Echigabo Cho Omukazi Akaambwiile
(Mariko 12:41-44)
21
1 Omwáanya óogwo Yeézu akaba achili omulubúga lwo omuunzu ya Múungu, naaléeba, yaabona abahíte óokwo baabele nibatamo ebigabo byáabo omuchiibo che ebigabo. 2 Kaandi yaabona omuhabi oómo, ayaabele ali omukazi akaambwiile, naátamo omuchiibo ehela nche ibili zoónka.a3 Áaho, Yeézu yaágaamba, “Niimbagaambila amazima nkokwo, óogu mukazi omuhabi akaambwiile, niwe yaasohoza endeengo mpaango kuchila abaandi bóona. 4 Niingaamba iínti habwo kuba áaba bóona, ebigabo éebyo baasohoza, ne echinogóka chiche choónka cha amabonwa gáabo meenzi. Náho óogu mukazi akaambwiile omuhabi bwooli, yaatamo byóona éebyo alikweésiga aha bulami!”
Éenzu Ya Múungu Elyaákaambulwa
(Matayo 24:1-2; Mariko 13:1-2)
5 Omuli áabo Baheémba, bakaba nibahoóyelela nka nikwo éenzu ya Múungu etonilwe na amabáale maluunzi, hamo ne ebiintu byo obukáani éebyo abaantu baamusoholiize Múungu. Náho Yeézu yaágaamba, 6 “Éebi byóona éebi mulikuléeba, haléeza ebilo éebyo tihalibaho nóobu ibáale éelyo lilisigala ha lugulu ye eliindi. Góona galyaákaambulwa!”
Yeézu Naasasaanula Ebyaágalalo Bya Abaheémba Boómwe
(Matayo 24:3-14; Mariko 13:1-13)
7 Abaantu áabo baámubuuza, “Mweégesa, ebigaambo éebyo bilyáabaho ili? Na halyaábaho emanyiso chi, éezo zilitwooleka nkokwo geelilila kubonwa?”
8 Yaábagaambila, “Mube méeso, mutaákwiiza mukabéehwa! Abaantu béenzi baléeza ahi izíina lyáanze, buli oómo ahakugaamba, ‘Niwe íinyenyini!’ Kaandi, nibagaámba, ‘Obuchilo bwo omuheleeluko, bweéliliza!’ Abaantu áabo, mutaákubakulaatila! 9 No obuchilo óobwo mlaahulila empola zi ichúmu, no kutéeyeka, mutaákutíina. Áago góona, ni lwaampaka geéze kwaanza, náho omuheleeluko gwa byóona, niguba gucháali.”
10 Yeézu yaazeendelela kugaamba, “Éensi eémo, neelwana ne eéndi, no obukáma bumo, nibulwana no obuundi. 11 Buli haantu nihabaho okuchuúndagulikab kuháango kwe éensi, ne enzala mpaango na amalwáala mábi bwooli. No kuluga omwiigulu, halabaho ne emanyiso mpaango, na amahano go okutiínisa.
12 “Náho, obuchilo áago góona gacháali kubahikaho, abaantu nibabakwaáta íimwe no kubatwáala omuunzu ze emikobo ya Múungu muchwaaziíkwe, no kubaboha omumabohelo, omukubaágalaza kúbi. Na nimutwaálwa omuméeso ga abatégeki na abaanaángwa, habwo kuba íimwe muli abaheémba baanze. 13 Nibwo obuchilo mulyaábona omwáanya gwo kuunyaatula.
14 “Habwéecho, mutiimbye emiganya yáanyu mutaákutahwa tahwa, mutaákuteekuza bwooli amagaambo áago mulagaámba obuchilo bwo kweéhohoola. 15 Iinye hanu, niimbáha okweétegeeleza ha magaambo áago mulagaámba, kuhicha ababisa béenyu tibalihicha kwáanga nali kuhakana.
16 “Omubuchilo óobwo bwo kusohozwa aha bategeki, nimunobwa noobu na abazeele béenyu, badugu béenyu, abaantu bo olugaanda lwéenyu, na abanywáani béenyu. Omuli íimwe abaandi nimwiítwa. 17 Abaantu bóona, nibabatámwa aha bwaanze iinye. 18 Náho, tikakubula nóolu akasoke kámo omumitwe záanyu! 19 Na kamuleégumya, nikwo obulami bwéenyu bulachuúngulwa.”
Yeézu Naasasaánula Nkokwo Yeruzaléemu Neekaambulwa
(Matayo 24:15-21; Mariko 13:14-19)
20 “Obuchilo mulaábona nkokwo omu chikaali cha Yeruzaléemu gwaákubilwe na abalwaani bi ichúmu, niho mulaamanya nkokwo obuchilo bweéliliza aaho gulaasiísagulwa. 21 Áaho, áabo abali Yudea, beéchize ahakwiílukila omumabaanga. Áabo abali omu chikaali cha Yeruzaléemu, balugemo óomwo bwaangu, na áabo bali omumisili, bataákusuba omumuzihwa omu. 22 Ha kuba, ebilo éebyo, ne ebilo byo omuchwaáziiko, ebigaambo byóona éebyo ebyaayaandikilwe bibone kuhikíilila. 23 Omubilo éebyo, nimwiilóoko abakazi áabo abeene eenda, nimwiilóoko íimwe ba máaha áabo mulikwóoncha! Elaaba kúbi, habwo kuba, omuunsi éezi, nihabaho ne ebyaágalalo bisaagiliize bwooli, kaandi ne echihulumuko cha Múungu nichibeezila abaantu áaba. 24 Abaantu abaandi, balyaáyitwa aha lubáadi. Na abaandi, nibakwaátwa mateka no kutwáalwa omuunsi zóona. No omu chikaali cha Yeruzaléemu gwoonyini, Abanyamahaánga nibeéza no kugutégeka, kuhika emihaanguko záabo zibe zaáhikiilizibwe.”
Kwiiza Kwo Omwaana Wo Omuuntu
(Matayo 24:29-31; Mariko 13:24-27)
25 “Nihabaho ne emanyiso omwi izóoba, omukweezi, ne enyeyéezi. Abanyamahaánga góona omuunsi, balyáaba no olwaágalalo aha bwo kutahwa tahwa kwiingana no omusuumo gwo okuhilila kwa Amakóonzo ge enziba. 26 Abaantu balyaáfwa bwooli omuganya hakweeganya kuhicha nibalába kwiingana no kutegeza kusaangwa na amagaambo mábi omuunsi. Habwo kuba, ebiintu ebili olugulu bilyáaba nibizugumisibwa.
27 “Áaho niho abaantu balaábona Omwaana wo Omuuntu, naayiza omuobwíile, ayina obuzizi bwiinzi ni ikuzo likulu. 28 Áago góona, obuchilo gaalaabaanza kukolwa, mwiimeelele buligi ligi mwiinamule emitwe yéenyu, habwo kuba obuchilo bwo kuchuúngulwa kwéenyu, bweéliliza!”
Omugani Gwo Omuti Gwo Omutíini
(Matayo 24:32-35; Mariko 13:28-31)
29 Male, Yeézu yaábagaambila abaheémba boómwe omugani, ahakugaamba, “Muleebe omuti gwo omutíini, ne emiti eéndi yóona. 30 Obuchilo nimubona nkokwo yaabaanza kusébuka amababi, ahonyini nimumanya nkokwo obuchilo bwo kugesa bweéliliza.
31 “Nikwo bilibaho hali íimwe. Obuchilo mulaábona nkokwo áago nigabaho, niho mulaamanya nkokwo obukáma bwa Múungu bweéliliza. 32 Niimbagaambila áago gali amazima, oluzáalo óolu tilukuhiíngula, mpaka éebi byóona bibe byaákozilwe. 33 Igulu ne éensi bilyaálugaho, náho amazima ni nkokwo ebigaambo byaanze nibiláma obucha no obuchiile!”
Kuba Méeso
34 “Mweélige, mutaákwiiza mukalemeelelwa ne ebya katóozi, obutamiizi, no okutahwa tahwa kwo omubulami, ne echilo éecho nichibeezila bwaangu 35 nko oluzuumba ha baantu bóona omuunsi yóona. 36 Habwéecho, mube méeso buli káanya, omukumusaba Múungu nkokwo mwakaáhichize kweéliga amahano áago góona agalabagwamo mpaka kuhicha mweémeelela omuméeso go Omwaana wo Omuuntu.”