Yeézu Naabuúzwa Habwa Obuhicha Bwoómwe
(Matayo 21:23-27; Mariko 11:27-33)
20
1 Echilo chimo, Yeézu akaba ali omulubúga lwe éenzu ya Múungu, ali omukubeégesa abaantu no kubagaambila Empola Nzima. Abakulu ba abagabe ba Múungu, na abeégesa be ebilagilo, na abanyaampala ba Abayahudi ahonyini, baamwiizáho, 2 baámugaambila, “Otugaambile, áago goólikukola, noogakola aha buzizi chi? Ngási, no oóha alikukuha obuzizi óobu?”3 Yaábagaambila, “Neenye niimbabuúza ibúuzo. Mungaambile, 4 obuzizi bwa Yohana kubatiza bukaluga ahali Múungu, nali aha baantu?” 5 Áaho, beégaambila, “Katulagaamba nkokwo Múungu akamutuma Yohana kubatiza, naagaámba, ‘Mbweenu! Habwaáchi timulamwiíkiliize?’ 6 Na katulamusubiza nkokwo obuhicha bwoómwe bukaluga omubaantu, áaho abaantu bóona nibatuteéla amabáale, habwo kuba nibatégeza nkokwo Yohana akaba ali omubáasi.” 7 Niho baálemwa, baámusubiza, “Titukumanya obuhicha bwoómwe bukaluga nkáhi.”
8 Yeézu yaábagaambila, “Nóobu iinye, tiínkubagaambila, na aha buzizi chi niinkola amagaambo áaga.”
Omugani Gwa Abalimi Abazilwa
(Matayo 21:33-46; Mariko 12:1-12)
9 Mala kaandi, Yeézu yaazeendelela kubachweela abaantu omugani óogu, “Hakaba heena omuuntu oómo, akahaamba emizabibu omumusili gwoómwe, yaagukoótesa aha balimi. Káyaabalíile, yaazila oluzeendo omuunsi ya hala, yaamalayo óokwo ebilo biinzi. 10 Obuchilo bwo kugesa kibwaahikile, yaamutuma omuhalila woómwe aha balimi áabo, babone kumuha omugabo gwoómwe gwe emizabibu, asube nazo aha mukáma woómwe. Náho, abalimi áabo baámutéela bwooli, baámubíinga emikono eli busa.
11 “Kaanyina omusili, yaatuma omuhalila oóndi. Náho nawe baámutéela no kumugóokela, mala baámubíinga emikono eli busa. 12 Yaamutuma omuhalila wa kásatu. Óogwo nawe, baámuhutáaza, baámubíinga.
13 “Hamuheléeluko, kaanyina omusili akagaamba, ‘Mbweenu, nzileho iínta? Entulo éezi, niimusiindika mutábani waanze engaanzi! Hámo lúundi óogu, nibamukoondoókela.’ 14 Náho, áabo balimi kibamubweene, beégaambila, ‘Óogu niwe omuhuunguzi we ebiintu byoómwe. Tumwíite, tubone obuhuunguzi bwoómwe, bube obwéetu.’ 15 Áaho, baamusohozámo omumusili gwe ezabibu, baámwiita.”
Niho Yeézu yaábabúuza, “Mbweenu, óogwo kaanyina omusili alyaábakolaho aáta áabo balimi? 16 Alyéeza no kubasiingaalicha abalimi áabo, no omusili óogwo, alaábaha abaandi!” Obuchilo abaantu baahulíile amagaambo áago, baágaamba, “Mazima! Áago gataákubáho” 17 Yeézu yaabatukuliza améeso, yaábagaambila, “Mbweenu! Géena ensoonga chi amaandiko áaga?
‘Ibáale éelyo aboómbeki bakalyáanga,
nilyo lyáaba ibáale likulu lyo oluhazo’a
18 “Omuuntu weéna wéena kaálikugwa halugulu yi ibáale éelyo, naachenyagulika ebinogoka nogoka, na kalilamugwéela omuuntu, nilimuhoónda kúbi.”
19 Áabo beégesa be ebilagilo na abakulu ba abagabe ba Múungu, baámanya nkokwo omugani óogu nigubagaámba boónyini. Bakaba nibeénda kumukwáata bwaangu ahonyini, náho bakatíina embága ya abaantu.
Ibúuzo Aha Kusohoza Oluhaambwe Ahali Kaizaali
(Matayo 22:15-22; Mariko 12:13-17)
20 Habwéecho abatégeki ba Abayahudi, baaba nibamubaandila bwooli Yeézu, baátuma abacheéngelezi. Áabo abacheéngelezi, bakeekola nkokwo na abaantu ba amazima. Náho, bakaba beena ensoonga yo kumukwáasa Yeézu aha bigaambo byoómwe, babone kumukwáata no kumutwáala kulégelelwa omubutegéki bwo obuhicha bwo omwaanaángwa wa Abaruumi.
21 Bityo, abacheéngelezi baámubuuza, “Mweégesa, nitumanya nkokwo buli chigaambo éecho olikugaamba no kweégesa nichigasa. Íiwe tokusáaswa obukúlu bwo omuuntu, náho nooyegesa amazima ahali bóona, batuúle nka nikwo Múungu alikweenda. 22 Ngási! Mbweenu, aha bilagilo byéetu, nitweendelwa tusohoze oluhaambwe ahali Kaizaali, nali tuleke kumusoholeza?”
23 Ahonyini Yeézu yaamanya obugóbya bwáabo, yaábagaambila, 24 “Nimuzinyoleke empilya ye edináali. Ensuso éezi eliho, hamo ni izíina éeli, ne ebyoóha?” Baámugaambila, “Ne ebya Kaizaali.”
Empilya ze Echirúumi ezilikwoóleka ensuso ya Kaizaali. (20:24)
26 Akasubize áako ka Yeézu kaábasobela bwooli, beésiza. Bakalemwa kumukwáasa aha magaambo áago akagaamba omuméeso ga abaantu.
Yeézu Naamanyisa Nka Nikwo Abaantu Balaázooka
(Matayo 22:23-33; Mariko 12:18-27)
27 Mala Abasadukayob bunaanka baamwiizáho Yeézu. Abasadukayo bakaba nibeegesa nkokwo abáfwiile, mazima tibakuzooka. Baámubuuza Yeézu, 28 “Mweégesa, omubilagilo, Musa akatwaándikila nkokwo, kaálaaba omuuntu afwíile, male alekile mukazi woómwe atéena mwaana, ni lwaampaka omulúmuna woómwe amuhuungulec óogwo mukazi akaambwiile, abone kumuzaálila óogwo chífa, abaana.d 29 Tugaámbe, bakaba baliho abadugu musaanzu, áabo abazeelwe eenda eémo. Omukwaata wo kubaanza yaákuúmpula omukazi, óogwo mukwaata yaáfwa atéena kuzáala náze omwaana, 30 no omudugu woómwe owa kabili [yaámuhuungula nawe yaáfwa atéena kuzáala náze omwaana.] 31 Kahaabaliile, owa kásatu, nawe yaámuhuungula óogwo mukazi, yaáfwa. Byaaba bityo nyini ahali bóona musaanzu, baámuhuungula mukazi óogwo, baáfwa batéena kusigaho abaana. 32 Hamuheléeluko, óogwo mukazi nawe yaáfwa. 33 Mbweenu, echilo cho kuzooka, óogwo mukazi alyáaba muko oóha? Habwo kuba abaséeza bakaba bali musaanzu, na buli oómo akamukuúmpula!”
34 Yeézu yaábagaambila, “Abaantu bo obuchilo óobu nibakuúmpula no kukuúmpulwa.e 35 Náho, áabo Múungu yaababona bakwíilwe kuzóolwa kuluga omubafwíile no kutúula omuunsi eénsha, áabo kaandi tibalikuúmpula, nali kukuúmpulwa. 36 Na tichikwiile nkokwo balyaáfa kaandi, habwo kuba balyáaba nka bamaléeka. Balyáaba abaana ba Múungu, aha kuba baázoolwa.
37 “Nóobu Musa akamanyisa abaantu nkokwo abáfwiile balaázooka. Áaha mpola yéecho chisaka echaabele nichaáka omulilo, akagaamba nka nikwo Omukáma Múungu ‘niwe Múungu wa Ibrahímu, wa Izáaka, no wa Yakobo.’f 38 Habwéecho, weényini tí Múungu wa abáfwiile, náho ni Múungu wa áabo abali mwooyo, habwo kuba hali weényini bóona ni balama.”
39 Áaho, abeégesa abaandi be ebilagilo baágaamba, “Mweégesa, waagaamba kuzima!” 40 Kubaandiza obuchilo óobwo, taliho ayaaleengesize kumubúuza Yeézu amabúuzo agáandi.
Masiya Niwe Omwaana Wa Daudi No Omukáma Wa Bóona
(Matayo 22:41-46; Mariko 12:35-37)
41 Mala, Yeézu yaábabúuza abeégesa áabo, “Ngási abaantu nibagaámbaho báta nkokwo Masiyag no omwaana wo omukáma Daudi? 42 Daudi weényini, omuchitabo che Enzina, naagaámba,
‘Omukáma Múungu akamugaambila Omukáma waanze,
“Oyikale olubazu lwáanze lwo obulyo,
43 kuhika nkukole osiínge ababisa báawe
no kubategeka.h” ’
44 “Áaho, kabilaaba Daudi namweéta weényini, ‘Omukáma woómwe.’ Mbweenu, naahicha aáta kuba omwaana woómwe?”
Abaantu Bataákukulaatiza Imanyi Lya Abeégesa Be Ebilagilo
(Matayo 23:1-36; Mariko 12:38-40; Luka 11:37-54)
45 Obuchilo abaantu be embága bakaba nibamuhuliiliza, Yeézu yaábagaambila abaheémba boómwe, 46 “Mweélige na abeégesa be ebilagilo!i Nibeénda kuzwaálilila enkaanzu záabo endéehi omukulibata ahabwéelu. Kaandi, nibeénda kwaángaluchwa ahi isima omumagulilo, no kwiikala aha bitebe bi isima omuunzu ze emikobo ya Múungu, no omumazenyi. 47 Nibamusaba Múungu aha sala ndéehi za amagaambo meenzi meenzi omuméeso ga abaantu babone kubonekana kuba abe entúungwa nzima. Nibaáya amaka ga abakazi abakaambwiile! Abaantu áaba, Múungu naabachwaaziíka bwooli!”