Yeézu Naahoóyela Habwo Kusiingaalichwa Kwe Éenzu Ya Múungu
(Mariko 13:1-2; Luka 21:5-6)
24
1 Yeézu yaaluga aha lubúga lwe éenzu ya Múungu. Obuchilo naaluga óomwo, abaheémba boómwe baámwiilililaho babone kumwooleka emyoombekele ye éenzu ya Múungu. 2 Náho Yeézu yaábagaambila aáti, “Mwaabona kuluunzi emyoombekele éezi yóona? Mazima nniimbagaambila nka nikwo, tihalizila ikulugusi éelyo lilihuungaho ahalugulu ye eliindi, buli límo lilaásikiizibwa!”Yeézu Naahoóyela Habwe Ebyaágalazo Biháango Éebyo Ebilikwiiza
(Mariko 13:3-13; Luka 21:7-19)
3 Mbweenu, Yeézu yaazeenda omu ibaanga lye Emizeyituni, yeékala ali weénka. Abaheémba boómwe bamukulaatíla bali boónka, baámubuuza báti, “Tugaambile, amagaambo áago galyaaba ili? Kaandi, ni chiíha éecho chiliba emanyiso yo kusuba kwáawe no omuhelo gwe éensi?”
4 Yeézu yaabagalulila aáti, “Mube méeso, omuuntu weéna wéena ataákwiiza kubabeeha! 5 Abaantu béenzi nibéeza omu izíina lyáanze, nibagaámba nka nikwo, ‘Íinye niwe Masiya!’ Abaantu áabo balaaba abalikubeeha abaantu béenzi. 6 Kaandi, nimuba nimuhulila empola zi ichúmu ne ensumo zi ichúmu. Mutaákwiiza kutíina, habwo kuba éebyo nibyeendelwa kubonekana, náho omuhelo gwe éensi niguuba guchaali kuhika. 7 Éensi eémo elyaalwaana ne éensi eéndi, no obukáma bumo kulwáana no obukáma obuundi. Enzala no kuteengeta kwe éensi bileesulilikiza ahaantu bunaanka bunaanka. 8 Áago góona nigaba nko obutaandikilo bwo obusuungu bwo omukázi ogwo naayeénda kweéchuungula. 9 Omu buchilo óobwo, abaantu balaabakoongakóonga íimwe, mubone kwaágalazwa no kwiitwa, na abaantu ba mahaánga góona nibabatamwa habwo kuba muli abaheémba baanze. 10 Niho abaantu béenzi balyaáleka kuunkulaatila. Balyáaba nibanobana no kwéetamwa boónyini omuli boónyini.
11 “Omu obuchilo óobwo, balaaba nibeesululukiiza ababáasi béenzi be ebisuba, babeehe abaantu béenzi. 12 Na habwo obufu kukanya, abaantu béenzi balyaábulwa engoonzi. 13 Náho weéna wéena óogwo naába naayegumisiliza kuhicha ahihelezo, niwe Múungu alyaámuchuúngula. 14 Empola éezi Nzima habwo obukáma bwo omu igulu zilaáyatulilwa obuchilo bwóona omuunsi yóona. Obuchilo óobwo abaantu ba amahaánga góona balaaba baabweene omwáanya gwo kuhuliiliza okusiinza óokwo, niho ihelezo lye éensi liíze.
Ebilo Bye Ebyaágalalo Biháango Omuchaalo Cha Yudea
(Mariko 13:14-23; Luka 21:20-24)
15 “Halaaba no obuchilo óobwo mulaabona ‘echeékaango cho busiingaalike,’ chimeeliile ahaantu ahatakatíifu he éenzu ya Múungu. Echiintu éecho nicho chaagaambilwe no omubáasi Danyéeli.a Omuuntu weéna wéena óogwo alikusoma amagaambo áaga, amanye kuluunzi ensoonga yaágo. 16 Áaho mbweenu, abaantu bóona áabo abaliba bali omuchaalo cha Yudea, beelukile omu mabaanga. 17 Náwe omuuntu óogwo aliba ahanamile ahaluswi, atuúke aze kwiíluka bwaángu, ataza omuunzu kwiimucha ebiintu byoómwe. 18 Bityo nyini, omuuntu weéna wéena óogwo naába omumusili, ataákusuba enyuma kwiimucha ebebo yoómwe. 19 Nimwiilóoko, abakázi abeena eenda na áabo balaaba nibooncha omu bilo éebyo! 20 Bityo mbweenu, mumuneembelele Múungu nka nikwo kwiiluka kwéenyu kutakwíiza kuba omubuchilo bwe embého mpaango nali omu chilo cha Sabato. 21 Amazima, omu bilo éebyo, abaantu balaabona ebyaágalalo biháango bwooli. Ebyaágalalo nke éebyo, bichaliga kubaho kulugiilila obutaandikilo bwe éensi kuhicha leélo éezi, na tibilibonwa buundi. 22 Kaálaaba Múungu takanogweele éebyo bilo byo olwaágalalo, mbweenu tihaákuzizile no omuuntu no oómo óogwo ayakuchizile. Náho kwoónka ha bwa abatooziibwe na Múungu, éebyo bilo bilyaánogolwa.
23 “Mbweenu, aha buchilo óobwo, kaálaaba omuuntu nabagaambila nka nikwo, ‘Léeba, Masiya ali áaha!’ nali ‘Ali okwo!’ Mutaákwiiza mukamwiíkiliza. 24 Nibaabaho ababáasi be ebisuba na abaantu áabo balaaba nibeeyeta nkokwo ni Masiya. Balaaba nibooleka emanyiso na amahano go kusobeza. Bityo babone kubahabisa abaantu, na kabilaaba nibikuundilana, nóobu abatooziibwe ba Múungu. 25 Mube méeso! Naábagaambile kala góona áago gachaali kweéloonga kubaho. 26 Kabalaaba abaantu nibabaagaambila nka nikwo, ‘Leeba, Masiya ali omu iluungu okwo!’ mutaákwiiza mukaza óokwo. Nali keelaaba nibabaagaambila nka nikwo, ‘Leeba, ayeselekile omunzu éezo,’ mutaákwiiza mukabeekililiza. 27 Musoomboókelwe nka nikwo kwiiza kwaanze óogwo ndyo Omutábani wo Omuuntu, nikuba nke enkuba elábya kuluga obutúluka, lukabonelwa ahonyini obugwa. 28 Chilyáaba butúnu, nkóokwo empuungu áaho zikoba hamo, niho áaho nyini guba guli omutúumbi.”
Yeézu Nateekelela Kusuba Kwoómwe
29 “Léeba, obuchilo ebilo éebyo bye ebyaágalalo byaáhiingwiile, izóoba nilitelwaaho ensiimbaazi, okwéezi tikulisohoza kaandi omwaanga, ne enyenyéezi nazo nizigwa ahaansi kuluga omu igulu. Múungu naachuundagula amagala áago góona go omu igulu.b
30 “Niho emanyiso yo Omutábani wo Omuuntu elaábonwa ahabwiile, na abaantu be endimi zóona zo omuunsi nibaabaanza kubolooga aha kutahwa tahwa. Obuchilo nniinyíza, abaantu bóona balaámbona omu bwíile bwa ahalugulu nniinyíza kunu nyizwiile amagala ni ikuzo likúlu. 31 Niho ndyaásiindika maléeka báanze. Balaatela bwooli echikuli, babone bakobye abatooziibwe bóona ba Múungu kuluga buli hóona, omu nkasi zóona ze éensi.”
32 Yeézu yaazeendelela kugaamba aáti, “Mweéyege kuluga omugani gwo omuti gulikweetwa omutíini.c Obuchilo amatábazi gaágwo gaayolobile gaátiileho emisebuko na amababi gaáyasize, niho musoombookelwa nka nikwo obuchilo bwe echaanda bwaloonda kuhika. 33 Bityo nyini neemwe, obuchilo nimubona áago góona gaákolwa, musoomboókelwe nka nikwo obukáma buli héehi, bwaáhikile ahalwiizi. 34 Mazima nniimbagaambila nka nikwo, oluzáalo óolu tilukuhwaaho obuchilo amagaambo áago góona gatakeesululukiize. 35 Igulu na éensi nibihwa, náho amagaambo gaanze tigalihwa nakáti.
36 “Náho habwe echilo nali esáaha éezo amagaambo áago nigabáho, táliho omuuntu óogwo naamanya. Nóobu maléeka ba omu igulu nali Omutábani wa Múungu tibakusombookelwa, náho Táata weénka. 37 Ha bwéecho, kwiiza kwaanze íinye Omutábani wo Omuuntu, nikuba nkóokwo ekaba omu bilo bya Núhu. 38 Omu bilo éebyo obuchilo enzula yo kusiingalicha ekaba etakeezile, abaantu bakaba nibalya no okunywa, bakaba nibaswéela na kuswéelwa, kuhicha omu chilo éecho Núhu yaatahile omuunda ya safína. 39 Abaantu áabo, tibalamanyile ni chiíha echilaabaho, kuhicha obuchilo ameenzi meengi geezile no kubasikiiza bóona. Bityo nikwo óokwo chilyáaba obuchilo íinye Omutábani wo Omuuntu nniinyíza. 40 Habwo obuchilo óobwo, keelaaba abaantu bábili bali omumusili, oómo aleéhibwaho noóndi alaásigwaho. 41 Kaandi, keelaaba abakázi bábili balyaaba nibasa aha lubeengo, oómo aleéhibwaho noóndi alaásigwaho. 42 Mbweenu, mwiikale nu méeso, habwo kuba timukusombookelwa ni chilo chi éecho íinye Omukáma wáanyu nniinyíza.
43 “Náho mumanye kuluunzi nka nikwo, nka nyineéka bunaanka kiyakumanyile omwáanya óogwo omwíibi naayiza, mbweenu yakekeele méeso kuba omwíibi ataákwiiza kuheenda éenzu yoómwe. 44 Ha bwéecho mbweenu, neemwe mwiiloonze obuchilo bwóona, habwo kuba íinye Omutábani wo Omuuntu nniinyíza aha buchilo óobwo mutakubutegeza.”
Omugani Gwo Omuzáana Omweésigwa
45 Yeézu yaábabúuza abaheémba boómwe aáti, “Mbweenu, no oóha omuzáana óogwo ali omweésigwa no owa amasala? No omuzáana óogwo omukáma woómwe amutíile kuba omweémeelelezi wa abazáana abáandi omúka yoómwe, abone aábe naabaha ebyookulya aha kachilo. 46 Mukáma wáabo keelaaba naayiza kuluga umuluzeendo, alaámusaanga omuzáana ogwo naakola nkóokwo yamulagiile, naába ayina omugisa. 47 Mazima nniimbagaambila nka nikwo, omukáma woómwe namutaho aábe omweémeelelezi we ebiintu byoómwe byóona.
48 “Náho omuzáana mubi no óogwo ateekuza omu mwooyo gwoómwe nka nikwo, ‘Omukáma wáanze naayililwa kusuba.’ 49 Niho abaanza kutéela abazáana bazeenzíbe, no kulya no okunywa amaálwa hamo na abatamiizi. 50 Mbweenu, mukáma wo ogwo muzáana alyéeza aha chilo cha atakutégeza na aha akachilo áako atakumanya. 51 Niho omukáma woómwe alyaamuchwaaziika bwooli no kumunaga áaho abagóbya bali. Óokwo nikwo óokwo abaantu nibachula no kuteélana ameeno.”