Ameégeso Habwo Kuchwaáziika Abáandi
(Mariko 4:24; Luka 6:37-38, 41-42)
7
1 “Mutaákuchwaáziika abáandi, náwe Múungu ataákwiiza akabachwaáziika neemwe. 2 Nkóokwo mulikuchwaáziika abáandi, nikwo kutyo nyini óokwo Múungu alibachwáaziikaho neemwe. Na habwe echigaambo cho kweéchwaáziika, endeengo éezo mulikubaleengelaho abáandi, niyo éezo nyini Múungu náwe alibaleengelamo neemwe.3 “Habwaáchi nooleeba akatokoozi áako kali omu liíso lya mweene waanyu, náho okabula kubona embago éezo eli omu líiso lyáawe? 4 Nali noohichaho oóta kumugaambila mweene waanyu nka nikwo, ‘Nkuundila nkwiíhilemo akatokoozi omu líiso lyáawe,’ obuchilo iiwe nyini oyine embago etuula omu líiso lyáawe? 5 Ngóbya we! Otaandike kwiihamo embago yóona éezo etuula omu líiso lyáawe iiwe nyini. Niho obóne kuleeba kuzima kwiihamo akatokoozi akali omu líiso lya mudugu waawe.
6 “Mutaliziha éembwa ebiintu ebitakatíifu bya Múungu, habwo kuba zilaáhindukila zibalaansamule ebinogoka nogoka. Kaandi, mutalizinagila empunu ebiintu byo obukáani, habwo kuba zilyaábizuungagilila.
Ameégeso Habwa Kumuneémbelela Múungu
7 “Mumusabe Múungu, náwe naabaha éecho mulikumusaba. Mutaábuuze, mulyaábigwaaho. Muchiinguze, mulyaáchiingulilwa. 8 Omuuntu weéna wéena ogwo asaba, aheébwa. Na weéna wéena ogwo ataábuuza, abigwaaho, na weéna wéena ogwo achiinguza, achiingulilwa.
9 “Ngási, ahali íimwe heena omuuntu weéna wéena, kaálikusabwa omukáate no omutábani woómwe, naamuha ikulugusi? 10 Nali kaálikuseegwa eénfwi, naamuha enzóka? 11 Íimwe si báambo, nóobwo muli abazilwa, nimusoomboókelwa kubaha abaana beenyu egabo ezigasize. Mbweenu, Isiímwe ogwo ali omu igulu naalemwa chi kubaha ebiintu ebizima bóona áabo abalikumusaba?
12 “Mbweenu íimwe, choóna chóona éecho mweenda kuzilililwa na abaantu abáandi, neemwe mube nicho echo mubazilile mútyo nyini. Éezo niyo ensoonga ye ebilagilo bya Musa na ameégeso ga ababáasi.”
Kutaaha Omu Bukáma Bwa Múungu
13 “Otaahemo ha kulabila aha muháanda gwe echisasi chi ileembo elifuunzile. Kuba ileembo no omuháanda ogutwaala omu kusiingaálichwa guba ne echisasi chi ileembo ligazi kaandi liháango, mala na abalilabamo ni béenzi. 14 Náho omuháanda gwi ileembo éelyo elilikweebeembeza kuza omu bulami liba lifuunzile. Nabo abaantu áabo abalikulikugula, ni bache.”
Kubasoombookelwa Ababáasi Be Ebisuba
15 “Mweécheenge na ababáasi be ebisuba. Mazima áabo na abaantu abalikubeezaho, nibeekola kuba abafula nke entaama, náho omumyooyo yáabo bali emisega ye enduluhe. 16 Nimuhicha kubasoombookelwa habwa amagoomba gáabo. Abaantu tibakugesa emisumo ye emizabibu nali emikuyu kuluga omu miti ya amáhwa. 17 Omuti muluunzi guzaala amagoomba mazima, náho omuti mubi guzaala amagoomba mábi. 18 Omuti muluunzi tigukuhicha kulabya amagoomba mábi, no omuti mubi tigukuhicha kulabya amagoomba amazima. 19 Buli muti óogwo ogutakulabya amagoomba amazima, gunogolwa no kunagwa omu mulilo. 20 Bityo nyini na ababáasi be ebisuba, mubasoombookelwa habwa amagoomba gáabo.”
Abaheémba Ba Mazima Na Be Ebisuba
21 “Ti buli muuntu ogwo annyetoongelezaho nka nikwo, ‘Íiwe Mukáma, íiwe Mukáma,’ iíngu niwe alitaaha omubukáma bwo omu igulu. Náho no óogwo muuntu ogwo akola engoonzi za Táata ogwo ali omu igulu, óogwo niwe alibutaahamo. 22 Echilo cho omuchwaáziiko nichiíza, na abaantu béenzi balaángaambila báti, ‘Íiwe Mukáma, íiwe Mukáma! Nooyizuka nka nikwo tukasohoza obubáasi habwi izíina lyáawe? Na nka nikwo tukabiinga amazimu habwi izíina lyáawe? Na nka nikwo tukakola amahano meenzi habwi izíina lyáawe?’ 23 Áaho ndaábagaambila butúnu nka nikwo, ‘Tiínkubamanya íimwe nakáti! Muundugého áaha, íimwe enkola bíbi!’ ”
Omugani Gwa Aboómbeki Bábili
24 “Mbweenu, omuuntu ogwo ahulila ameégeso gaanze no kugahicha, alyaásusaniswa kuba nko omuuntu owa amasala ogwo ayaayoombekile éenzu yoómwe aha luchili. 25 Chilo chimo, enzula ekagwa, ameenzi ge emizela gaákonoka, no omuyaga muháango gwéeha no kusutula éenzu yoómwe. Náho éenzu éezo telagwiile, habwo kuba oluhazo lwaáyo lukaba lwóombekilwe ahalugulu yo oluchili. 26 Náho omuuntu ogwo ahulila ameégeso gaanze na tagahicha, óogwo alyaásusaniswa nko omuuntu omusilu ogwo ayaayoombekile éenzu yoómwe aha musényi. 27 Obuchilo enzula ekagwa, ameenzi ge emizela gukakonoka, no emiyaga muháango gukeeha no kusutula éezo éenzu yoómwe. Áaho éenzu éezo ekabutama, emigweele yaáyo ekachilaho.”