Yeézu Naamuchiza Omulwéele Echilo Cha Sabato
14
1 Echilo chimo cha Sabato, Yeézu akazeenda kulya ebyookulya omúka yo omutégeki oómo wa Abafalisayo. No obuchilo akaba ali óomwo, Abafalisayo na abaandi bakaba nibamuleébeleza bwooli.2 Na áaho omuméeso goómwe, hakaba haliho omuuntu oómo, óogwo akaba ayina obulwéele bwe eéntwe. 3 Yeézu yaábabúuza Abafalisayo na abeégesa be ebilagilo, “Ngási, nitukuundilwa ne ebilagilo byéetu kuchíza abaantu omuchilo cha Sabato, nali titukukuúndilwa?” 4 Náho boónyini, beésiza. Yeézu yaamukwaatáho omulwéele óogwo, yaámuchiza, yaámulaga asube omúka.
5 Kaandi Yeézu yaábabúuza, “Noóha omuli íimwe óogwo, ente nali ensikili yoómwea kaayakugwa omwiiziba echilo cha Sabato, tiyaákuziihilémo bwaangu ahonyini, nóobwo chili echilo cha Sabato?” 6 Abaantu áabo, tibalabeele ne cho kusubya ha bwa amagaambo áaga.
Nimwiilóoko Habwo Kweéloondelela Isima
7 Yeézu akaba naaleeba abazenyi abalaálikwa okwo bakaba nibeesólela ebitébe bya abazenyi bi isima. Niho yaabachweela omugani, ahakugaamba, 8 “Obuchilo nooyaangíswa omumazenyi go obweenga, otaákwiikala ahaantu ha bazenyi bi isima. Otaákukola oótyo habwo kuba, hamo lúundi ayaangisiibwe oóndi owisima bwooli kuchila íiwe. 9 No óogwo abalaálikile íimwe bábili, naayiza kukugaambila, ‘Mulekele óogu olugazi lwáawe.’ Áaho, nóokolwa ensoni bwooli, habwo kuba nooyeendelwa kuzeenda kwíikalila olugazi lwa ahamuhélo bwooli.
10 “Náho, obuchilo noolaalikwa omumazenyi go obweenga, zeénda oyikale aha lugazi lwa ahamuhélo bwooli. Habwéecho obuchilo óogwo ayakulaálikile aleéza, akugaambile, ‘Mnywáani waanze, iíza suba kunu ahéehi, niho hazima bwooli.’ Bityo nikwo olahaabwa ikuzo omuméeso ga abazenyi bóona. 11 Habwe ensoonga, buli muuntu óogwo alikweékuza, alyaásubibwa aheéfo. Na buli muuntu óogwo alikweésubya aheéfo, naayinulwa.”
12 Áaho, Yeézu yaámugaambila óogwo ayamwaángisize, “Obuchilo noobaloongeza abaantu amazenyi ge echookulya cha nyemisana nali ahalweébazo, otaákwaangisa banywáani báawe, nali béene béenyu, nali abaantu bali badugu báawe, nali abatúuzi báawe abahíte. Koólakola oótyo, áabo nábo nibakwaangisa owaabo, na bityo nibakusubiza ahakukukolela nka áago gi waabahéele.
13 “Náho, obuchilo noobaloongeza abaantu amazenyi, oyaangise abahabi, abalema, enziíngami, na abahume. 14 Niho oláaba no omugisa, habwo kuba, áabo tibéena echiintu chokukusubiza. Náho Múungu niwe óogwo alaakusubiza, obuchilo alizoola abaantu áabo baamusemelíize weényini.”
Abaantu Bataákumugaya Múungu Kaalabaángisa
15 Oómo omuli áabo abaabele beekeele hamo na Yeézu ahaluhélo, kayaabihulíile ebigaambo éebyo, yaámugaambila, “Ayina omugisa, omuuntu weéna wéena óogwo alaalya amazenyi omubukáma bwa Múungu!b”
16 Yeézu yaámusubiza aha mugani ha kugaamba aáti, “Hakaba heena omuuntu oómo, óogwo akaloonza amazenyi maháango, yaalaalika abaantu beenzi. 17 Ha kachilo ka amazenyi kaáhika, yaatuma omuhalila woómwe aha balaálikwa bóona azeénde kubagaambila, ‘Obu mwiíze! Ebiintu byóona byaákóbile!’
18 “Náho, abalaálikwa bóona, oómo oómo baaba nibeebulabuza nibasaba echiganyizi. Owa mbele, yaámugaambila, ‘Nguzile ensaambo, mazima nzeénde kuzileeba. Niinkusába onzilile echiganyizi.’ 19 Oóndi akagaamba, ‘Nguzile ente zo kulima, emikomelano etáanu, no óobu, niinzeénda kuzigema. Niinkusába onzilile echiganyizi.’ 20 No oóndi akagaamba, ‘Nswiíle omukazi omubuchilo obunyini, habwéecho tiínkuhicha kwíiza.’ 21 Óogwo muhalila yaagalukayo, yaámumanyisa omukáma woómwe áago góona. Niho omukáma woómwe yaánigahala, yaámugaambila omuhalila woómwe, ‘Zeénda bwaangu omuli óogwo muhaanda omugazi no otuhaándagazi two omumuzihwa óogwo, ozeende kubaléeta abahabi, abalema, abahume, ne enziíngami áaha.’ 22 Kayáabaliile, omuhalila óogwo yaásuba, yaámugaambila, ‘Mukáma, áago gi waandagila nikwo naazila. Nóobu bityo, hachaali hachiliho obwiikalo ha báandi.’ 23 Omukáma yaámugaambila, ‘Mbweenu! Osohole ahéelu ozeénde aha mihaanda éezo elikuzéenda omumitúulo emiche, no omumisili, obakomeenteleze abaantu beéze batáahe omúka yaanze, mpaka eyizule. 24 Náho omuli áabo bóona áabo naalaálikile, niimbagaambila nkokwo talimo nóobwo omuuntu oómo, óogwo alaaloza amazenyi gaanze!’ ”
Tí Nzaana Kuba Omuheémba Wa Yeézu
25 Yeézu, akaba naakulaatilana ne embága mpaango ya abaantu. Yaáhiinduka, yaábagaambila, 26 “Omuuntu weéna wéena óogwo alikunyizila, mazima hakwiingana no kunyeenda iinye, naayeendelwa atamwe iíse, nyina, mukazi woómwe, abaana boómwe, badugu boómwe, na banyanya, nóobwo ayitamwe weényini weénka. Bitali bityo takuhicha kuba omuheémba waanze. 27 No omuuntu weéna wéena óogwo atakeemuchize omusalaba gwoómwe akankulaatila, takuhicha kuba omuheémba waanze.
28 “Tugaámbe oómo omuli íimwe naayeénda kwoómbeka omunara mula bwooli. Mazima, takwoombeka atekeéle kwaanza, no kuleeba obuguzi bwa buli chiintu éecho alaakozesa aha kwoómbeka omunara óogwo. Kaálakola aátyo, niho alasoomboókelwa nkokwo ayina empilya zo kuhicha kumala obwoombeki. 29 Kaálaaba atakozile aátyo, yaakaáhicha kwoómbeka oluhazo, náho ahaleéza naalemwa kugumaliliza omunara. Niho buli muhiínguzi, alyáaba naamugaya, 30 ahakugaamba, ‘Omuuntu óogu akabaanza kwoómbeka, náho talahikize kumaliiliza obweémbeki óobu!’ 31 Nali ni mukáma chi ayakweenda kuza kulwaana no omukáma oóndi, atekeéle kwaanza no kuteékuza nkokwo yakaahicha, aha abalwaanila ngoma boómwe ebihuumbi ikumi, kugima kulwaana no óogwo omukáma ayina abalwaanila ngoma ebihuumbi makumi ábili? 32 Kaálabona nkokwo naalemwa, ahonyini naasiindika entumwa boómwe, bazeénde bwaangu aha mukáma oóndi achili hala, babone kukuúndilana kuba no obuhóolo. 33 Bityo nikwo no omuli íimwe, taliho nóobwo oómo wéenyu óogwo yaakuhicha kuba omuheémba waanze, kaálaaba atakalekile byóona éebi ayinabyo.”
Mube Nko Omwóonyo Muzima
(Matayo 5:13; Mariko 9:50)