Ameégeso Habwo Kuhweela Abahabi
6
1 “Mulamanya! Ebikolwa byaanyu ebizima mutabizilila omuméeso ga abaantu ka babileeba. Kuba kamulaaba nimukola mútyo, timukwiinaánkula ensiimi yoóna yóona kuluga hali Isiímwe ogwo ali omu igulu.2 “Mbweenu, obuchilo noosuumbuusa abaambazi, leka kweélaangana ookwo olikukola aha kuteéla echikuli. Abagóbya bakola bátyo omu masomelo no omu nsese babone kusiingiizwa na abaantu. Mazima nniimbagaambila nka nikwo, baamazile kwiinaankula ensiimi yáabo yóona. 3 Náho iiwe obuchilo nosuumbuusa aha ngoonzi, engalo yaawe yo obumoso etamanyisibwa áago engalo yo obulyo yasohoza, 4 esuumbuuso yaawe ezeénde omu chihwe. Iiso weényini amanya ebye echihwe, alyaákugalulila.”
Ameégeso Habwo Kumusaba Múungu
5 “No obuchilo nimusaba Múungu, mutaákuba nke engóbya. Áabo beenda kusaba kunu beémeeliile omu masomelo no omuumbazu ze nsese aángu babone kuleebwa na abaantu. Mazima nniimbagaambila nka nikwo, baamazile kwiinaankula ensiimi yáabo yóona. 6 Náho iiwe obuchilo noosaba, otaahemo omu chiseenge chaawe male oteyo olwiizi. Niho osabe Iíso óogwo ali omuchihwe. Náwe Iíso ogwo abona ebili áaho abaantu batakuhweeza, alyaákugalulila.
7 “Obuchilo nimusaba, mutaákuba nimutuúmilila ebigaambo nka nikwo bakola abaantu áabo abali abapagani. Áabo nibateekuza nka nikwo nibahulilwa habwo kukanyisa amagaambo gáabo. 8 Mutaákuba nimusaba nka nikwo basabaho áabo, habwo kuba Isiímwe naasoombookelwa éecho mulikweenda, nóobu muba mutakachisabile. 9 Ha bwéecho, íimwe mubega nimuleembeleza Múungu nko kuzila muti,
‘Isiichwe ogwo ali omu igulu,
izíina lyáawe likuzibwe.
10 Obukáma bwaawe bwiíze.
Okweenda kwáawe kuhikiílizwe,
omuunsi nkokwo omu igulu.
11 Otuhe leélo ebyookulya byéetu bya buli chilo.
12 Otuganyile ebiheno byéetu,
nkokwo neechwe tuganyila abalikutuhénela.
13 Otatutwaala omu kuleengesibwa,
náho otuchuúngule no óogwo Omuzilwa.
[Habwo kuba, obukáma, obuzizi ni ikuzo byóona ne ebyaáwe, kuhicha obucha no obuchiile.
Amina!]’ ”
14 Yeézu yaazeendelela kugaamba aáti, “Kamulaaba nimubaganyila abaantu ebiheno byáabo, Isiímwe ogwo ali omu igulu náwe alyaábaganyila íimwe ebiheno byéenyu. 15 Náho kamulaaba mutakubaganyila abaantu ebiheno byáabo, Isiímwe ogwo ali omu igulu náwe takubaganyila neemwe ebiheno byaanyu.”
Ameégeso Habwe Echisiibo
16 “Kaandi obuchilo musiibile, mwaáleka kweézila nka abagóbya bonyini bazeenda baahinyile obuso, iingu abaantu babamanye ka basiíbile. Amazima nniimbagaambila nka nikwo, áabo baamazile kwiinaankula ensiimi yáabo yóona. 17 Náho iiwe óobu wasíiba, síiga amazuta omutwe gwaawe, náaba omu buso bwaawe, 18 otamanywa na abaantu nka nikwo oli omu chisiibo, náho omanywe na Iíso weénka ogwo ali omuchihwe. Weényini abibona ebyo omuchihwe, náwe naába endihi yaawe.
Ameégeso Habwo Obuhite
19 “Mulekega kweébiikila ensabo omuunsi éezi, habwo kuba áaho na ahaantu áaho nizisiiswa ne embuungu no kucheleba, na abeebi bahasiisa babone kuzíiba. 20 Náho baambo mweébiikile ensabo zaanyu omu igulu habwo kuba áaho tekusiiswa na embuungu no kucheleba na abeebi tibakuhasiisagula babone kwíiba. 21 Hoóna hóona ensabo yaawe áaho ebiikilwe, niho no omuganya gwaawe gulaaba guli áaho nyini.
22 “Olumuli lwo omubili gwaawe liba eliiso. Eliiso lyaawe kaliba nilihweéza ze, omubili gwaawe gwóona gwiikala omu mwaanga. 23 Náho eliiso lyaawe kalilaaba lifwiile, no omubili gwaawe gwóona nigwiikala omu nsiimbaazi. Mbweenu, kabilaaba omwaanga óogwo oguli omu mubili gwaawe guli ensiimbaazi, ngási ensiimbaazi éezo tekuba mpaango bwooli?
24 “Táliho omuhálila ogwo yaakuhicha kugomookela abakáma bábili. Kuba, yaakaátamwa omukáma oómo no kweenda oóndi, nali yaakakuunda ago omukama oóli, na ayaanga ago omukama óogu. Bityo neemwe, timwaákuhicha kugomookela Múungu hamo na amabonwa!”
Ameégeso Habwo Okutahwa Tahwa
25 “Mbweenu nniimbagaambila nka nikwo, mutaákuba no kutahwa tahwa habwo obulami bwéenyu nka nikwo nimulya chí, nali nimunywa chí, nali nimuzwaala chí. Ngási, nimweebwa nka nikwo obulami nibuchila ebyookulya, no omubili guchila emyéenda? 26 Muleebe enyonyi. Tizikubiba, tizikugesa nali kuhunika ebyookulya omu bitala. Nóobu bityo, Isíimwe ogwo ali omu igulu, aziliísa. Mbweenu íimwe, timwiina obukáani buháango kuchila enyonyi éezo? 27 Noóha omuli íimwe ogwo ayina obugoga bwo kwiiyoongela obula bwo obulami bwoómwe aha cheemo cho obuleehi bwe echilo chimo omu kwiíyagalaza kwoómwe?
28 “Habwaáchi muli kutahwa tahwa habwe ebizwáalo? Muteekuze óokwo enyaso zo omu nkaamba emikulile yaázo. Tizikukola emilimo nali kwóogosa ebizwáalo. 29 Náho nniimbagaambila nka nikwo, nóolu omukáma Selemani omu ikuzo lye lyóona, talazweekilwe kuluunzi nka límo lye enyaso éezo! 30 Mbweenu, kaálaaba Múungu naazwéeka aátyo enyaso yo omu nkaamba éezo eliho leélo na nyeéncha neeyochwa, mazima, Múungu takubazwéeka bwooli íimwe abaantu bo okwiikiliza kuche?
31 “Ha bwéecho, muleke nu kusiiba nimweetwaalalika nimuzila muti, ‘Tulaálya chi?’ nali ‘Tulaánywa chi?’ nali ‘Tulaázwaala chi?’ 32 Amagaambo áago góona, abaantu áabo abetwaalalika nago na abatakumumanya Múungu. Isiímwe ogwo ali omu igulu naasoombookelwa kuluunzi nka nikwo mulikweenda áago góona. 33 Óobu íimwe, echa mbele mumugomokele Múungu aábe niwe Omukama weenyu, no kukola amazima áago ayeénda.a Áaho niho alyaáboongelela agáandi áago góona. 34 Mbweenu, mutaákuba no kweétwaalalika ebilaagwa nyeéncha, habwo kuba echilo cha nyeéncha chiina ebyaacho. Buli chilo chíina olwaágalalo lwaácho oluhikile.”