Muleke Ebiheno Mutaákusiingaalika
13
1 Obuchilo óobwo, abaantu bakéeza baámugaambila Yeézu empola za Abagaliláaya abaandi áabo nkokwo Pilato akazitúlaaniza enságama yáabo neéye ebitáambo byáabo.2 Yeézu yaábagaambila, “Ngási, nimuteekuza nkokwo Abagaliláaya áabo bakáfwa batyo, habwo kuba bakaba bali abaheni kuchila Abagaliláaya abaandi bóona? 3 Niimbagaambila iínti, tí bityo! Kamulaaba mutahuungamile ebiheno, bityo nyini néemwe nimusiingaálika mwéena! 4 Nali, áabo baantu bóona ikumi na munáana áabo abaagweeliilwe no omunara mula bwooli óokwo Siloamu bakáfa, ngási, nimuteekuza nkokwo áabo nibo bakaba bali abahéni kuchila abatúuzi abaandi bóona ba Yeruzaléemu? 5 Niimbagaambila iínti, tí bityo! Kamulaaba mutahuungamile ebiheno, bityo nyini néemwe nimusiingaálika mwéena!”
Omugani Gwo Muti Óogwo Gutakusohoza Emisumo
6 Áaho, Yeézu yaabachweela omugani abaantu áabo, ha kubagaambila, “Hakaba heena omuuntu oómo óogwo akaba ayina omuti gwo omutíini oguhaambiilwe omumusili gwoómwe gwe emizabibu. Káyaabalíile, yéeza kusoloma emisumo kuluga omumutiini, náho talabonesize. 7 Mbweenu, yaámugaambila omuhalila woómwe wo omumusili, ‘Léeba! Mba niinyiza kuloondela emisumo omuli óogu muti óogu gwo omutíini, aha mwaanya gwe emyáaka isatu. Náho tiínkabonesagamo choóna chóona! Mbweenu gunogóle, gutaákuzeendelela kukula omwiitaka busa!’
8 “Náho, óogwo muhalila yaámusubiza, ‘Mukáma, guléke omwaaka óogu, mbone kugulimila no kuguteélaho obunula. 9 Kagulazáala emisumo omwaaka oguleéza, ni kuzima! Náho kagulaaleka kuzáala, mbweenu ogunogole.’ ”
Yeézu Naachiza Omukazi Echilo Cha Sabato
10 Echilo chimo cha Sabato,a Yeézu akaba ali omuunzu eémo yo omukobo, naayegesa abaantu. 11 Óomwo, hakaba heenamo omukazi oómo, óogwo akaba akwaasilwe ni izimu aha myaaka ikumi na munáana. Izimu likaba lyaámuhínyile omugoongo, na talahikize kweémeelela bweémi.
12 Obuchilo Yeézu yaamubwéene, akamwéeta ayize hali weényini, yaámugaambila, “Máaha, obu! Oóbe no obuhóolo, waachila obulwéele bwaawe.” 13 Yeézu yaamutéelaho engalo, ahonyini yaáyemeelela bweémi, yaaba naamukuza Múungu.
14 Habwo kuba echilo éecho Yeézu akachiza omuuntu chikaba chili echilo cha Sabato, mukúlu we éenzu yo omukobo akasaaya. Yaábagaambila abaantu, “Omubuli bwoyo, ebilo ebihikiiliilwe byo kukola emilimo nibyo mukáaga. Mbweenu! Mwiíze muchízwe omubilo éebyo, náho mutaákwiiza kuchizwa echilo cha Sabato!”
15 Ahonyini Omukáma yaámusubiza, “Íimwe engóbya! Íimwe mwéena nimukola emilimo echilo cha Sabato! Ngási buli oómo wéenyu, tasibula ente yoómwe nali ensikili yoómwe kuluga omuchibuga, azitwáale kunywa améenzi, nóobu chili echilo cha Sabato? 16 Leeba óogu mukazi, wo olugaanda lwa Ibrahímu, yaámazile emyáaka ikumi na munáana abohilwe ni Izimu Elikúlu.b Mbweenu Sii! Óogwo nawe, amazima abele atali lwaampaka akomoololwe omuchilo cha Sabato?”
17 Obuchilo Yeézu yaagaambile áago, abagomec boómwe bóona, ahonyini baakolwa ensoni. Náho abaandi bóona, bakanulilwa bwooli habwe ebigaambo bizima bya amahano áago Yeézu akaba naakola.
Omugani Gwe Embíbo Eénche No Omugani Gwi Ituumbyo
(Matayo 13:31-33; Mariko 4:30-32)
18 Kaandi Yeézu yaábúuza, “Obukáma bwa Múungud nibususana na chiíha? Mbwiinganise na chiíha? 19 Nibususana ne embíbo eénche bwooli,e éezo omuuntu akahaamba omumusili gwoómwe. Embíbo yaámela, yaaba omuti, zéeza enyonyi zaayoombeka ebyaali byaázo omuli áago matabazi gaágwo.”
20 Yeézu yaábúuza kaandi, “Mbususanise obukáma bwa Múungu na chiíha? 21 Nibususana ni ituumbyo éelyo yaatwéele omukazi, akalitulaaniza ne ebitukulu bisatu bye ensaano, mpaka lyaatuumbisa obusaano óobwo bwóona.”
Omulyaango Ogweémigisiliize
22 Yeézu akaba alyoomuluzeendo kuzeenda Yeruzaléemu. Omumuhaanda áaho akalabila, akaba naayegesa abaantu bo omumitúulo emiche ne emihaango. 23 Echilo chimo, omuuntu akamubúuza, “Mukáma, abaantu áabo balichuúngulwa, balyáaba báche kwoónka?”
Yeézu yaágaamba, 24 “Mweéyomeleze mwéena kuzamo aha kulabila omulyaango ogufuunzile. Niimbagaambila nkokwo, béenzi balyaáleengesa kuzamo, náho balyaálemwa. 25 Obuchilo owe éenzu yaáchiingile olwíizi, mulyaayemeelela ahéelu, mulyaabaanza kubachiínguza na ha kumusaba, ‘Omukáma, otuchiíngulile!’ Náho naabasubiza, ‘Tiínkubamanya! Tiínkumanya mwaaluga nkáhi!’
26 “Neemwe mulaámugaambila, ‘Ngási tukalya no okunywa hamo neewe! No omumitúulo yéetu, niho okatweélekeelela!’ 27 Náho naabagaambila, ‘Naábagaambiile, tiínkubamanya na tiínkumanya mwaaluga nkáhi! Mulugého áaha, íimwe abapagasi abaheni!’
28 “Niho mlaachula no kuteélana améeno, habwo kuba, nimumubona Ibrahímu, Izáaka, na Yakobo, na ababáasi bóona bali omubukáma bwa Múungu, náho íimwe mulaaba mwaánagilwe ahéelu! 29 Abaantu nibeéza kuluga obutuluka no obugwa, kuluga chiziba cha ntumwa na nyakaziinzakazi, balaalya ebyookulya omubukáma bwa Múungu.
30 “Mhuliilize! Abaantu áabo omuheleeluko óobu, balyáaba abaámbele, na abaámbele óobu, balyáaba áabo omuheleeluko.”
Yeézu Naazululukwa Habwa Yeruzaléemu
31 Obuchilo óobwo nyini, Abafalisayo bunaanka bakamuzáho Yeézu baámugaambila, “Lugáho áaha, ozeénde ahaantu ahaandi, habwo kuba Herode naayeénda kukwíita.”
32 Yeézu yaábasubiza, “Muzeénde muzigaambile nyamuhaábwaf éezo, ‘Léeba! Leélo na nyeéncha, niimbiínga amazimu kubalugaho abaantu, no kubachiza abalwéele, ne echilo cha kásatu, niinhikiíliza ensoonga yaanze’ 33 Hamo ne éebyo, niinyeendelwa nzeendelele no oluzeendo lwaanze lwo kuzeenda Yeruzaléemu leélo na nyeéncha ne zweéli, kuhicha nhike óokwo, habwo kuba tichikwiíle omubáasig kufwéela ahaantu ahaandi, choónka Yeruzaléemu!
34 “Íiwe Yeruzaléemu, Yeruzaléemu! Nooyíta ababáasi, na abaantu áabo abalikutumwa hali íiwe, noobateéla amabáale. Entulo nyiinzi nkaba niinyeénda kubakobyaakobya abaantu baawe, nka nikwo enkoko ekobyaakobya otuzwíyo twaázo, náho buli ntulo timukweenda. 35 Muléebe! Óobu Múungu yaabaleka íimwe ne éenzu yéenyu! Mbweenu, niimbagaambila, amazima timukuumbona kaandi, mpaka obuchilo mulyaágaamba, ‘Óogwo alikwíiza omwiiziina lyo Omukáma, nitumukuza!’h ”