emanyiso ye ebiheno byéenyu. Hamo ne éebyo, mumanye mazima nkokwo, obukáma bwa Múungu bwaábeliliile!’ 12 Niimbagaambila nkokwo, echilo éecho Múungu alichwaaziika abaantu be éensi, alyaábachwaáziika kúbi bwooli abaantu bo omuzihwa óogwo kuchila nka nikwo yaachwaazikiile abaantu babi ba Sodoma!”
Yeézu Naabahána Abaantu Bo Omumizihwa Záabo Abayaangile Kuleka Ebiheno Byáabo
13 “Mulamanya íimwe, abaantu ba Korazíini! Mulamanya íimwe, abaantu ba Betisaida! Habwo kuba, ebyookusobeza éebyo naakozile omuméeso géenyu, kanaakubikozile omubyaalo bya Tíilo na Sidóoni,c abaantu be emizihwa éezo bakaáhuungamile ebiheno byáabo bwaangu. Baakayolekile kuhuúngama kwáabo omukuzwáala ebizwáalo bya amagunila, no kubyáama omwiízu. 14 Habwéecho, echilo éecho Múungu alichwaaziika abaantu, alyaábachwaáziikila neemwe kúbi bwooli kuchila nkokwo alaachwaáziikila abaantu ababi aba Tíilo na Sidóoni!
15 “Ne éemwe, abaantu ba Kaperinaumu, mutaákuteekuza nka nikwo nimukuzibwa kuhika omwiigulu? Mmahi, tímukukolelwa mútyo! Náho mulyaátúuchwa ahi iífo bwooli omukuzimu!”
16 Male, Yeézu yaábagaambila abaheémba boómwe, “Omuuntu óogwo alaabahuliiliza íimwe, naába yaánhuliiliza iinye. No omuuntu óogwo alaabáanga íimwe, naába yaányaangile iinye. No óogwo alikunyáanga, aha kukola aátyo, naába yaámwaangile óogwo ayaantúmile.”
Abaheémba Baasuba Nibanulilwa Hali Yeézu
17 Kahaabaliile, abaheémba áabo makumi musáanzud baasuba, nibanulilwa. Baámugaambila, “Íiwe Mukáma wéetu, nóobu amazimu, obuchilo nitugabiínga ahi izíina lyáawe, nigatutiína!”
18 Yeézu yaábasubiza, “Naába naálibona Izimu Elikúlue nilituúka nko olulábyo kuluga omwiigulu. 19 Léeba mumanye nka nikwo, naábahéele obuzizi bwo kusíinga amagala góona go óogwo omubisa. Ha buhicha óobwo, nimulibatila nóobu enzóka na kamiína, na tihaliho echiintu choóna chóona éecho chilaabahutáaza.
20 “Noobu bityo, mutaákunulilwa, nkokwo amazimu nigabatiina. Náho, munulilwe echigaambo éechi, nka nikwo amazíina géenyu gaáyaandikilwe omwiigulu.”
Amanulilwa Ga Yeézu
21 Obuchilo óobwo, Yeézu akasemelelwa bwooli Omumwooyo Mutakatíifu, yaágaamba, “Íiwe Táata, niinkusiima, íiwe Mukáma wi igulu ne éensi! Habwo kuba, ebigaambo éebi, waábaseleka abamasala na abamanyi, waábafuúndulila abaantu ba ahi iífo. Éego Táata, habwo kuba nikwo byaakuseméeleliile.” 22 Male yaábagaambila, “Isíinye, yaámazile kuúnhikiilíza byóona. Na taliho óogwo alikumumanya Omwaana, choónka Isíinye weénka. Na taliho weéna wéena óogwo alikumumanya Táata, choónka Omwaana, na weéna wéena óogwo Omwaana alaalamula kumufuúndulila.”
23 Ahonyini, Yeézu yaábaleeba abaheémba boómwe, yaábagaambila boónyini boónka, “Mwiine omugisa íimwe, habwo kuba nimuleeba ebigaambo éebyo na améeso géenyu! 24 Niimbagaambila, hakaba heena ababáasi béenzi, na abakáma béenzi, áabo bakaba nibabyeefúuza kuleeba éebyo bi mulikuléeba, náho tibalabibweene. Kaandi, éebyo bi mulikuhulila íimwe, bakaba nibabyeefúuza kubihulila, náho tibalabihulíile.”
Omugani Gwo Omusamalia Owe Echiganyizi Ahamuyahudi
25 Echilo chimo, omweégesa oómo we ebilagilo akeémeelela, yaámubuuza Yeézu ibúuzo kumuleengesa, yaámugaambila, “Íiwe Mweégesa, nkole chiíha, mbone kubona obulami bwo obucha no obuchiile ahaliíza?”
26 Yeézu yaámusubiza, “Omubilagilo haandikilwemo chiíha? Noobimanyaho oóta?” 27 Yaámusubiza, “Byaandikilwe biti, ‘Omweende Omukáma, Múungu wáawe, ahamuganya gwaawe gwóona, ahamwooyo gwaawe gwóona, ahamagala gáawe góona, na ahabweenze bwaawe bwóona.’f Mala ‘oyeénde mutúuzi wáawe, nkokwo olikweéyeenda íiwe hanu.’g” 28 Yeézu yaámugaambila, “Waasubya kuzima! Kola oótyo, néewe noobona obulami.”
29 Náho, omweégesa óogwo we ebilagilo, akaba naayeénda kwoóleka nkokwo ayikilizíibwe omuméeso ga Múungu, niyo ensoonga yaámubuuza Yeézu, “No omutúuzi waanze, noóha?”
30 Yeézu yaámusubiza aáti, “Hakaba heena omuuntu oómo, ayaabele naagolomoka kuluga Yeruzaléemu, akaba naalibata kuzeenda omu chaalo cha Yeliko. No omumuháanda óomwo, yaagwa omuungalo za abanyagiilizi. Bóona baámugulukila, baámutéela bwooli, baamuzúula ebizwáalo, baamusiga ali héehi no okufwa.
31 “Ahiibaando lizima, omumuhaanda óogwo, hakéeza omugabe oómo wa Múungu. Náho omugabe óogwo, obuchilo yaamubwéene omuuntu óogwo, yaalaba ahaampelo yo omuhaanda. 32 Omuláawih nawe, yaahika áaho, na akazeendele kaaba kátyo nyini. Obuchilo yaamubwéene omuuntu óogwo, yaalaba ahaampelo yo omuhaanda.
33 “Ahakaanya yéeza Omusamaliai oómo, óogwo ayaabele ali omuluzeendo lwoómwe. Obuchilo yaamubwéene omuuntu óogwo, yaamuganyila. 34 Yaamuzaho, yaamuséemba obuhuta bwoómwe ha kubuteélaho eviini na amazuta, yaabukoma. Male yaamuhanamika halugulu ye ensikili yoómwe, yaámutwaala omuunzu ya abazenyi, yaaba naamulwaáza.
35 “Nyeéncha yaáho, yaásohoza omuunsaho edináari ibili,j yaámuha owe éenzu ya abazenyi. Yaámugaambila, ‘Omulwáaze omuuntu óogu. Na kazilaayeendelwáho empilya ezíindi ha bwoómwe, obuchilo ndahiíngula áaha, niinkuliha.’ ”
36 Niho, Yeézu yaámubuuza omweégesa óogwo we ebilagilo, “Habwéecho! Ha kuleeba kwáawe, akaba alyoóha omubaantu áabo básatu, ayaabele ali mutúuzí wo óogwo ayaatabaaliilwe na abanyagiilizi ha kumukolela ebizima?” 37 Yaámusubiza, “Óogwo ayamuziliile echiganyizi.”
Yeézu yaámugaambila, “Zeénda, oóbe na akazeendele kátyo nyini!”
Yeézu Omuunzu Ya Marta Na Mariamu
38 Yeézu na abaheémba boómwe, obuchilo bali omumuháanda, bataaha omumutúulo gúmo. No omukazi oómo, izíina lyoómwe Marta, yaabanyegeza omúka yoómwe. 39 Óogwo Marta, akaba ayina muhala wáabo, iziinálye Mariamu. Obuchilo óobwo, Mariamu akaba ayikeele héehi na amagulu go Omukáma, naamuhuliilíza.
40 Náho Marta, akaba naayagalala ni ikola liinzi. Niyo ensoonga yaamwiililila héehi Yeézu, yaámugaambila, “Íiwe Mukáma wéetu, sii, tokusáaswa nkokwo mukúlu waanze yaandekela emilimo zóona? Habwéecho, omugaambile ampwéele!”