Omugani Gwo Obweenga
22
1 Yeézu yaazeendelela kweégesa Abafalisayo na abakúlu ba abagabe habwo omugani ogúundi nka nikwo, 2 “Obukáma bwo omu igulu bususana no omugani óogu. Hakaba heena omukáma ogwo ayaachuumbiile omwaanáwe amazenyi go obweenga. 3 Omukáma óogwo yaasiindika abazáana boómwe bazeénde kwéeta áabo abakaba baángisiibwe nka nikwo beéze ha amazenyi, náho bóona bakaanga kwíiza.4 “Niho yaasiindika abazáana abáandi, naabazila aáti, ‘Muzeénde mubaagaambile áabo abaangisiibwe muti, “Naáchuumbile amazeenyi gaanze. Naabaágile ebimasa byáanze hamo ne ebituungaánwa ebíindi bya amasazu. Naáloongize byóona. Ha bwéecho, mwíize mulye amazenyi go obweenga!”’ 5 Náho abaantu áabo abalaálikilwe, tibalabyeétiileho. Buli oómo akaba ayina ebyaago byoomwe, ogu yaaza omu musili gwoómwe, no oóndi yaaza ha butuunzíbwe. 6 Abáandi baabakwaátilila abazáana bo omukáma óogwo, baábefoolela kubi no kubéeta. 7 Mbweenu, omukáma kayeezile yaahuliza áago agaákolwa aha bazáana boómwe, yaánigahala bwooli. Yaasiindika ensuli zoómwe bazeénde kwiita abéesi áabo no kusiingaalicha iboma lyáabo.
8 “Niho omukáma óogwo yaabagaambila abazáana boómwe báti, ‘Amazenyi go obweenga naágachuumba, kwoónka abaángisiibwe tibakwiilwe. 9 Mbweenu óobu, nimwiilooko muzeénde aha ntaáganilo ze nsese, mufwe mwaáyaangisa abaantu bóona áabo mulabugana nabo nka nikwo, beéze aha mazenyi go obweenga.’ 10 Abazáana áabo balugaho bazeénda aha ntaáganilo ze nsese, balaalika abaantu bóona abaabele nibabugana nabo, babe abaheni nali abamazima. Niho abazenyi beeza bataaha omuunzu ya amazenyi, nayo eba yeézula.
11 “Náho obuchilo omukáma yataahilemo abone kuleeba abazenyi aha luhelo, yaabonamo omuuntu oómo ogwo akaba atazweele enkaanzu yo echilo chikúlu cha amazenyi go obweenga. 12 Yaámubuuza aáti, ‘Íiwe munywáani, waataahamo oóta óomu kunu otakazweele enkaanzu ye echilo chikúlu cha amazenyi go obweenga?’ Náho omuuntu óogwo ába yeésiza kwoónka. 13 Mbweenu, omukáma yaabagaambila abahalila boómwe báti, ‘Nimumukome emikono na amagulu, mumunage ahéelu omu nsíimbaazi. Niho halaaba okuchula no kuteélana ameeno.’ ”
14 Yeézu yamaliliza aha kugaamba aáti, “Abaantu áabo abalikwéetwa ni béenzi, náho abatooziibwe ni báche.”
Ibuuzo Lye Echihika Cho Kumubása Yeézu
(Mariko 12:13-17; Luka 20:20-26)
15 Ahonyini, Abafalisayo bazeenda, baábugana no kweéhanuuza akazeendele ko kumubása Yeézu ha bigaambo byoómwe. 16 Niho baamusiindikila abaheémba báabo baatáho na Abaherode.a Baáhika baámubuuza Yeézu báti, “Íiwe Mweégesa, nitusoomboókelwa nka nikwo iiwe oba omuuntu wa mazima na nka nikwo nooyegesa amazima habwa amagaambo ga Múungu. Nitusoomboókelwa nka nikwo iiwe tokutiina omuuntu weéna wéena, toléeba ikuzo lya muuntu. 17 Óobu mbweenu, otugaambíle neewe. Ngási! Kwiingana ne ebilagilo byeetu, na amazima íichwe kuliha oluhaambwe hali Kaizaali,b nali mmahi?”
18 Náho Yeézu akamanya echihika chaabo chibi, yaábagalulila aáti, “Íimwe abagóbya, habwa chiíha nimweénda kuúndeenga? 19 Nimunyoleke empilya éezo mulikuliha oluhaambwe.” Niho baámuheéleleza edináali eémo. 20 Niho Yeézu yaábabúuza aáti, “Eezi nsuso na amaandiko áago agaandikilwe aha dináali éezi, na agoóha?” 21 Boonyíni baámusubiza báti, “Ne bya Kaizaali.” Yeézu yaábagaambila aáti, “Oótyo! Mbweenu, mumuhe Kaizaali ebiili ebya Kaizaali, na mumuhe Múungu ebiili ebya Múungu.”
22 Obuchilo bahuliile akasubize ka Yeézu, baásobelwa bwooli. Mbweenu, baaba baámuleka, baalugáho áaho.
Amaandiko Matakatifu Nigasiinza Okuzooka Kwa Abaantu Kuliho
(Mariko 12:18-27; Luka 20:27-40)
23 Ha chilo éecho nyini, Abasadukayo bunaanka beeza hali Yeézu. Abo Basadukaayo baagaamba nka nikwo, okuzooka kwa abáfwiile tikulibaho. Niho baámubuuza Yeézu báti, 24 “Íiwe Mweégesa, Musa akatulagila omu bilagilo byoómwe nka nikwo, kabilaaba omuuntu yaafwiile no kumusiga mukazíwe atamuzeéleho mwaana, omukázi ogwo ahuungulwa no omulúmuna abone kumuzaálila chifwa abaana.c 25 Mbweenu, omuli íichwe hakaba heena abaantu musaanzu be eenda eémo. Owo kubaanza aba yaásweela omukázi, mala yaákaba atéena kumuzaalaho omwaana mukazíwe. Mbweenu aba yaámusigila mweene wáabo kumuhuungula mukazíwe. 26 Mweene wáabo ogwo náwe, yaafwa atéena kuzáala no ogwo mukázi. Bikaba bityo nyini aha balumuna abáandi bóona musaanzu, bakafwa batéena kumuzaalaho mwaana. 27 Abo bóona ka bafwiile, niho ogwo mukazi náwe aba yaáfwa. 28 Mbweenu otugaambiile, keelaaba kuzooka kwa abaantu kulaabaho, ha chilo éecho cho omuheleeluko, ogwo mukázi alyaaba ali wo mwoóha omuli abo baseeza musaanzu? Ha kuba bóona abo musaanzu bakaba bamuswiile!”
29 Yeézu yaabagalulila aáti, “Íimwe nimweesuluhaza aha buteétegeeleza áago agaandikilwe omu Maandiko Matakatíifu, kaandi timukugasoombookelwa obuzizi bwa Múungu óokwo buli. 30 Habwo kuba ha chilo éecho abaantu balizóoka, tihalihalizila abaliswéela nali abaliswéelwa. Náho balaaba nka bamaléeka bo omu igulu, áabo abatakuswéela nali kuswéelwa. 31 Náho mazima bafwiile nibazooka, timukasomile omu Maandiko Matakatíifu óokwo Múungu yabagaambile íimwe? Akagaamba aáti, 32 ‘Níinye Múungu wa Ibrahímu, Izáaka na Yakobo.’d” Yeézu yaazeendelela kugaamba aáti, “Bityo, áaba baantu, nóobu bakaba baáfwiile, hali Múungu na abalame!”e 33 Obuchilo embága ya abaantu káyaahuliile áago, yaásobelwa bwooli habwa ameégeso goómwe.
Echilagilo Chikúlu Kuchila Byóona
(Mariko 12:28-34; Luka 10:25-28)
34 Obuchilo Abafalisayo baahulíile nkokwo Yeézu yaabahuumbaálize Abasadukayo habwa kagaambile koómwe, baákoba hamo. 35 Niho, muzeenzi wáabo ogwo akaba ali omumanyi we ebilagilo bya Musa, yaámubuuza Yeézu amuleengile, nka nikwo, 36 “Íiwe Mweégesa, ni chilagilo chi echili chikúlu omu bilagilo byóona?”
37 Yeézu yaámugalulila aáti, “Omweénde Omukáma Múungu waawe aha muganya gwáawe gwóona, no omwooyo gwáawe gwóona no obweenze bwáawe bwóona.f 38 Echilagilo éechi nicho chikúlu kuchila ebilagilo ebíindi byóona, kaandi nicho chilikugasa kuchila byóona. 39 Echilagilo cha kábili nacho ni nke éecho nyini chiina ensoonga elikususana ne éezo, nacho nchichi, ‘Oyeéndega mutúuzi wáawe nkokwo oyeyeénda iiwe nyini.’g 40 Omuli éebyo bilagilo bibili niho ebilagilo byóona bya Musa na ameégeso ga ababáasi nigabitegeza.”
Masiya Niwe Omwiizukulu Wa Daudi No Omukáma Wa Bóona
(Mariko 12:35-37; Luka 20:41-44)
41 Óobu Abafalisayo áabo baakobile hamo áaho, Yeézu yaábabúuza aáti, 42 “Nimuteekuzaho muta habwa Masiya, ni mwiizukulu wo oóha?” Baámusubiza báti, “Ni mwiizukulu wo omukáma Daudi.” 43 Yeézu yaábabúuza aáti, “Ngási ni bitaho, obuchilo naayibeembeelelwa no Omwooyo Mutakatíifu, omukáma Daudi naamweéta Masiya, ‘Omukáma’? Akagaamba aáti,
44 ‘Omukáma Múungu akagaambila Omukáma wáanze nka nikwo,
“Ikala aha bulyo bwáanze,
ndemwe naáta ababisa baawe ahaansi ya magulu gaawe.”’h
45 “Kabilaaba weényini nyini Daudi naamweéta Masiya, ‘Omukáma,’ óobu Masiya yaabaho aáta kaandi kuba mwiizukulu?”
46 Tihalazizile no omuuntu ogwo ayaahikize kugalula choóna chóona. Kaandi kulugiilila echilo éecho nyini, tihalabweenwe muuntu ayaleengesize kumubuúza búuza Yeézu amabúuzo agáandi.